Read Original Shona Union Bible 1949 Baiberi Magwaro Matȿene aMŋari I Samueri 16 Bible Online

I Samueri 16 - Original Shona Union Bible 1949 Baiberi Magwaro Matȿene aMŋari bible

I Samueri 16

¹Ɀino Jehova wakati kunaSamueri: Ucacema Sauro kuȿikira riniko, ɀandakamuramba ini, kuti arege kuʋa mambo waIsraeri? Zadza gonaŋombe rako namafuta, uende, ndikutume kunaJese muBeti‐rehemi; nokuti ndakaɀitȿakira mambo pakati paʋana ʋake.

²Samueri akati: Ndiŋgaenda seiko? Kana Sauro akaɀinzwa, ucandiʋuraya. Jehova akati: Enda netsiru, uti: Ndaʋuya kuzoɓayira Jehova.

³Ɀino uɗane Jese aʋuye kuciɓayiro, ini ndicakuziʋisa ɀaunofanira kuita, ugondizodzera wandicakuratidza.

⁴Samueri akaita ɀakataurwa naJehova, akaenda Beti‐rehemi. Ʋakuru ʋeguta ʋakandosoŋgana naye, ʋacibvunda, ʋakati: Maʋuya norugare here?

⁵Akati: Hoŋo, norugare; ndaʋuya kuzoɓayira Jehova, muɀinatsei, muende neni kundoɓayira. Ipapo akanatsa Jese naʋanakomana ʋake, akaʋaɗana kuciɓayiro.

⁶Ɀino ʋakati ʋaȿika, akatarira Eriabi, akati: Ɀirokwaɀo, muzodzwa waJehova uri pamberi pake.

⁷Asi Jehova wakati kunaSamueri: Usatarira ciso cake, kana mumhu wake, nokuti ndamuramba; nokuti Jehova haaʋoni somunhu, nokuti munhu unotarira ɀiri kunze, asi Jehova unotarira ɀiri pamŋoyo.

⁸Ɀino Jese akaɗana Abinadabi, akamupfuʋudza pamberi paSamueri. Akati: Kunyaŋge noyuyu Jehova haana‐kumutsaura.

⁹Ɀino Jese akapfuʋudza Shama. Akati: Noyuyu Jehova haana‐kumutsaura.

¹⁰Jese akapfuʋudza ʋanomŋe ʋaʋanakomana ʋake pamberi paSamueri. Samueri akati kunaJese: Jehova haanakutsaura aʋa.

¹¹Ɀino Samueri akati kunaJese: Ʋana ʋako ʋari pano ʋose here? Akati: Muɗuku kunaʋose ndiye wasara; tarirai unorisa makwai. Samueri akati kunaJese: Tuma munhu amutore, nokuti hatiŋgagari pakudya kuȿika iye aʋuya pano.

¹²Akatuma munhu, akapinda naye. Ɀino wakaŋga ari mutȿuku, akanaka kumeso, anomuʋiri wakanaka. Jehova akati: Simuka, umuzodze, nokuti ndiye.

¹³Ipapo Samueri akatora gonaŋombe ramafuta, akamuzodza pakati pehama dzake. Mŋeya waJehova akaʋuya pamsoro paDavidi nesimba, kubva pazuʋa iro ɀicienda mberi. Ɀino Samueri akasimuka, akaenda Rama.

¹⁴Ɀino Mŋeya waJehova wakaŋga abva kunaSauro, mŋeya wakaipa, wakaŋga watumŋa naJehova, ukamuvundusa.

¹⁵Ʋaranda ʋaSauro ʋakati kwaari: Tarirai ɀino, mŋeya wakaipa, wakatumŋa naMŋari, unokuvundusai.

¹⁶Ɀino tenzi weɗu ŋgaatiraire isu ʋaranda ʋenyu ʋari pamberi penyu, kuti titȿake munhu unoziʋa kuridza mbira kwaɀo; ɀino kana mŋeya wakaipa, unotumŋa naMŋari, aciʋuya pamsoro penyu, iye aridze noruʋoko rwake, mupore.

¹⁷Sauro akati kuʋaranda ʋake: Cinditȿakirai munhu unogona kuridza ɀakanaka, muʋuye naye kwandiri.

¹⁸Ɀino mumŋe wamajaya akapindura, akati: Tarirai, ndakaʋona mŋanakomana waJese muBeti‐rehemi unoziʋa kuridza kwaɀo, munhu unesimba noʋumhare, murwi, wakacenjera pakutaura, munhu wakanaka, ʋuye Jehova unaye.

¹⁹Naiɀoɀo Sauro akatuma nhume kunaJese, akati: Nditumire mŋanakomana wako Davidi, uri kumakwai.

²⁰Jese akatora mboŋgoro, akaitakudza ciŋgwa, neɗende rewaini, nembudzana, akaɀituma kunaSauro nomŋanakomana wake Davidi.

²¹Davidi akaȿika kunaSauro, akamira pamberi pake; iye akamuɗa kwaɀo, akaʋa muɓati wenhumbi dzake dzokurwa.

²²Sauro akatuma shoko kunaJese, akati: Tendera hako Davidi amire pamberi paŋgu, nokuti ndinomufarira kwaɀo.

²³Ɀino ŋguʋa dzose kana mŋeya wakaipa, wakatumŋa naMŋari, uciʋuya pamsoro paSauro, Davidi ndokutora mbira, nokuridza noruʋoko rwake; Sauro akanyaradzwa, akapora, mŋeya wakaipa ndokubva kwaari.