Read Orokaiva Mark 3 Bible Online

Mark 3 - Orokaiva bible

Mark 3

¹Eto Iesu na Judea embomeni ta ke kasari bande ai toreto embo ingeni meni amburari ai mitina ano kina.

²Eto jangu indari iji te embo avo Iesu na au kondasuja avo Iesu uje ae embomeni na pehumba asi kon kon uo,

³Iesu na embo ingeni meni amburari amita degi “einge huma embo ta titi ta hete” ainge enu ereto puvunu

⁴embomeni ta degi ke einge eto ingina “Jangu indari iji te embo na God ta ke pepeni agi ue embo ta degi sapura autemo javotoho au? Eto nei amo embo au kondaute mo tau amburou?” Ainge enu embomeni na ke mine ae ke ambupu eo.

⁵Iesu na jireki poeki eto embomeni kina amo embo nei jo ari embo mane avo kogue tumo ue osaga kito embo ingeni meni amburari amita degi “no ingeni jujuruke” enu jujurukenu ingeni javotoho ena.

⁶Avo Pharisee embomeni na kito tambuta pambuto Herod ta ke ambo ambo ari embomeni ga vahaita eto Iesu naingeto umbuto taro amburesuja amita ke avo kasea. Embo isapamane Iesu ta degi puvua

⁷Eto Iesu te amita ambotani te aingeto umo ireremba javo Galilee hora ta pahuo Galilee embo isapamane Iesu ambo ambo ue pahuo Judea embo te

⁸da Jerusalem embo te da Idumea embo te umo Jordan ovitiho ta da embomeni te da Tyre te Sidon te ta embomeni te aingeto Iesu na ari tapa do ena amita duru ingito Iesu ta degi puvua.

⁹Eto Iesu na embo isapamane enu kokondekea avoeto ambure embomeni na Iesu tame asi joeketo vahaike vahaike uo Iesu na ambotani ta degi e nga nununga ara ke ena.

¹¹Eto ahihi sasapura na Iesu kito Iesu ta utu ta burereketo bovue gagaha ijie ke einge ea “Umo God ta Meni be ra” ainge ijio

¹²Iesu na ke ngahia na eto ke avo mane hande ara ena. Iesu na ambotani 12 siriketo umbuna

¹³Eto Iesu na tiri ta bitito embo matu sirikena avo puvurora jage enu puvuo

¹⁴embo tapa 12 siriketo amiga pure asi umbuto apostero ikena amina ke hande ue

¹⁵sovera umbuto ahihi sasapura kurumbara.

¹⁶Eto embo 12 umbuna amo embo Simon amo Iesu na javo eha ikena amo Peter ikena,

¹⁷eto Zebedee ta meni James te amita eambo John te enana ta ke hajire amo utu pipiri ta hajire ainge avoeto Iesu na enana ta javo Pipiri ta meniundi ke ena.

¹⁸Eto nei Andrew te Philip te Bartholomew te Matthew te Thomas te Alphaeus ta meni James amite embo nei Thaddaeus te Canaan embo Simon te

¹⁹Judas Iscariot amo isoro embo ta ingeni ta ikari embo amite aingeto Iesu na siriketo umbuto amita da ta pambuna. Iesu te Beelzebul te ra

²⁰Eto Iesu da ta pahunu embomeni isapamane torukeo pure peni vahai enu Iesu te amita pure embopo te aingeto indari indae ea.

²¹Eto Iesu ta jekahoka na Iesu do ena ke avo ingito uta sapura ari ke ijie umbuto taekasi puvua.

²²Eto Judea embomeni ta ke kakajekari embopo na da Jerusalem ta eto puvuto embomeni ta degi ke einge ea. “Ahihi sasapura ta okose javo Beelzebul na Iesu ta jo ta toreto sovera ikitioi ahihi sasapura ere kurumbitia,” ainge ijio

²³Iesu na ingito timu hatirari ke na enana ta degi ke einge ena. “Naingeto Satan na Satan kurumbaja ereve?

²⁴Eto enda vahai na kateketo eonga eonga heteto isoro aisuja amo enda amina mane hetasuja.

²⁵Eto bande vahai embomeni na ereto mine tara asora amo bande amo mane iresuja.

²⁶Eto Satan na ereto ahihi sasapura ga isoro aisuja amo Satan ta sovera irae aisuja.

²⁷Eto embo na buvure embo ta donda pegene aisi uje aisuja amo kiti buvure embo andito pundurou donda amo umbasuja.

²⁸Na ungota degi ke be erena embomeni na God ta degi ari sasapura eto urumbeora amo hotembeto toari inono ra

²⁹te embo amuna Ahihi Otohu urumbasuja amo mane irae aisuja eto hotembeto toari inono aera.”

³⁰Ke ainge ena amita be amo Iesu ta jo ta ahihi sapura na torari ke ea avoeto. Iesu ta aja te namei kamei te ra

³¹Eto Iesu ta e te namei kamei te aingeto puvuto bande pe ta heteto ke ikeo

³²embomeni Iesu ga bande jo ta mitia amina “No aja te namei kamei te puvuto tambuta mitie umo uje ere ora” ainge eo

³³Iesu na ke mine einge ena. “Nau aja te namei kamei te amo amunure?”

³⁴Eto Iesu na embomeni tapa bande jo ta mitia avo poeto kito ke einge ena “Nau namei kamei te aja te amo erevira.

³⁵Embo amuna God ta ke agi aisuja amo nau aja te namei kamei te du emone te ra.” Ke ainge Iesu na ena.