Read Orokaiva Mark 4 Bible Online

Mark 4 - Orokaiva bible

Mark 4

¹Eto Iesu embo ate poekasi umo ireremba hora ta pambuto mitinu, embomeni isapamane puvuto eneteteo Iesu heteto ke aisuja inono ae enu e nga ta bitito umo jo ta isapa imite heteto embomeni tapa hora ta mitia avo

²timu hatirari ke neite neite na einge ena

³“Ingivujo, ve urari embo na pure ta pambuto ve ihaja enu

⁴ve nei amo degi ta benu di na beto india,

⁵ve nei amo enda ngijiri ta beto erena te enda peni mane avoeto susu be kambae

⁶avoeto iji na giroro eto jaise ena.

⁷Eto ve nei amo bive ta orohuta bena avoeto bive na andinu ve ae ena.

⁸Eto ve nei amo enda javotoho ta beto ereto ve nei 30 nei 60 nei 100 ainge ve ekena.

⁹Eto embo amuna ungota onde mitirou kito ke erevi ingivujo,” ke ainge Iesu na ena. Iesu na do eto timu hatirari ke na ate poekena

¹⁰Eto Iesu pambuto eonga mitinu amita ambotani te ambotani nei uhoho te aingeto timu hatirari ke ta be avo Iesu ta degi eto ingio

¹¹Iesu na ambotani ta degi ke einge ena “Eto God na embo amita toho siriketo umbuto titi jigesuja amita ke be amo ungota degi ikari rate embo tapa arahata mitera amita degi amo na ke timu hatirari na pere eona.

¹²Amita be amo Peroveta Isaiah na einge kajena ‘Enana kito kiaesira ingito ingaesira eora te ingito kito enana ta jo haperekau amo God na enana ta sapura hotembeto toaetija.’ Ainge Isaiah na kajena.” Be urari embo ta ke be avo Iesu na harikena

¹³Eto Iesu na ke nei einge ena “Na ke timu hatirari na etena amo ungo ingae rete? Na timu hatirari ke neite neite aisona amo ungo naingeto ingovo?

¹⁴Eto ve urari embo amo God ta ke ere uritia.

¹⁵Eto ve nei degi tambuta beuja amo embo na God ta ke avo ingesuja rate ke jo ta urari avo Satan na puvuto egimbeto umbuja.

¹⁶Eto ve nei enda ngijiri ta urari amita ke be amo erevira. God ta ke avo embo na ingito tunga javotoho aisuja te

¹⁷ke avo jo ta mane be beto pesisa eto susu kambasuja eto teho mitirou embo nei na amita degi God ta ke jigama ari ke eto ngahia au toau irae aisuja.

¹⁸Eto ve nei bive ta jo ta beari amita ke be amo erevira. Embo na God ta ke uje euja

¹⁹te enda ta ari te ujeje neite neite amite eto amita haja vaja amina God ta ke amo andioi ve mane euja.

²⁰Rate ve nei enda javotoho ta beto ereuja amita ke be amo erevira. Embo na God ta ke avo ingito, God tumota ue eto God ke be euja amo ve nei 30 nei 60 nei 100 aingeko euja.” Horivo ijimbeto ari ta timu hatirari ke

²¹Eto Iesu na enana ta degi ke nei einge ena, “Eto embo na horivo ijimbeto umbuto mane gaga suvu ta ikasuja eto ovu jo ta mane ikasuja te i araha ta tembau bande jo usasa aisuja.

²²Eto ke tapa ondikari avo umbuto araha ta puvuto ahurekari avo hirikaro keisora.

²³Eto embo ta onde mitirou kito avo ingesora.”

²⁴Eto Iesu na ke nei einge ena, “Ungo ke do ere ingiheva avo onde jevito ingivujo, Eto umo doinge ikasoa avo God ta kiari inono ta umbuto nei hamo ta umbasoa.

²⁵Amita be amo embo amuta degi kiari javotoho mitirou kito amo God na kiari nei ikasuja rate embo ta degi God ta ke kiari irae kito God na embo amita degi kiari do mitia avo God na umbau iraesuja.” Donda ve pajirari ta timu hatirari ke

²⁶Eto Iesu na ke einge ena, “God na embo amita toho siriketo umbuto titi jigesuja amita ke be amo eingera. Embo amuna i ve ureto

²⁷toto pambuto evosa ururou amo eonga ope bitito pajiresuja amo embo kiae pajiresuja

²⁸amo enda na simba ururou pajito hatu kateto ve aisuja.

²⁹Eto ve sari au urari embo na egerembeto puvuto tiuketo umbasuja.” I javo ‘mustard’ ta ve amita timu hatirari ke

³⁰Eto Iesu na ke nei amo einge ena, “God na embo amita toho siriketo umbuto titi jigesuja amo do aingekore? Eto timu hatirari ke naingeto ke be mo harikaro?

³¹Eto i javo ‘mustard’ ta ve amo isapa be i nei nei ta ve aingeko mane.

³²Rate ‘mustard’ ta ve vahai enda ta urasora amo pajito hatu kateto peni vahai au di na puvuto nga iketo ai utumo ta iresora.”

³³Eto God ta ke amo timu hatirari na ke nei te nei te enu ingia.

³⁴Eto embomeni ta degi ke tapa amo timu hatirari ke na pere ena te amita ambotani ta degi amo ke be na pere harikena. Iesu na enu pisara jamo ena

³⁵Eto iji aramite mume sihukitinu Iesu na amita ambotani ta degi einge ena “Ungote umo ovitiho ta pambasira.” Ainge eto

³⁶embomeni toto amita ambotani ga e nga ta pahuo e nga nei uhoho amo Iesu ta e nga ga tapa pambua.

³⁷Eto pahuo pisara peni vahai be unu umo piri peni be puvuto e nga ta torue umo na itiketo pe vitinu

³⁸ambotani joru ue Iesu e nga avo gaga ta evinu ujeto einge ea “Ate Poekari embo, dago sari asi ere ora emo umo hotembae ere oete?” Ainge eo

³⁹Iesu ereto pisara te umo te “jamo evu” ainge ke vasiri na enu pisara irae unu umo bisi bisi ena.

⁴⁰Eto Iesu na amita ambotani ta degi ke einge ena, “Ungo do eto oju ere ove. Eto ungo, na tumota ae re?” Ainge enu

⁴¹embomeni na Iesu ta ari avo kito oju ue mani mini eto ke mine ara eto einge ea “Embo emo amunure? Pisara te umo te embo emita ke agi eto jamo etera.”