Read Orokaiva Mark 8 Bible Online

Mark 8 - Orokaiva bible

Mark 8

¹Eto iji amite embomeni isapamane puvuto Iesu ta ke ingihe mitio Iesu na embomeni amita indari irae avo kito amita ambotani jage enu puvuo

²ke einge ena, “Na embomeni erevi iji amita jo ta indari indae teho mitera avo kogone jo ereua.

³Embo nei da hoi ta eto puvera avoeto ikaro beuje te da ta pambasora amo degi ta pahue titivi na amburesora” ke ainge enu

⁴ambotani na ke mine einge ea “Eto degi emo ojagatambu ra te naingeto indari umbuto embo isapamane emomo unduroro?” Ainge eo

⁵Iesu na “Ungota degi bread tapa doingere” ainge enu eto enana na ea “7” ainge eo,

⁶Eto Iesu na embomeni enda ta arumbara enu arumbeo bread umbuto God ta degi peketo ingeketo amita ambotani ta ikenu umbuto embomeni ta ikea.

⁷Eto umo o heriso memeni amite aingeto umbuto God peketo embomeni ta ikaro indora ambotani ta ikena.

⁸Eto indio inono enu ambotani na indari sirivo siriketo hambija tapa pevitina.

⁹Eto india amo embo tapa 4,000 ainge amina indio. Iesu na enu embomeni sisiketo pahuo

¹⁰Iesu e nga umbuto ambotani ga pambuto enda Dalmanutha ta puvua. Pharisee embopona ari peni be kesi penunu ea

¹¹Eto Pharisee embomeni na Iesu engekasi puvuto Iesu ga pe na jujune ue Utu ta hajire au kesi eo,

¹²Iesu na jo memenga unu ke einge ena “Ungo eha vasiri te irari embomeni na Utu ta hajire kesi erevete? Nanena erena ungo embo eha miteva amina Utu ta hajire mane be mane kesova” ainge eto

¹³enana toto e nga umbuto umo ovitiho ta pahue Pharisee ta bread pajirari sivo

¹⁴Iesu na embo sasapura ta ari avo mane jigama ara ambotani ta degi ke einge ena, “Ungo be kivujo. Pharisee embomeni te Herod te amita bread pajirari sivo avo be kon kon eto kivujo.” Ainge timu hatirari ke na ena avo ambotani na indari peni umbae bread vahai umbuto e nga ta ere pahua avo Iesu na kito ari ke eo,

¹⁷Iesu na ingito ke einge ena “Ungo do eto bread umbae ari ke ereve? Ungota jo ngahia avoeto ke erena emo ingae ue erevete?

¹⁸Ungo titi mitia te kiae eto onde mitia te ingae, iji tapa ungo hotembae ereova.

¹⁹Eto na bread 5 amina pereto embo tapa 5,000 unditana eto ungo na bread sirivo tapa hambija doinge ueve? Eto enana 12” ainge ea.

²⁰Eto Iesu na ehako ena, “Eto bread tapa 7 amina periketo embomeni 4,000 unditana amita sirivo hambija tapa doinge ueve?” ainge enu “7” ainge ea.

²¹Eto Iesu na “ungo ari erevi kogava te kiaesira ue ereva.” ainge ena. Iesu na enu titi vahaikari embo kina

²²Eto aingeto da Bethsaida ta puvuo embomeni na embo titi vahaikari avo

²³Iesu na titi ta tame aja umbuto puvuo Iesu na titi vahaikari embo amita ingeni jigito gosuketo da ahone ta umbuto pambuto titi ta isuva eto tame ue ke einge ena “Umo no titi na kon kon eto kogoete?” ainge enu

²⁴embo amina titi hangeambu eto kito ke einge ena. “Na embo re ere kogona te i uhu na pahuore kiarako ere ona,” ainge enu

²⁵ehako Iesu na ingeni titi ta tame enu embo amina kon kon eto kiari javotoho na kogunu

²⁶Iesu na da ta ikenu pambasi unu ke einge ena, “Umo da ta pambuto ari erevi ke hande aojo.” Ainge eto ikenu da ta pambuna. Iesu amunure avo Peter na ke ena

²⁷Eto Iesu na amita ambotani ga da nei nei Caesarea Philippi degi ta pahue ke einge ambotani ta degi ena, “Namo mo amunure ke eore?” Ainge enu

²⁸enana ke mine einge ea, “Eto embo nei na John bapataito ari embo ke eora, eto embo nei na Elijah ke eora eto nei amo peroveta vahai ke eora” ainge eo

²⁹Iesu na ke einge ena. “Eto nei ungo na na amunure ke eove?” ainge enu Peter na “Umo Iesu Keriso God na Judea embo hondate ae enda ta ikenu puvura.” ainge enu

³⁰Iesu na ke avo embomeni ta hande eora ke ngahia na eto taekena. Iesu memenga kito amburesuja avo ambotani ta degi ke ikena

³¹Eto Embo ta Meni na osaga te memenga te kesuja amita be amo Judea embo pepeni te priest pepeni te eto Judea ta ke pepeni simba ari embopo te aingeto Iesu amo Judea ta hondate ari embo manera ainge ijie taro amburesuja eto iji 3 ehako vasiri te erasuja ke ainge Iesu na amita ambotani ta itiketo onde katena.

³²Eto Iesu na ke emo timu hatirari ke na ae rate ke be na pere harikena avo Peter na ingito einge ena “Ke avo to. Ari avo no degi ta mane puvuresuja” ainge enu

³³Iesu na overeketo amita ambotani kogue Peter ta degi ke einge ena “Satan, Umo nau ku ta pambu. Eto umo God ta hotembari avo ae rate embo ta hotembari avo erea.” ainge Iesu na ena.

³⁴Eto Iesu na amita ambotani te embo tapa jage enu puvuo timu hatirari ke einge onde katena. “Embo amuna na ambo ambo asi uje aisuja amo amita ujeje tapa toto amita i atahu bouka avo koho ta tembeto na ambo ambo aisuja.

³⁵Eto embo amuna daroho iresi amita vasiri te ari te jigesuja amo embo amita vasiri iraesuja rate embo amina tohota ujeje te ari te toto namote nau ke te avo tumota aisuja amo daroho iresuja.

³⁶Eto embo na ahihi amita datoho irari avo hotembae ue enda ta donda nei te nei te umbasuja eto amburesuja amo amita ahihi matu amburari avoeto irari datoho mane umbasuja.

³⁷Eto embo amina amita donda neite neite tapa amina ombuto amita ahihi avo umbari haite mane be ra.

³⁸Embomeni eha mitera amo ari sasapura embopo eto God uje ae embomeni ra te embo amuna Namote nau ke te avo kito me kogue hande ae aisuja amo Embo ta Meni usasa te Anera Otohu ga iji kombu te puvuto embo avo kogue me kesuja.