Read Orokaiva Luke 24 Bible Online

Luke 24 - Orokaiva bible

Luke 24

¹Eto jangu indari iji irae eto iho bujenu pamone na Iesu ta hamo buresi donda mune te matu nununga ea avo umbuto use ta pambuto

²use pe karu na ahurekena avo hirikari mitina avo kito

³toreto Iesu ta hamo avo use jo ai ta irae kito

⁴mana mana ue mitio embo heriso bo parara be asukari amina irerembeto puvuto heteo daha daha unu

⁵arerembeto kito joru ue tumo kouketo mitio ke einge ea, “Ungo do eto embo vasiri te avo embo amburari kovari use ai jombure ere ove?

⁶Enda Galilee ta mitie ungota degi ke do ijija avo hotembevu, amo eingera, ‘Embo ta Meni avo umbuto embo sasapura ta ingeni ta ikaro umbuto i atahu ta taro ambuto iji 3 irae au vasiri ta erasuja’ ainge ungota degi ijija,” ainge eo,

⁷

⁸Enana Iesu ta ke matu ari avo hotembeto

⁹use toto egerembeto pambuto ambotani 11 amite eto embo nei uhoho amita degi ke ea.

¹⁰Eto pamone ta javo amo Mary da Magdala pamone amite Joanna amite James ta e Mary te pamone nei uhoho amite tapa ke avo eo

¹¹ingito teho ke be mane hihi tiritie erera ainge ijie ke be ae ea.

¹²Rate Peter na ereto tutuveto pambuto use jo ta anembeto Iesu togari bo avo pere mitinu kito ari do ena avo hotembu hotembu eto egerembeto bande ta pambuna. Da Emmaeus degi ta pambua

¹³Eto iji amite Iesu ta ambotani heriso amina da Jerusalem ai ereto da Emmaeus pambua amo degi 11 ‘kilometres’ koso ai ta pahue

¹⁴ari tapa do puvuna avo ke mine ara ijie pahuo

¹⁵Iesu na hae eto puvuto tambuto inono ta ere pahuna

¹⁶rate enana Iesu mane kiora titi oje na ahurekarako enu

¹⁷Iesu na enana ta degi ke einge ena, “Ungo puvutuhue ke deirami mine ara ereve?” ainge enu enana osaga kogue mitio

¹⁸embo vahai Cleopas na ke mine einge ena, “Da Jerusalem ta ari do etera tapa amo umoro embo tapa ingera te umo vahai avo ingaere,” ainge enu

¹⁹“Arimo do etere, ejo ingone,” ainge enu ke einge ea, “Iesu Nazareth embo amo peroveta peni be eto amo God ta sovera te amina ari te ke te neite neite embomeni ta titi ta eauja te

²⁰Nangota priests pepeni te embo okokose te na embo aravo taro amburoja umbuto Rome ta ingeni ta iketere umbuto i atahu ta tetere ambuto

²¹iji 3 irae ere ua erevira. Rate embo aravo Israel embo orekaja God na ikari avo hotembetera.

²²Eto nei amo nangota pamone nei uhoho na iho be te use ta pambera

²³te amita hamo avo use jo ta irae kogue ore anera na keko etereija amo Iesu vasiri te matu erari ke etere ingito puvuto nangota degi etere ingito

²⁴ke be kesi nango ta embo nei uhoho na use ta pambuto Iesu tambae pamone na ke etera avo inono ta kito puvera,” ainge eo

²⁵Iesu na ke einge ena, “Ungo kiae kiae embopo, ungo do eto peroveta mamatu ta ke avo ke be ari pegogo ere ove?

²⁶Eto Judea ta orekari embo Keriso na amita usasa ta torasuja rate kiti amo memenga osaga kioja ke ari amo ungo kiaere?” ke ainge

²⁷eto ari tapa amita degi do puvuresuja avo matu Moses ta ke kajari iji te eto pambuto peroveta tapa te amita iji te kajari avo harikenu ingihe

²⁸puvuto da auvitie embo vahai embo heriso amiga ere puvutuhuna avo da nei ta pambaute avo hotembeto

²⁹ke einge ena, “Mume ere sihukitia avoeto umo nangote hetaote?” ainge eto enana ga pambuto bande jo ta toreo

³⁰enana ga arumbeto ‘bread’ umbuto God peketo ingeketo ikitinu

³¹enana ta titi hirikenu Iesu be koguo saiveto pahunu

³²ke mine ara ijie einge ea, “Embo amina degi ta puvutuhue God ta ke hiriketei ingihore jenge ingekitei puvera,” ainge eto

³³mume amikote sau sau ereto Jerusalem ta egerembeto pambuto Iesu ta ambotani 11 amite nei uhoho amite tapa toruketo mitia ai ta toreto

³⁴“Bada vasiri te ereto Simon ta degi puvei kija,” ainge embo heriso amita degi eo

³⁵enana degi ta do enu kogue ingihe pahumite bande ta toreto ‘bread’ ingekena ai ta be kia, Ambotani na Iesu kia

³⁶Avo eo ingihe mitio Iesu enana ta jo ta puvuto heteto, “Peka ungota degi iroi,” ainge ijinu

³⁷enana kito embahe ke ijie joru uo

³⁸kogue ke einge ena, “Ungo do eto joru ove ungota jo ta eto ingari ke isapamane mitei?

³⁹Namora. Nau ingeni te utu te kogue na tame evujo. Eto embo amburari ta ahihi amo bisi irae vetu irae rate namo amo bisi te vetu te ra.” ainge eto

⁴⁰amita ingeni te utu te avo enu

⁴¹kito osa pajire be ue mana mana uo, “Ungota degi indari miteite,” ainge enu

⁴²umo o borari avo ikeo

⁴³enana ta titi ta indito

⁴⁴ke einge ena, “One ere kogova amo ungote iriona iji amikote tapa etene ingeva amore Moses ta ke kajari te peroveta mamatu ta ke kajari te ‘Psalms’ ta ke kajari te ai ta ke kajari mitera amita bere puvija erevira,” ainge eto

⁴⁵enana ta uta hirikenu God ta ke kajari tapa avo be kon eto koguo

⁴⁶Iesu na ke einge ena, “Avoeto ke matu kajari ta mitia amo Keriso amina memenga kogue ambuto iji 3 amina vasiri te erasuja

⁴⁷eto ari sasapura toto jo aherekari amite ari sapura hotembeto toari amite amita ke avo Keriso ta javo ta da Jerusalem ei ta eto enda tapa ta pahue hande evujo.

⁴⁸Eto ari erevi tapa amo ungo titi na kiari avoeto ke hande ari embopora

⁴⁹avoeto kivujo, ungo da ei ta mitirovo nau Mama na ikasi ke ena avo pambuto ikano Utu ta sovera na ungota jo enetasuja,” ainge enu irae enu Iesu Utu ta bitina

⁵⁰Enana urumbeto umbuto da Bethany ta pambuto ingeni i ta jigito

⁵¹ambotani ta javotoho ari ikitinu Mamo na umbuto Utu i ta pambuna.

⁵²Eto enana tunga javotoho ue God jakeka ijie egerembeto da Jerusalem ta pambuto

⁵³temple jo ta toreto mitie God jakeka ere ijiaetera.