Read Orokaiva Luke 8 Bible Online

Luke 8 - Orokaiva bible

Luke 8

¹Eto iji isapa amita ambota Iesu na da ari na eto tehue God na embomeni titi jigesi sirikasuja amita duru javotoho avo hande ena. Eto amita apostero 12 amite

²pamone nei nei ahihi sasapura na jo ta torari kurumbena amite pamone nei nei amo ambure ari avo kondena amiga pambua. Eto pamone amo da Magdala pamone javo Mary amita jo ta amo ahihi sasapura tapa 7 kurumbena

³eto nei amo Herod ta pure embo vahai javo Chuza amita ae Joanna amite pamone Susanna amite pamone nei nei aingeto Iesu unduresora avoeto enana ga pambua. Be urari embo ta timu hatirari ke

⁴Eto da tapa embomeni Iesu ambo ambo puvua amina vahaita torukeo Iesu na timu hatirari ke enana ta degi einge ena,

⁵“Ve urari embo vahai na pure ta pambuto ve ihaja enu ve nei amo degi ta benu embomeni na haito jaevekitio di na beto india

⁶ve nei amo karu hamo ta bena avoeto ereto jaise ena umo irae avoeto

⁷Eto ve nei amo ma ta bena avoeto eritinu esi na andinu sapura ena.

⁸Eto ve nei amo enda javotoho ta bena avoeto ereto ve 100 ainge ekena,” eto ke ainge Iesu na ijie isara na eto, “Ungo amuta onde mitirou kito ke erena erevi ingivujo,” ainge ena. Iesu na do eto timu hatirari ke na ate poekena

⁹Eto amita ambotani na timu hatirari amita ke be avo deire avo au ingesi eo

¹⁰Iesu na ke einge ena, “Eto God na embo amita toho siriketo umbuto titi jigesuja amita ke be amo ungota degi ikarira te embo tapa arahata mitera amita degi amo timu hatirari na ikano kito kiaesira asora eto ingito ingaesira aisora. Be urari embo ta ke be avo Iesu na harikena

¹¹Eto timu hatirari na etena amita ke be amo erevira, be urari amita be amo God ta ke ra.

¹²Eto ve nei degi tambu ta beuja amo embo na God ta ke avo ingesuja rate ke jo ta urari avo Satan na puvuto egimbau God ta ke avo ke be ae ijirou mane oreketo umbasuja.

¹³Eto ve nei karu hamo ta beari amita ke be amo erevira, God ta ke avo ingito tunga javotoho aisuja te ke avo jo ta mane be beto pesisa eto susu kambasuja eto teho mitirou engekari puvurou toasuja.

¹⁴Eto ve nei ma ta beari amita ke be amo erevira, embo na God ta ke uje euja te enda ta ari te ujeje neite neite amite eto amita haja vaja amina God ta ke amo andioi ve mane ekeuja

¹⁵Eto ve nei enda javotoho ta beari amita ke be amo embo na God ta ke avo ingito amita jo ta ke be ari na be jigito simba javotoho uore be eketo pajiuja. Horivo ijimbeto ari ta timu hatirari ke

¹⁶Eto embo na horivo ijimbeto umbuto ovu to ta iketo mane ahurekasora eto gaga suvu ta mane ikasora te araha ta tembau embo bande jo ta torasi puvuto kesora.

¹⁷Eto ainge nombo ke tapa ahurekari avo harikaro tapa ingesora eto ondikari avo umbuto araha ta ikaro kesora.

¹⁸avoeto God ta ke eto kogoeto ingivujo eto embo ta degi kiari isapa irirou kito nei amita hamo ta ikau umbasuja rate amita kiari isapa irari ke asuja embo amita kiari do mitia avo umbau irae aisuja.” Iesu na ke ainge ijinu Iesu ta aja te namei kamei te ra

¹⁹Amita e te namei kamei te aingeto Iesu ta degi puvua te embomeni isapamane avoeto Iesu ta degi pambari inono ae enu

²⁰embo na Iesu ta degi ke einge ea, “No aja te namei kamei te umo kesi uje eto puvuto araha ta mitera,” ainge eo

²¹Iesu na einge ena, “Embo te pamone te amuna God ta ke ingihe agi aisora amo nau aja eto namei kamei ra,” ainge ena. Iesu na enu pisara jamo ena

²²Eto iji vahai Iesu na amita ambotaniga e nga ta bitito ungote umo ovitiho ta pambasira ainge enu pahue

²³Iesu sereketo evo unu pisara peni vahai puvuto umo na teto mimisenu e nga jo ta beto pe vivitinu e nga itiketo huhurumbeto bovunu

²⁴ambotani na pambuto Iesu ujitie, “Bada, Bada, ungotena sari ari embopora,” ainge ijio ereto pisara te umo te ta degi ke ngahia na enu jamo eto bisi bisi enu.

²⁵Iesu na enana ta degi, “Ungo na tumota ae re,” ainge enu joru eto mana mana ue ke mine ara eto einge ea, “Embo emo do aingere? Ke etei umo te pisara te amita ke agi eto jamo etera,” ainge eto pambuto Embo ahihi sasapura na torari avo Iesu na enu kondena

²⁶Enda Galilee umo ovitiho enda javo Gerasenes ai ta puvuto

²⁷beto da amita embo vahai ahihi sasapura na torari avo hora ai ta tambua. Embo amo iji koso amita bo irae eto bande irae embo ikeore sape eora panga to ai ta mitiaetija.

²⁸embo amina Iesu kito gagaha ijie pambuto Iesu ta utu ta beto ahue ke isara na einge ena, “Iesu, God sovera isapamane te ta Meni nau degi ta do ao? Na penunu erena, nau degi ta memenga ikaojo.”

²⁹Rate embomeni na embo avo ‘chain’ na punduo ahihi sasapura na embo andirari avoeto ivo peni vahai eto ‘chain’ jigito usuketo embo umbuto ojaga tambuto pambuna avo Iesu na kito, “Embo ta jo avo toto puvuto pambu,” ainge enu

³⁰ainge enu Iesu na, “No javo deire,” ainge enu embo amina, “Dago isapamane avoeto nau javo ‘Legion’ ra,” ainge eto

³¹Iesu na kurumbeoi memenga kiari degi ta pambari uje ae eto

³²o ohu isapamane heti ovitiho ta indie mitio kito amita jo ta au pambasi penunu enu aravora enu

³³Ahihi sasapura na embo ta jo toto pambuto o ohu ta jo ta toreo tutuveto pambuto heti ta eheruva eto beto umo indito ahuo

³⁴o simba ari embopo na joru pambuto da pepeni te memeni te tapa amita embomeni ta degi hihi tirio

³⁵ingito embomeni kesi Iesu ta degi pambuto embo ahihi sasapura na torari avo uta javotoho enu bo asuketo Iesu ta utu ta arumbeto mitinu kito joru uo

³⁶embo ahihi sasapura na torari avo konditinu kia embopo amina hihi tirio

³⁷ingito enda Gerasenes embomeni tapa amina joru pajire be eto Iesu enda avo toto pambaja eo e nga ta bitito egerembeto pambasi uo

³⁸embo matu ahihi sasapura na torari amina Iesu ga pambasi penunu enu Iesu na

³⁹“Namoga mane pambasoate God na umo kito jo etei no degi ta tapa do etija avo no da ta pambuto ejo ingore,” ainge enu amina tohota da ta pambuto embo tapa ta degi Iesu na do enu kina avo hihi tirinu ingia. Embo Jairus ta iae eto pamone Iesu tame ena ta ke

⁴⁰Eto Iesu egerembeto pahunu embomeni tapa simba ere ua amina Iesu kito tunga javotoho ue pekea.

⁴¹Eto Judea ta ke kasari bande ta titi jigari embo vahai javo Jairus amita iae avo vahai amita ingari jua tapa 12 avo amburesi unu pambuto Iesu ta utu ta beto paunge teteri eto Iesu amita bande ta pambaja penunu enu ingito Iesu Jairus ga pahunu embo isapamane Iesu ga oroviketo pahuo

⁴²

⁴³pamone vahai amo jua tapa 12 amita jo ta sasaga vovuoi embo na ari kondari inono ae uore mitiaetija

⁴⁴amina Iesu ta ke ta puvuto amita bo petiki tame unu amita sasaga irae enu.

⁴⁵Iesu na, “Na amuna tame ere oi,” enu embomeni tapa na nango tame aera ainge eo Peter na ke einge ena, “Embo isapamane avoeto umo vahaike vahaike ere ora,” ainge enu

⁴⁶Iesu na ke einge ena, “Nau sovera isapa beto ere pahua avo mine uhe tame ari ke erena,” ainge enu

⁴⁷Pamone amo ondikari irae kito gatari gatari ue joru te tapa puvuto Iesu ta utu ta beto gombuto naingeto Iesu tame eto kondena amita be avo embo tapa ta titi ta harikenu

⁴⁸Iesu na ke einge ena, “Nau iae, umo na tumota eto kondetea avoeto peka ta pambujo.”

⁴⁹ainge ijinu embo na Jairus ta bande ta eto puvuto Jairus ta degi ke einge ena, “No iae matu ambija avoeto ate poekari embo mane jigesoa te tojo pambae,” ainge enu

⁵⁰Iesu na ingito ke einge ena, “Umo osaga mane kesoa te na tumota ejo no iae ano kondasuja,” ainge eto

⁵¹Bande ta pambuto embomeni araha ta irora enu mitio Peter te John te James te e te mamo te avo enu toreo

⁵²embomeni sisisasi ijie mitia amita degi ke einge ena, “Ungo si mane aisova. Kakara amo amburaera te teho evo ere ua,” ainge enu

⁵³kakara matu amburari avoeto Iesu na evo ari ke ena avo ganini ijio

⁵⁴Iesu na kakara isapa amita ingeni ta jigito, “Ka, umo ere,” ainge enu

⁵⁵amita ahihi egerembenu erenu Iesu na ka amita degi indari ikaro indoja ena.

⁵⁶Eto amita e te mamo te mana mana uo ari do ena amita ke avo hande eora ke ngahia ena.