Read Orokaiva John 11 Bible Online

John 11 - Orokaiva bible

John 11

¹Eto embo javo Lazarus amo da Bethany ai ta amita du kakara heriso Mary te Martha te amiga mitiaetija avo ambure umbuna

²(Eto kakara vahai oil mune te amina Iesu ta utu ta kuteto amita siro tu na tuheneija amo Lazarus ta du ta javo Mary ra.)

³Eto Lazarus ta du emone heriso amina Iesu ta degi ke einge ikeo pambuna, “Bada, no tunga humbari namei avo ambure ue mitia,” ainge ijie ke ikeo pambunu

⁴Iesu na ingito ke einge ena. “Eto ambure umbuto mane sari aisuja te embomeni na Mama God ta usasa kito eto Meni ta usasa kiora ere ua.” ainge Iesu na ena.

⁵Eto Iesu na Martha te amita jao Mary te du Lazarus te avo osa ena

⁶te Lazarus ambure ari ke ingina te sausau pambae iji heriso mitimite

⁷amita ambotani ta degi, “Ungote enda Judea ta pambasora,” ainge enu,

⁸Ambotani na ke einge ea, “Ate Poekari Embo, umo Judea embomeni na atara na tasi etere puvea te porere ae ehako egerembao?” ainge eo,

⁹Iesu na ke mine einge ena, “Eto iji bitiuja amo amita jo ta amo 12 hours amina usasa euja amo embo na teto kokain eto mane beora amita be amo iji usasa mitia avoeto,

¹⁰Rate mume te amo teto kokain eto beora amita be amo usasa irae”, avoeto ke ainge,

¹¹eto ke nei einge ena, “Aravorate ungote pambuto ungotenau namei Lazarus erevia avo ujaro eraja na.” ainge enu,

¹²ingito einge ea, “Bada, amo jangu indie erevia avoeto kondasuja,” ainge ijie

¹³teho evo ari ke hotembea te Iesu na matu ambuna aravo evo ari ke ena

¹⁴avo Iesu na kito ke hariketo einge ena, “Lazarus ambija te ungona na ke be ava mitena avoeto na tunga javotoho ere ona te ungote Lazarus kesi pambasira,” ainge enu,

¹⁵

¹⁶Ambotani vahai Thomas eto amita javo nei Didymus na ambotani nei uhoho ta degi ke einge ena, “Aravora te ungote Iesu ga tapa pambuto sari aisora,” ainge ena. Vasiri te erari eto daroho irari amo Iesu ta degi mitia

¹⁷Eto pambuto Lazarus ambunu use ta ikea amo iji tapa 4 irae enu Iesu puvuna.

¹⁸Eto Lazarus ta da Bethany amo da Jerusalem engiti ta 3 kilometres ainge pambuora

¹⁹Avoeto Judea embomeni na Lazarus ta du kakara Martha te Mary te aingeto Lazarus ambuna avo sipuri asi pambuto mitio

²⁰Iesu puvurari duru ingito Mary da ta mitinu Martha na Iesu tambasi degi ta pambuto Iesu tambuto

²¹Iesu ta degi ke einge ena, “Bada, umo ei ta iraetea amo nau du mane amburaetija

²²te umo do uje eto penunu aisoa amo God na ikasuja avo na ere kogona.” Ke ainge Martha na enu,

²³Iesu na einge ena, “No du amo vasiri te erasuja,” ainge enu

²⁴Martha na Iesu ta degi einge ena, “Na kogona amo iji kombu te erasuja,” ainge enu,

²⁵Iesu na einge ena, “Eto vasiri te erari amo namora. Eto embo amuna na ke be aisuja embo amina amburou irae mane aisuja te ehako vasiri te erasuja.

²⁶Eto embo amuna vasiri te mitie na ke be ijie mane amburesuja te vasiri te daroho iresuja. Ke ainge erena amo umo kogoete?” Ainge enu,

²⁷Martha na, “Bada, umo God ta Meni Keriso avo simba ere ovora avo enda ta puvea erevira,” ke ainge Iesu na si ena

²⁸Eto pambuto amita jao Mary jage eto, “Ate Poekari Embo puvuto umo kesi eria,” ainge enu

²⁹Mary na ingito sau ereto pambuto Iesu da jo ta torae da sahu ta Martha tambuna degi ai mitinu Mary pahunu

³⁰

³¹Judea embomeni Mary ga bande jo ta sipuri ijie mitia amina Mary sau ereto Lazarus ta use ta si asi pambari ke hotembeto embomeni na Mary ta ambota pahuo,

³²Mary na Iesu ta degi puvuto Iesu kito utu ta beto gombuto ke einge ena, “Bada, umo matu puvuraetea amo nau du mane amburaetija,” ke ainge si te tapa ijinu

³³Iesu na Mary ta titi sisivu te eto Judea embomeni ta si te avo kito Iesu osaga peni vahai be enu

³⁴ke einge ena, “Koveteva use naingetare?” ainge enu embomeni na, “Bada, orovira, pambuto ki,” ainge eto pahuo

³⁵Iesu si ijinu

³⁶Judea embomeni na kito, “Kivu, osa peni vahai euja avoeto ambei si eria,” ainge ijio

³⁷embo nei uhoho na ke einge ea, “Embo emina titi tahimbari etei javotoho etija te embo emita amburari emo taekari inono ae avoeto ambei?” ainge embomeni na ijio, Iesu na enu embo Lazarus vasiri te erena

³⁸Iesu osaga peni vahai kogue use ta puvuto atara peni amina use pe ahurekea avo kito

³⁹“Atara evi umbavu pambai,” ainge enu embo ambuna amita du Martha na ke einge ena, “Bada, ambei kovetere iji 4 irae etei sari ue kimu masa ere ua.” Ainge enu,

⁴⁰Iesu na ke einge ena, “Na no degi ta umo God ke be ijie God ta usasa no degi ta ikau kesoa, ke ainge etenete?” ke ainge enu,

⁴¹atara umbuo pahunu Iesu na titi i ta eto “Mama umo ke nau ingioa eto ere ingihea avoeto umo osa ere ona.

⁴²Eto namo avoembo ae rate embomeni ei mitera avo inena na ikae puvua avo ano kito ke be ara erena,” ainge eto

⁴³hori gagaha eto einge ena, “Lazarus umo tambuto puvura,” ainge enu,

⁴⁴amburari embo bo oseseto utu te ingeni te pupundukea eto tombu togea amite tapa tambuto puvuto hetenu Iesu na embomeni ta degi ke einge ena, “Bo togari avo bujeketo tovu pambai,” ainge ena. Judea ta embo okokose na Iesu tasi ke kasea

⁴⁵Eto Judea embomeni nenei Mary ga puvua amina Iesu na Lazarus ambunu kovea avo enu vasiri te erena avo kito Iesu ke be ijie tumota ea.

⁴⁶Eto Judea embomeni nenei na pambuto Pharisee embomeni ta degi Iesu na ari do ena avo eo,

⁴⁷ingito priests pepeni te Pharisee embomeni te aingeto vahaita toruketo ke kaseto einge ea, “Embo emina ari sovera neite neite ere ua emo ungote embo emo do aro?

⁴⁸Eto toasora amo embomeni tapa embo avo ke be ijiroro Rome embo na puvuto isoro ue embo torue temple otohu taro irae aisuja.” Ainge ijio

⁴⁹jua amita priest peni javo Caiaphas amina ke einge ena, “Ari emo puvija te ungo be kiae ere ova.

⁵⁰Rate ungo embo tapa amburesova amo sapurara te ungo embo tapa amita javota embo vahai amburesuja avo javotohora,” Ke ainge Caiaphas na ena.

⁵¹Amo amita hotembari na ae rate Judea ta priest peni ue Iesu na Judea embomeni tapa avoeto amburesuja avo harikena

⁵²te amo Judea embo avo pere mane rate God ta meniundi enda tapa ta mitera avo namei kamei vahai ara amburesuja.

⁵³Eto ke ainge ea iji amikote Iesu naingeto umbuto taro amburesuja avo degi jombure ea.

⁵⁴Avoeto Iesu na Judea embomeni ga umoro ae toto amita ambotani ga degi ojagatambu amita engitita da javo Ephraim ai pambuto mitiaetera.

⁵⁵Eto Judea ta Jarukari Pondo ari iji auvitinu Judea da isisaraho embomeni na Jerusalem ta pambuto enana ta ari ainge avoeto hamo egaro otohu au pondo asi toruketo temple jo ta isa ue ke einge ea, “Ungo do ere hotembeteve? Iesu eha pondo ta puvuroute mane puvurou?” ainge ea.

⁵⁶

⁵⁷Eto priests pepeni te Pharisee embomeni te aingeto ke matuainge ea, “Embo amuna Iesu kito avo puvuto dago ta evujo dago na embo avo andito umbare,” ainge ea.