Read Orokaiva John 6 Bible Online

John 6 - Orokaiva bible

John 6

¹Eto emita ambota Iesu na umo javo Galilee (amita javo nei Tiberias) avo embuto ovitiho ta pambuto mitie ari neite neite ue embo kokondekena

²avo kesi embomeni isapamane na ambo ambo ue puvuo

³Iesu na heti i ta amita ambotani ga bitito arumbena.

⁴Eto Iesu na ari erevi ena amo Judea ta jarukari pondo ari iji puvuto auvitinu ena.

⁵Eto Iesu na arerembeto embo isapamane puvutuhuo kito Philip ta degi ke einge ena, “Ungote indari nainge koro na ombuto umbuto embo isapamane emo unduroro?” ke ainge ena

⁶amo Iesu na do aisuja amo matu kina te teho Philip ta degi au Philip na ke do au ingesi avo eto ingina

⁷Eto Philip na ke mine einge ena, “Ungote koro peni vahai na bread umbaetera amo embo vahai vahai na pereto indoro inono mane aisuja.” Ainge enu.

⁸ambotani nei Simon Peter ta namei Andrew na einge ena,

⁹“Meni isapa emina bread 5 umo o heriso, ainge umbuto puvuto mitia te inono manera,” ainge enu

¹⁰Iesu na einge ena, “Aravora te evu embomeni tapa arumbare.” ainge enu embo tapa 5,000 te pamone te meni isasaraho te tapa enena ta arumbeo

¹¹Iesu na bread tapa 5 umbuto God ta degi peketo embo arumbea amita degi ikena. Eto umo o heriso amite tapa ikenu embomeni tapa indio inono enu

¹²Amita ambotani ta degi einge ena, “Indari indera amita ihehe avo aija mane asova te tapa siriketo umbuvujo.” ainge enu,

¹³ihehe siriketo umbua bread amo tapa 5 rate hambija tapa 12 amo ihehe na pevitina.

¹⁴Eto Iesu na ari erevi enu embomeni na kito ke einge ea, “Peroveta enda ta puvuresuja ainge ijiore simba ere ovora amore erevira,” ainge ea.

¹⁵Eto embomeni na Iesu ta degi ke vasiri na eto aro enana ta king aja ke asora avo Iesu na kito umo eonga beto tiri ta pambuna. Iesu na umo hamo ta isa ena.

¹⁶Eto ture vovunu ambotani na da Capernaum umo ovitiho ai ta pambasi umo hora ta beto

¹⁷e nga ta bitia eto Iesu tiri ta pambuna amo puvurae enu mume sihukitunu

¹⁸e nga ta pahuo pisara peni vahai be puvuto umo piri unu

¹⁹e nga tavitie 6 o 7 kilometre ainge pahuo Iesu na umo hamo ta haito puvutuhunu kito oju uo

²⁰Iesu na kito ke einge ena, “Namora, ungo oju avojo.” ainge enu

²¹Iesu e nga ta bitoja uje ea te degi pambasi uje ea avo matu puvua Da Capernaum ta ke kasari bande ai ta Iesu ga ke mine ara ea.

²²Eto embomeni asa umo ovitiho ta toa amina iho bujenu e nga vahai be avo mitina ai ta ambotani na pere bitito pahuo Iesu avo e nga ta bitae

²³kito bread india degi amita engiti ta da javo Tiberias ai ta e nga nenei puvua avo Iesu te ambotani te puverete avo kesi pambua

²⁴rate kiae eto e nga nei ai bitito Iesu jombure asi da Capernaum ta pambua. Iesu amo Utu i ta indarira

²⁵Eto pambuto Iesu tambuto ke einge ea, “Ate poekari embo, umo nainge eto puve?” ainge eo

²⁶Iesu na ke mine einge ena, “Na ungota degi ke be erena, ungo God ta ari neite neite keva avo ae rate indari peni vahai be indeva avo eto na jombure ere ova.

²⁷Te indari amo sari aisuja avo eto ungo indari ta pure avojo, indari nei vasiri te daroho iriuja amita pure avo evujo. Eto indari avo Embo ta Meni na hande ikasi ere ua, Eto God Mamo na Embo ta Meni javotoho ke eria,” ainge Iesu na enu

²⁸Embomeni na ke einge ea, “Eto God na dago pure do ara uje ere oi?” ainge eo

²⁹Iesu na ke mine einge ena, “God ta pure amo erevira: God na Embo iketei puvija avo ke be ijie tumota evujo,” ainge enu,

³⁰mine einge ea, “God ta ke matu kajari ai ta ke einge mitia. ‘Amina bread Utu i ta ikenu embomeni na india,’ ke ainge kajari mitia amo dagota mamamane na ojagatambu ta mitie Utu i ta bread avo india te inena pure do ao no hajire avo kito ke be aro?” ainge eo,

³¹

³²Iesu na ke einge ena, “Na ungota degi ke be erena, Utu i ta bread avo Moses na ikae rate nau Mama na Utu i ta bread be avo ikeuja

³³Eto God ta bread be avo Utu ta eto beto embo tapa ta degi vasiri ikeuja,” ainge enu

³⁴“Embo, bread avo dagota degi matuainge ikejo indore,” ainge eo,

³⁵Iesu na ke einge ena, “Vasiri te irari bread amo namora. Eto embo amuna nau degi ta huresuja amo beuja mane kesuja. Eto na tumota aisuja embo na mane umo ujeje kesuja

³⁶Eto na ungota degi matu ijiena te ungona na titi na ere kogova te na tumota ae ere ova.

³⁷Te God na embo nau degi ta ikasuja amo nau degi ta hururoro na mane toasona te umbasona

³⁸Eto na Utu ta eto puvena amo uje nau avo aisi puvuraera te na iketei puvena Embo amita uje avo pere aisona.

³⁹Eto embo na iketei puvena amita uje amo embo tapa nau iketija amo nei vahai mane beto pambasuja te iji kombu te ano tapa erasora.

⁴⁰Erena amo nau Mama ta uje amo embo amuna God ta Meni kito tumota eto vasiri daroho umbasuja amo iji kombu te ano vasiri te erasuja,” ke ainge Iesu na ijinu

⁴¹Judea embomeni na ‘Na bread Utu ta beari ra’ ke ainge Iesu na ena avo ingito isoro ke ungo eonga ijie

⁴²einge ea, “Embo emita Mamo Joseph ra eto amita e mamo amo ungotena kiarira te doeto Utu ta eto beari ke erei?” ainge eo

⁴³Iesu na ingito, “Ungo isoro ke ungo eonga ereva avo tovu.

⁴⁴Eto embo na eonga nau degi ta mane huresuja te God na jigito gorukau huresuja embo amo na iji kombu te ano erasuja.

⁴⁵Eto peroveta na ke einge kajea, ‘Embo tapa avo God na ate poekasuja’ ke ainge kajari mitia avoeto embo amuna God ta ke ingito kiari uhue nau degi ta puvuja.

⁴⁶Rate embo na God ta tombu kiaera te Embo God ta degi eto puvurari amina God kiarira

⁴⁷te na ke be erena embo amuna ke be ijie tumota aisuja amo vasiri daroho umbasuja.

⁴⁸Eto na vasiri daroho ta bread ra,

⁴⁹te ungota mamamane na ojagatambu ta mitie bread Utu ta eto beari avo india te irae ambuvujekea

⁵⁰te bread Utu ta eto beari erena emo indito mane amburesora,

⁵¹te bread vasiri te Utu ta eto puvija ke erena amo namora eto embo amuna indesuja amo vasiri te daroho iresuja. Eto bread ikasona amo nau bisi avo enda ta embomeni vasiri te irora ikasona,” ke ainge Iesu na enu,

⁵²Judea embomeni na tumo ue ke ungo eonga eto einge ea, “Do eto embo emita bisi ikau ungotenane indoro?” ainge eo,

⁵³Iesu na ke mine einge ena, “Eto ungo ta degi ke be erena. Embo ta Meni ta bisi te sasaga te indae aisova amo ungota degi vasiri mane iresuja,

⁵⁴te embo amuna nau bisi te sasaga te indesuja amo embo amita degi vasiri te daroho iresuja avoeto iji kombu ta jigono erasuja.

⁵⁵Amo nau bisi te nau sasaga te amo indari be avoeto,

⁵⁶embo amuna nau bisi te sasaga te indesuja amo na embo amita jo ta iresona eto embo amo jo nau ta iresuja

⁵⁷Ke amo erevira, nau Mama vasiri te na na iketei puvuto amita degi vasiri ere uhona ainge nombo embo amuna na indito nau degi ta vasiri umbasuja.

⁵⁸Eto bread Utu ta eto beari erena amo ungotenau mamamane na indito ambuvujekea ainge mane rate bread erevi indesuja amo vasiri te daroho iresuja.”

⁵⁹Ke ainge da Capernaum kasari bande ta enu Daroho irari ta ke amo Iesu ta degi mitia

⁶⁰Ingito amita ambotani nei uhoho na einge ea, “Ke emo sapura be avo ere ingihera avoeto embo na naingeto ke erevi ambo ambo aro?” ainge

⁶¹tumo te tapa ea avo Iesu na kito ke einge ena, “Eto ungo ke erena avo ingito tini kambari ere ovete?

⁶²Embo ta Meni na beari degi ta bivitirou ungo kito do hotembavo?

⁶³Eto bisi na nei do mane ikeuja te Ahihi na vasiri ikeuja avoeto na ke erena amo ahihi te vasiri te amita ke avo erena.

⁶⁴Rate ungo nei uhoho na ke be ae eova.” Ainge Iesu na ena amita be amo Iesu ke be ae embopo eto embo nei Iesu ta jenge indesuja embo amo Iesu na matu itikari ta kina.

⁶⁵Eto ke nei einge ena. “Avoeto ungota degi ke matu ijiena amo embo na mane nau degi ta huresuja te God na au huresuja ainge ijiena.”

⁶⁶Eto ke ainge ena amikote ambotani nei uhoho na Iesu ambo ambo ae toto ungota uje ta pambua.

⁶⁷Eto Iesu na ambotani 12 ta degi ke einge eto ingina, “Eto ungote tapa pambasi uje ere ovete?” ainge enu

⁶⁸Simon Peter na einge ena, “Bada dago umo toto amuta degi pambaro? Vasiri daroho irari ta ke avo inena hande oe

⁶⁹ke be erera eto umo God ta Embo Otohu be avo dago ere kogora,” ainge enu

⁷⁰Iesu na ke einge ena, “Nanena ungo 12 avo siriketo uhana te ungo vahai avo Satan ta tohora.” Ainge ena

⁷¹amo embo Simon Iscariot ta meni Judas amo ambotani 12 ra te Judas amina isoro embo ta harikasuja avo eto ena.