Read Orokaiva Romans 4 Bible Online

Romans 4 - Orokaiva bible

Romans 4

¹Eto dagota Ohihi Abraham avo ungote keisira, amita ari jajavotoho amina God ta tombu ta embo javotoho enute mo amita tumota ari na embo javotoho enu?

²Eto Abraham na amita ari jajavotoho na God ta tombuta embo javotoho aetija amo embo na kito jakeka aetera te God na Abraham ta ari jajavotoho kito embo javotoho ke mane aetija

³te God ta ke ta einge kajari mitia amo “Abraham na God ke be ena avo God na kito embo javotoho ke ena”, ke ainge kajari mitia

⁴avoeto erena amo embona pure eto mine umbuja amo teho hande umbae rate amita pure ta mine avo umbuja

⁵rate embo na amita ari jajavotoho God ombae rate ari sasapura embomeni na Keriso tumota ururoro God na hande mine vahai oreketo

⁶umbau God ta tombuta embo amo ari sapura embo mane avoeto tunga javotoho be aisuja amita ke amo King David na einge kajena.

⁷“Eto embo amuta ari sasapura amo God na hotembeto toto ahurekau irae au embo amo tunga javotoho ururou God na ehako mane hotembasuja”.

⁹Eto tunga javotoho ari emo Judea embomeni avoeto hamo kakamba ari embomeni na pere kiorotemo hamo kakamba ae embomeni te tapa kioro? Eto ke matu etena amo Abraham na God ke be ijie tumota unu God na embo javotoho ke ena

¹⁰amo tumota ari amita kiti ta hamo kakamba enute ambota enu? Eto amita ke be amo ungotena kiari amo Abraham na kiti God tumota ue tumota ari amita hajire avo God na enu hamo kakamba ena

¹¹avoeto hamo kakamba ae mitiaetija amikote amo God na kito embo javotoho ke ena avoeto Abraham amo ungo hamo kakamba ue tumota eova embomeni amita mamo pere mane

¹²rate hamo kakamba ae embomeni God tumota eora amita mamora. God na onde ena avo God tumota ue umbuora

¹³Eto God na Abraham ta eto meniundi ta degi enda tapa avo ikasi onde ena amo Abraham na God ta ke pepeni agi ere uaetija avoeto ikasi onde ae rate Abraham na God ke be ena avoeto Abraham embo javotoho ra ijie onde ena.

¹⁴Te ungo ereva amo God ta ke pepeni agi ari embopo na God ta hotari umbasora ainge ke be kito embo tapa na hotari mane umbasora eto God na onde ena amo be ambu aetija.

¹⁵Eto ungotena ere kogora amo God ta ke pepeni irae amo mane poekaetera te God ta ke amo mitia avoeto ungotena God ta hotari umbasi uje ue amo etokito ke pepeni avo agi eora te ke pepeni avo kaikari poekeora avoeto God ta tumo vahai avo tambasora.

¹⁶Avoeto hotari onde ena avo God tumota ururoro Abraham ta meniundi tapa ta degi hande ikau umbasora amo ke pepeni umbae embopo te umbari embopo te tapa amuna Abraham na God tumota ena ainge nombo ue Abraham ta meniundi eto umbasora.

¹⁷Eto ungotena Abraham ta meniundi tapa amita ke amo einge kajari mitia, “Abraham, umo nanena enda tapa ta mamo ere ikitena” ke ainge God na ena avoeto Abraham na embo amburari ta vasiri ikari God avo ke be ena amo ungotenau mamara te ari matu puvurari te puvurae te amo God ta tohora.

¹⁸Eto Abraham kerembo ena te amita hamo bisi amo hotembae ue God tumota unu God na onde ena amo amita meni puvuto amita poru ta enda pajire be puvuroja onde ena

¹⁹te Abraham ta pajirari jua 100 enu eto amita ae kerembo enu oti vavekena te hotembu hotembu ae

²⁰rate sovera umbuto God tumota ue jakeka ena.

²¹Amo onde ena avo mane toasuja te sovera inono avoeto aisuja avo hotembeto ke be ena

²²eto Abraham ta hotembari avo God na kito embo javotoho ke ena

²³eto God na kito embo javotoho ke ena amo Abraham vahai mane rate

²⁴embo ta ari sasapura ombuto umbasi God na ungotenau Bada Iesu tonu ambunu ehako jiginu vasiri te erena avoeto embo amuna God ke be ijie tumota aisuja embo amite tapa avo God na kito embo javotoho ke aisuja.