Read Orokaiva 2 Corinthians 4 Bible Online

2 Corinthians 4 - Orokaiva bible

2 Corinthians 4

¹Eto God na amita jo ari na Keriso ta ke hande ara pure ikena avoeto jo segigi ae pure sovera eto eora.

²Eto enana ke sokova ate poekari embomeni ainge mane nango God ta ke ondikari na hande mane eora te God ta ke popoja na ae rate araha ta God ta titi ta hande uore hotembari embopo na ingito ke be eora.

³Eto God ta ke amo embo tapa ta degi ondikae rate enana Ahihi amburari degi ta ere pahora amita degi amo ondikarira

⁴amita be amo God ke be ae embomeni na Keriso amo God ta ari eto hajire vahai amita ke javotoho usasa te avo mane kiora enda emita titi jigari embo sapura na enana ta titi ta kaetei kuru etija.

⁵Eto ke hande ere ora amo ke nangota mane rate Iesu Keriso amo ungotenau Bada eto titi jigari embo eto nango amo Iesu avoembo ungota undurari embopo ra amita ke avo hande ere ora.

⁶Eto iji itikarita God na mume ta degi “Usasa e” ijinu usasa ena eto God na vahai nangota uta avo usasa amita na hirikenu kia amo God ta usasa Keriso ta tombu ta gain ena avo kia.

⁷Eto ari javotoho be usasa te God na ikena amo ungotenau sari ari hamo ta mitia avoeto ungotena ere kogora amo usasa javotoho emo nango na ae puvurae rate God na hande iketija.

⁸Eto degi tapa ta kitoho mitia amina nango nembari inono ae eto osaga isapamane ere kogora te toae.

⁹Eto embomeni na teore memenga kiora te God na nango toto pambae eto teore enda ta beora te nango amburae.

¹⁰Eto degi nainge pambuora amo nango ta sari ari hamo na Iesu ta osaga te memenga te amina ate kitira ere ora, amo nangota hamo avo embomeni na kogue Iesu ta vasiri avo hotembeora.

¹¹Eto ke be amo nango amburae mitie Iesu ta pure ere ora avoeto nangota amburari amo iji matuainge puvutuhoi hotembeora, eto nangota vasiri aita amo embomeni na Iesu ta vasiri kiora.

¹²Eto ke erena amo nango amburesi era pahora te ungona dagota pure avoembo vasiri te daroho iresova.

¹³Eto God ta ke ta amo ke einge kajari mitia “Na ke be erena avoeto ke hande ere ona” ke ainge mitia avoeto amita ari vahai amo nango na eora avoeto ke be ijie God ta ke amo embo ta degi hande ere ora.

¹⁴Eto nango kogora amo Iesu jiginu vasiri te erena embo God na iji inono ta nango Iesu ga tapa jigou vasiri te eritiroro ungote tapa umbuto Iesu ta engitita ikau hetasora.

¹⁵Eto ungo kogova amo osaga memenga ere kogora amo ungo avoembo ere kogora amo aita God ta hondate ari isapamane na embo ta degi pahurou embo isapamane na God osa ue jakeka ijiroro usasa God ta degi pambasuja. Enda ta Utu ta irari amita ke

¹⁶Eto ari ainge avo nango joru ue pure mane toasora. Eto dagota hamo amo sari asi ere pahua te jo ta amo iji vahai vahai ainge God ta degi sovera mine ere uhora.

¹⁷Eto dago enda eita mitie osaga isapa ere kogora amo usasa pajire be daroho ta kesora ainge mane isapa be ra

¹⁸avoeto dago na enda ta sari ari donda titi na kiari haite amo kon eto kiae rate titi na kiae donda daroho iriuja avo kon eto kogue eteteto ere pahora.