Read Orokaiva 2 Corinthians 5 Bible Online

2 Corinthians 5 - Orokaiva bible

2 Corinthians 5

¹Eto ungotena ere kogora amo ungotenau hamo te bisi te amo iji tuho irari donda pure horoma aingeko avo irae au God na ungotenau irari bande nei embo ta ingeni na ae teho irerembari Utu i ta iriuja avo ikau umbuto daroho iresora.

²Eto ungotena enda ei ta mitie amo Utu ta irari donda avo umbuto asukasi uje ue bija puri ue simba ue mitera.

³Eto ungotenau hamo te bisi te irae ahihi pere na mitiroro amo Keriso na tambaute avo ungotena joru ere ora

⁴avoeto ungotena enda ta iji tuho irari hamo ga mitie avo houkari uje ae ue bija puri eora te naingeto daroho irari donda umbuto hamo ta asukaetera avo hotembeora, amo hamo bisi te amiga tapa Utu ta pambuto iresi uje ere ora.

⁵Rate ari ainge ara God na ungotena ove ena amo daroho irari hamo ikau umbasi simba ue mitera amo God na ikasi onde ena amita hajire amo ungotenau jo ta Ahihi Otohu ikena iriuja.

⁶Avoeto ungotena Bada ta irari degi ta irae enda ta hamo te bisi te ga irari iji te Ahihi Otohu avoembo sovera ari umbuto mitie

⁷teho titi na kiari avo ae rate God tumota ari na iriora.

⁸Eto enda eita mitie ungotenau ando te bisi te avo toto pambuto ungotenau da be Bada ta degi pambuto iresi uje eora te ando ta sovera ari umbuto mitera

⁹Eto ungotena tapa na iji tutumota pambuto Bada ta titi ta heteto mitiroro amina ungotenau ari tapa penite isapate enda ta mitie ere uaetera avo siriketo hajire javotoho te sapura te ikau kesora avo eto ari avo hotembitie, ungotenau ando iroutemo irae au amo ke peni be mane rate nombo be amo ari deina ururoro Bada na kito osa aisuja ari avo perekari eora. God ga peka umbuora amita ke.

¹¹Eto Bada joru eora avoeto embomeni na ke ingito jo haperekarote avoeto enana ta degi Keriso ta ke hande eora. Eto dagota jo amo God na ere kogua te ungote tapa nangota jo kiova uje ereona.

¹²Eto ke erevi erera amo ungona nango ke be ava ke ae rate enana ungo eonga embo peni ke ijie embota jo avo hotembae ue ate poekari sokova embomeni amita degi ke mine ava erera, amo nangota ari be avo ungona kito tunga javotoho ue ke mine enana ta degi aisova.

¹³Eto nangota ke erevi eteketo kogue dago uta sapura ari ke ijie ere hotembiteva te God avoembo ere ora te nangota ke amo ke be ere hotembiteva amo ungoembo ere ora.

¹⁴Eto Keriso ta osa ari peni vahai avo hotembitie haha puha eora. Eto osa ari aita ere kogora amo embo vahai na embo tapa avoembo ambuna te amburae toaetija amo embo tapa na ambuvujekaetera.

¹⁵Eto amina embo tapa avoembo ambuna avoeto embo na enda ta vasiri te irari iji te enana ta hamo ta ujeje neite neite avoembo mane iresora te embo enana embo ambuto vasiri te erena amita uje avo asi iresora.

¹⁶Avoeto iji eha eto ambota amo nango na enda ta hotembari na embo ari javotoho te sapura te avo mane sirikasora. Eto dagona Keriso enda ta mitinu amiga isa ue enda ta hotembari avo ere uaetera te eha emikote ari ainge avo iraera

¹⁷te embo amuna Keriso ta jo ta mitia amo ove eha ari ra te embo kiti enda ta vasiri na ari amo irae etei ove eha ari avo pere mitia.

¹⁸Eto ari amo God na euja amo matu kitita ungotena amita kitoho rate Iesu Keriso ta amburari na peka umbuto peka umbari ta ke amo nangona hande ara ikena.

¹⁹Eto ke erena amita be amo God na Iesu Keriso ta pure amina enda embomeni tapa ta degi peka umbuto enana ta ari sasapura avoeto kitoho ari ehako mane hotembasuja, eto duru javotoho erevi nangona hande ara ikena.

²⁰Avoeto nango Keriso ta ke hande ari embopora, amo God na pe nangota na embomeni ta degi ke eria avoeto Keriso ta javota erera amo ungo God ga peka umbuvujo.

²¹Eto God na ari sapura irae embo Keriso ta degi embomeni ta ari sasapura tapa overekena avoeto ungotena amita jo ta mitera avoeto God na Keriso ta ari jajavotoho perekari avo ere kogua.