Read Orokaiva Galatians 5 Bible Online

Galatians 5 - Orokaiva bible

Galatians 5

¹Eto ungotena tambuta pambara Keriso na ungotenau ari sasapura bujekena avoeto ungo eonga ke pepeni neite neite amina mane punduresova

²Paul, nane ke ano ingivujo, eto ungo na aravora avo hamo ungota jeto kakamba asora amo Keriso na ungo mane hondate aisuja

³avoeto ehako ano ingivujo. Eto ungo vahai amuna aravora au hamo kakamba aisora amina God ta ke pepeni Moses ta degi ikenu kajena tapa avo inono ta simba aisuja

⁴avoeto ungo amuna God ta ke pepeni agi ari amina God ta titi ta embo javotoho asi hotembasuja embo amo Keriso tumota ari matu egikari avoeto Keriso ta hondate ari umbae ue God ta titi ta amo embo javotoho manera

⁵te ungotena ke be eora amo Keriso tumota ururoro God ta Ahihi Otohu na amita sovera na eoi God ta titi ta embo jajavotoho ere ora

⁶avoeto ungote Iesu Keriso ta jo ta iresora amo hamo kakamba ari rete hamo kakamba ae re amo ke peni mane rate ke nombo be amo embo na Keriso tumota ue embomeni osa ue iresora.

⁷Eto ungona Keriso tumota ari na pajirari javotoho be ove kogana te embo amuna ungota jo kaetei God ta ke ambo ambo ari totove?

⁸Amo God ungo jage eto umbari embo amina aera

⁹te ke sokova isapa be amina pajito embo ta jo eneteuja.

¹⁰Rate ungote namote Bada ta jo ta mitera avoeto na kogona amo ungona ke nau mane egiketo embo nei ta ke ta tutuvasova. Eto ungota degi ke sokova tirari embo amunure, na kiae rate amo God na au hajire kesuja.

¹¹Eto nau namei kamei, na kogona amo embomeni amina Keriso ta embomeni ta ari sasapura orekasi i atahu ta ambuna avo ke be ae eora te Keriso na embo orekaeuja amita ke avo nane mane toasona te ke avo toto hamo kakamba ara ate poekaetena amo enana ke sokova tirari embopo na nau degi ta osaga memenga mane ikaro kiaetena.

¹²Eto nau uje amo enana ungo hamo kakamba eto memenga sio kiova ate poekari embopo na asivo umbuto ungo oenga jorembeto bau te tapa tiukitie memenga kiaetera.

¹³Rate ungo nau namei kamei amo ungo Moses ta ke pepeni na mane andiroja God na jage eto umbuna te ke pepeni na andirae ururou hamo ta uje sasapura mane aisova te osa ari na hondate mine ara evujo.

¹⁴Amo eingera. God ta ke pepeni Moses ta ikenu kajena amo ke neite neite rate tapa amita ke susu amo “umo eonga osa ere oa ainge nombo namei osa ejo”.

¹⁵Eto ungona isoro o na arako mine kambara ue isoro aisova amo ari amita tutumota amo ungo sasari eto irae aisova avoeto be kogue irivujo. Ahihi ta vasiri eto hamo ta vasiri.

¹⁶Eto ke erena amo ungota hamo ta uje sasapura ta mane tutuvasova te God ta Ahihi Otohu na ungo titi jigoja simba evujo.

¹⁷Eto ungotenau hamo ta uje amina God ta Ahihi Otohu ta degi isoro ururou Ahihi Otohu na ungotenau hamo ta ujeje ta degi isoro euja. Eto enana heriso amo kitoho avoeto Ahihi Otohu na umo titi jigihirou uje no sasapura avo mane aisoa

¹⁸te Ahihi Otohu ta ke ambo ambo ue God ta ke pepeni amita simba ari ngahia mane hotembu hotembu ue iresoa.

¹⁹Eto enda embomeni ta uje sasapura deire amo ungotena kiarira amo tiha paiha te oine sasapura uje ari te ari sasapura isapamane deina eoi jo tongopa euja

²⁰amite eto ingeni na ove eto God ke ijie jakeka ue saruka neite neite eora, eto embomeni na kateke kateke eto kitoho ue embo nei ta donda kito uje isapamane ue naingeto umbasora avo hotembitie tumo eto isoro mine ara eora.

²¹Eto hamo enana ta pere hotembitie umo peni vahai indito kava ue ke sokova eora. Eto ke matu eona avo ehako erena amo embomeni amuna ari ainge eora amina God ta titi jigari ta toreto hotari mane umbasora.

²²Rate ahihi na embo ta jo ta pure au be aisuja amo erevira amo tunga humbari, osa osa ari, pekari, embo tumo ae ue iji koso simba ari, tunga jamo jamo ari na embo simba ari, hondate ari, ari javotoho ari, tumota ari haite

²³meni isapa ke ijie tumo mane asuja eto hamo ta ujeje kikira aisuja. Eto ari kaetera emina God ta ke pepeni poekari iraera.

²⁴Eto Iesu Keriso ta embomeni toho amina enanata hamo ta ujeje sasapura neite neite avo umbuto Keriso ta i atahu ta teo irae ena

²⁵avoeto Ahihi Otohu ungotenau vasiri ikari embo amo ungotenau degi ta mitia avoeto amina ungotena titi jigoja aisora.

²⁶Eto ungotena oenga ‘na na’ ijie jo mine kaja mane aisora eto embo nei ta donda te ari te avo kito uje ue tumo mane aisora.