Read Orokaiva Ephesians 1 Bible Online

Ephesians 1 - Orokaiva bible

Ephesians 1

¹Na Paul, Iesu Keriso ta apostero ana God na umbuna nanena ungo Iesu Keriso tumota ue amita jo ta miteva embomeni ungota degi ahari erevi ere kaitena.

²Eto God mamo te Bada Iesu Keriso te ta hondate ari te peka te ungota degi iroi. Javotoho ari Keriso ta degi umbuora.

³Eto ungotena Keriso ga kajueto vahai etera avoeto God na Utu ta javotoho ari tapa ungotenau degi ta hande euja avoeto ungotenau Bada Iesu Keriso ta Mama God osa ue jakeka are.

⁴Eto God na enda ove ae pekota ungotena osa ue amita Meni ga kajueto amita titi ta embo sasapura irae ototohu ara siriketo umbuna.

⁵Eto God na Iesu Keriso ta pure amina ungotena amita meniundi be ara jo tapa na ungotena umbasi uje ena avoeto itikari ta nununga ena.

⁶Eto God na ungotena hondate pajire be eto amita osa ari Meni avo ungotenau degi ta hande ikena avoeto ungote God jakeka are.

⁷Eto ungotenau degi ta hande pajire be overekena amo Keriso ta sasaga amina ungotenau ari sasapura ombuto uhue ungotena orekitie ari sasapura tapa hotembeto tona.

⁹Eto God na amita kiari pajire be amina Keriso na ari do aisuja amo matu ondikari mitiaetija te ungotenau degi ta hariketo tambu ena.

¹⁰Eto ke ai ta amo God na iji inono ta donda tapa amita ingeni na ena utu ta eto enda ta avo umbuto ikau enda vahai ari vahai eto irirou Keriso umbuto ikau heteto titi jigesuja.

¹¹Eto God na amita hotembari mane toasuja te aisuja avoeto God na uje amita avo itikari ta sirikena amo ungotena Keriso ga kajueto God ta toho ara iji itikari ta sirikena

¹²avoeto nango Keriso puvuroja kiti simba ere uaetera embomeni na God jakeka erera.

¹³Eto eha emo ungo tapa na God ta duru javotoho ingito Keriso ke be ere oreketo umbei amita embomeni eteva. Eto ungo God ta toho avo embomeni kiora hajire ikena amo amita Ahihi Otohu ikasi onde ena avo iketei ungota jo ta mitia.

¹⁴Eto Ahihi Otohu ungotenau degi mitia avoeto ungotena ke be erera amo amita hotari ungotenau degi ikasi onde ena avo amite tapa ikau umbasora. Avoeto ungotena God ta embomeni avo ari sasapura na andirae teho iresora avoeto ungotena God jakeka ijiroro amita degi usasa puvuroi. Paul na enana avoembo pari ena.

¹⁵Eto ke be avoeto ungo Bada Iesu tumota ue God ta embomeni osa ere ova ke avo nane ingito God ta degi osa ue

¹⁶ungo embo pari kaiketo ijirono

¹⁷Bada Iesu Keriso ta Mamo God usasa te na ungota degi Ahihi amita ikau God ta vasiri tapa harikitirou kiova penunu erena.

¹⁸Eto ungo God na siriketo umbuna embomeni ta uta hirikau God ta usasa kogue Utu i ta irari javotoho God na ikau umbasi simba miteva amo do aingere avo be kiova pari erena. Eto javotoho ari God na amita embomeni ta degi ikeuja amite

¹⁹eto God ta sovera ungotena God ke be ari embomeni ta jo ta pure ere ua amite tapa ungo be kiova pari erena. Eto God ta sovera ungotenau jo ta pure ere ua sovera amina

²⁰Keriso amburari ta jiginu erenu umbuto Utu i ta ingeni be ta ikenu arumbeto mitie

²¹titi jigirikari embopo tapa Utu ta eto enda ta amita siro ta titi jigihe mitia. Eto amita javo amo pajire be ra enda eha mitia ambota puvuresuja amita javo neite neite ainge manera.

²²Eto God na donda tapa be tapa umbuto Keriso na simba aja sovera iketo amita ekalesia ta titi jigari embo peni aja ikena.

²³Eto ungotena God ta ekalesia amo Keriso ta hamora. Amita be amo Keriso donda tapa ari embo na ungotenau jo ta mitie eneteuja ainge nombo donda tapa ena amita jo ta iriuja.