Read Orokaiva Colossians 3 Bible Online

Colossians 3 - Orokaiva bible

Colossians 3

¹Rate ungo amo God ta titi ta Keriso ga tapa vasiri te erari embopo avoeto ungota hotembari jo tapa na utu i ta ari avo be hotembevujo. Ai ta amo Keriso na God Mamo ta avo arumba peni amita ingeni be hena ta arumbeto mitia.

²Avoeto enda ta ari toto ungota hotembari na degi amita ari avo eteteto hotembevujo.

³Eto ungo Keriso ga amburari embopo rate ungota vasiri be amo Keriso, God ta degi mitia amita jota nununga ari mitia.

⁴Eto Keriso amo ungota irari be avoeto Keriso egerembeto puvurou amo ungo amite tapa usasa javotoho be ai ta puvuresova. Irari matu eto irari eha amita ke

⁵Eto enda ta ujeje sasapura ungota hamota mitia avo tevujo amburore, eto ari amo erevira tiha paiha oine sasapura neite neite ue ino na arako uje ue ari sasapura neite neite ue donda umbasi ue tunga ta hotembeova (amo donda rate embo ta God euja.)

⁶Eto ainge eora embomeni amo God ta ke agi ae avoeto God na tumo peni vahai be aisuja.

⁷Eto ari ainge amina ungo titi jigihoi ere uaeteva

⁸Te ari ainge amo eha oroho emikote tovujo irae ai. Eto ke amo tumo te tini kambari te embo nei uje ae ari te urumbari te ke sasapura masa te amo ungota pe ta eto ivivi ta mane puvuresuja.

⁹Eto ungo na ke sokova mine ara mane aisova te ari tapa matu hamo ari avo toto ari eha eto hamo eha asuketo miteva amo no hamo eha ari embo God amina no jota pure ururou ungo amita tombu hajire vahai ue amita ari be kesova.

¹¹Eto ari amita heta amo enda nei embo rete Judea embo rete hamo kakamba umbari embo eto hamo kakamba umbae embo rete ke nei ari embo rete kiari kiae embo rete tapa amo Keriso ta titi ta amina titi jigihoi amita jota iriora.

¹²Eto ungo amo God ta embomeni avoeto God na osa ue amita toho ava siriketo umbuna avoeto ungona ari erevi amo hambo turarako evujo. Eto hamo ta turasova amo jo ari, hondate ari, meni isapa sira ari, sasaimbari, embo osa vesa ari,

¹³Eto ari ainge avo tureto ue tapa amita hamota amo osa ari amina tatapeketo umbasuja. Eto embo osa vesa ari amo erevira, embo amuna no degi ta tumo ue ke au ingito amo hotembeto tojo eto Bada na ari no hotembeto touja ainge nombo hotembeto toari mine ara evujo.

¹⁵Eto God na ungo tapa toreketo umbei hamo vahai ere ova avoeto Keriso ta peka na ungota jo simba aja ue God osa evujo.

¹⁶Eto Keriso ta ke javotoho neite neite ari amina ungota jota iroja umbuvujo. Eto kiari javotoho amina onde katari mine ara evujo. Eto God ta ke ta ‘psalms’ kajari mitia amite eto ekalesia ta haveni ototohu kajari mitia amite na God ta degi haveni ijie jo tapa na osa osa evujo.

¹⁷Eto ungo ari do asova eto ke do aisova amo Bada Iesu ta javota eto amita Mamo God osa evujo. Ekalesia ta irari amita ke

¹⁸Eto ungo pamone tapa ta degi ke erena amo ungo Bada avoeto ipone ta ke agi evujo.

¹⁹Eto ungo ipone na airi ta degi ngahia mane aisova te osa evujo

²⁰Eto ungo meniundi na Bada ta ari be avo ue ungota emone mamone ta ke avo iji tapa agi evujo.

²¹Eto ungo emone mamone na meniundi isembeove pure peive eora avoeto isembari isapamane avo tovujo.

²²Eto ungo embo nei ta ke agi ue pure ari embomeni na ungota pure titi jigari embopo ta ke tapa avo agi evujo. Eto ungota pure simba ari embo mitie ungota pure kogue osa aja mane aisova te iji tapa pure ue Bada osa eova avoeto evujo.

²³Eto ungo pure tapa do aisova amo embo avoembo ae rate Bada avoembo pure ere ona ke ainge ijie jo tapa na pure evujo.

²⁴Eto ungo erevi be hotembevujo, ungota pure titi jigari embo be amo Keriso eto amita embomeni na hoteto umbasora donda amo ungona umbasova.

²⁵Eto God na embo tapa amo teka vahai ta ari sirikitie ari sasapura ari embo tapa ta hajire amo amina ikau kesora.