Read Orokaiva 1 Thessalonians 5 Bible Online

1 Thessalonians 5 - Orokaiva bible

1 Thessalonians 5

¹Eto nangota namei kamei ari erevi iji deina puvurou kesora amita ke amo ungota degi ahari ta mane kajasora.

²Ungo matu kiova amo Bada ta puvurari iji kombu te amo pegene embo mume jo ta puvuja ainge nombo puvuresuja.

³Eto embomeni na “Eha amo iji javotoho peka ta mitera,” ainge ijiroro ari sasapura ta isoro peni sau be puvuresuja amo pamone na meni umbasi ue hamo memenga titimbeuja ainge nombo puvurou kogue oju tiumbeto pambuto ondikari degi avo irae be ra.

⁴Rate nau namei kamei, ungo mume ta irari embomeni mane rate iji ta eto usasa ta meniundi avoeto iji kombu na ungota degi pegene embo na puvuja ainge nombo mane puvuresuja.

⁵Ungotena mume ta toho mane avoeto embo nei na evuora ainge avojo,

⁶rate ereto titi kundeto kogue irivujo.

⁷Eto embomeni evuora amo mumete evuora, eto umo indiore titivi euja amo mumete euja

⁸te ungotena iji embopo avoeto siro jigama ue hotembari javotoho ue isoro embo na beha ingeni na peiketo jigiuja ainge nombo tumota ari osa ari avo be jigesora, eto God na ungotenau ari sasapura oreketo umbasuja amo ungotenau siro orekari kope mitia avo hotembeto tunga javotoho aisora.

⁹Eto God na ungotena orekasuja ke amita be amo ungotena avo God na ungotenau ari sasapura avoeto amita tumo kiora ijie umbae rate Bada Iesu Keriso na ungotenau ari sasapura oreketo umbau amita toho ara umbuna

¹⁰avo eto ungotena teho irorote mo ambuto iroro Iesu puvurou amiga vahaita daroho iresora avoeto ambuna.

¹¹Avoeto ungo ere ova ainge pere ue ke javotoho mine ara ijie osa kageni ue sovera ari umbuvujo. Onde katari te pekari te ta ke.

¹²Eto dagota namei kamei ungota degi ke erevi erera amo Bada ta javo ta pure ere ora embo ungote mitie onde ere katitera embo avo pepeni ke ijie osa evujo enana ta pure avoeto. Eto tini kambari avo, teho peka ta irivujo.

¹⁴Eto dagota namei kamei, ke erevi ava erera amo kupi pegogo embomeni avo onde katevujo, eto sovera ae ere ora avo hondate evujo, eto jopapa ere ora avo ke avo ando ngahia ururou embomeni amita degi tumo sausau mane aisova.

¹⁵Eto embo na ari sapura ungota degi au kito mine ungo na amita degi ari sapura mine avojo, eto iji tapa ari javotoho embo tapa ta degi mine ara evujo.

¹⁶Eto iji tapa tunga javotoho ue iji tapa pari evujo.

¹⁸Eto iji nei javotoho puvurou amo osa evujo eto iji nei sapura puvurou kito amo God osa evujo amo ungo Iesu Keriso ta toho na ainge ava God na uje ere ua.

¹⁹Eto God ta ahihi otohu na ungota jo ta i evekarako ere ua avo seikavojo.

²⁰Eto embo na ke emo God ta ke ra ainge ijie au ingito sokova ke mane asova

²¹te ke tapa avo eto kito ke be davore sokova davore avo kito ke be avo jigama ue

²²ke sokova nei te nei te tapa tovujo.

²³Eto pari ta erera amo God, peka ikari embo amina au ungota jo tongopa irae au ungo otohu aisova. Eto God na au ungota ahihi te hamo te hotembari jo te tapa javotoho au pehumba ari inono ae ururovo Bada Iesu Keriso puvuresuja.

²⁴Eto ungo siriketo amita toho ava umbuna embo amo tumota ari haite avoeto erena amo aisuja.

²⁵Eto dagota namei kamei, dago avoembo pari evujo.

²⁶Eto namei kamei tapa avo mune tavo ue pekevujo.

²⁷Eto Bada ta javo ta erena, ekalesia namei kamei tapa ta degi ahari erevi etekevu ingore.

²⁸Aravora, ungotenau Bada Iesu keriso ta hondate ari avo ungota degi iresuja.