Read Orokaiva Titus 1 Bible Online

Titus 1 - Orokaiva bible

Titus 1

¹Na Paul, God ta ke agi ari embo eto God na siriketo umbari embomeni amina God tumota be ue amita ke be avo be kogue God ta ari javotoho avo be jigama ara na Iesu Keriso ta apostel nane ke hande ere ona

²Amo ungotenau irari daroho avo umbasi ue God ta ke be avo tumota ara eona. Eto irari daroho avo God ke sokova embo mane ke be ari embo amina enda ae kiti ta embo ta degi ikasi ke ena

³Amo amita iji inono ta embo na amita ke be avo kiora ungotenau orekari embo God amita ke avo nanena hande ana ikena.

⁴Na Paul ungotena God ta ke tumota eora avoeto Titus umo nau meni avoeto no degi ta ahari erevi ere kaitona. Eto God Mamo te Iesu Keriso ungotenau orekari embo amita hondate ari te peka te no degi ta iroi. Titus na pure erevi aja enda Crete ta Paul na ikena

⁵Eto umo enda Crete ta toto puvuritana amo pure tuna toturitana avo inena ae umo toto puvuritana. Eto ke no degi ta ijiena ainge nombo da vahai vahai ta ekalesia titi jigari embo avo inena siriketo umbujo.

⁶Eto titi jigari amo ari eingeko avo umbujo. Eto ari javotoho ari embo pamone vahai jimbari amita meniundi God ke be ijie e mamo ta ke agi ue isa sio sao mane eora embo ainge avo umbujo.

⁷Eto pure erena amo nei mane God ta pure avoeto ari jajavotoho euja embo amina aisuja, eto keniga embo eto tumo embo, wine indito titivi ari embo, sausau ereto embo isembari embo, ke sokova ijie ombuora embo amina mane aisuja

⁸te embo undurari embo, ari javotoho osa ari embo, hotembari javotoho hotembeto ari embo ari javotoho ari embo otohu embo amita hotembari sasapura uje sasapura toari beari embo

⁹amina titi jigihe ke tapa do ate poekitara avo inono ta jigama ue hande ururou embo nei nei na sovera ari uhuroro embo nei ta ke sokova amo tau iraesuja.

¹⁰Eto ke sokova ari embopo ainge amo mitera amina God ta ke be ingito ingaesira ue ke sokova na embomeni umbuto ari neite neite amina kiti umbuto ere pahora.

¹¹Eto Judea embomeni na hamo kakamba eto God ta toho ara ke sokova na ijie ate poekitiore embo javo vahai amo kateketo eonga pamba eora avoeto enana ta ate poekari sapura avo taekejo, amo osa ue koro umbasi ere ora.

¹²Eto ke sokova ainge ere ora amo enana da Crete embo vahai ungota peroveta vahai amina hariketo ke einge ena, “Eto Crete embomeni amo ke sokova hihi tirari isoro ngahia ari kupi ue okope undurari embomeni ra”

¹³ke ainge ena amo ke be avoeto enana ta ari avo ngahia na taekejo God ta ke be avo tumota ue

¹⁴Judea ta hihi sokova amite ari neite neite avo ke be ae ari embopo na ara eora avo toare

¹⁵Eto otohu embo ta degi donda tapa amo otohura te God ke be ae ari sapura ari embopo ta degi donda tapa amo otohu manera. Eto ke be amo enana ta hotembari te jo te tapa amo sapura ari ra.

¹⁶Eto enana na God ke be eona ainge eora te God ke be ari embopo na enana ta ari na harikeoi kiora amo enana God ke be ae embopo ra. Eto enana God ta ke agi ae ari sasapura embopo amina ari nei javotoho ari inono aera.