Read Oshindonga-Ombiimbeli Ondjapuki GENESIS 11 Bible Online

GENESIS 11 - Oshindonga-Ombiimbeli Ondjapuki bible

GENESIS 11

¹Petameko aantu yomuuyuni auhe oya li haa popi elaka limwe alike, niipopya oya faathana.

²Sho ye ende nevi muuzilo, oye ya kolushandja muBabilonia e taa tula mo.

³Oya lombwelathana ya ti: “Ileni! Tu tholomeni oondhopi noku dhi yotha.” Oya tholoma oondhopi dhokutunga noya longitha onka yomevi yoku dhi kwatela kumwe.

⁴Oya popi ya ti: “Natu umbeni oshilando shi na oshungo ya tsa megulu, opo tu iningile edhina lya simana tse twaa halakane nevi alihe.”

⁵Nena Omuwa okwa kuluka, a tale oshilando noshungo ndjoka aantu taye yi tungu,

⁶e ta ti: “Ngashingeyi aantu mbaka oyo oshigwana shimwe notaa popi elaka limwe; ndika olyo etameko lyowala lyaashoka taa ka ninga. Otaa ka tsakanitha mbala shoka ye shi hala!

⁷Natu kulukeni nokuvundakanitha elaka lyawo, opo yaa uvathane.”

⁸Omuwa okwe ya halakanithile nombanda yevi alihe, e taa etha okutunga oshilando.

⁹Oshilando osha lukwa Babel, molwashoka Omuwa okwa vundakanitha elaka lyaantu ayehe, nopokuza mpoka okwe ya halakanithile kombanda yevi alihe.

¹⁰Mpaka ope na oluvalo lwaSem. Omimvo mbali konima yeyelu, Sem sho a li e na omimvo 100, okwa vala omumati edhina lye Arpakshad.

¹¹Okuza mpoka okwa kala natango nomwenyo omimvo 500 nokwa vala aanona yalwe.

¹²Arpakshad sho a gwanitha omimvo 35, okwa vala Shela.

¹³Konima yokuvalwa kwaShela, Arpakshad okwa kala nomwenyo omimvo 403 nokwa vala aanona yalwe.

¹⁴Shela sho a gwanitha omimvo 30, okwa vala omumati edhina lye Eber.

¹⁵Konima yokuvalwa kwaEber, Shela okwa kala nomwenyo omimvo 403 nokwa vala aanona yalwe.

¹⁶Eber sho a gwanitha omimvo 34, okwa vala omumati Peleg.

¹⁷Konima yokuvalwa kwaPeleg, Eber okwa kala nomwenyo omimvo 430 nokwa vala aanona yalwe.

¹⁸Peleg sho a gwanitha omimvo 30, okwa vala omumati Reu.

¹⁹Konima yokuvalwa kwaReu, Peleg okwa kala nomwenyo omimvo 209 nokwa vala aanona yalwe.

²⁰Reu sho a gwanitha omimvo 32, okwa vala omumati Serug.

²¹Konima yokuvalwa kwaSerug, Reu okwa kala nomwenyo omimvo 207 nokwa vala aanona yalwe.

²²Serug sho a gwanitha omimvo 30, okwa vala omumati Nahor.

²³Konima yokuvalwa kwaNahor, Serug okwa kala nomwenyo omimvo 200 nokwa vala aanona yalwe.

²⁴Nahor sho a gwanitha omimvo 29, okwa vala omumati Tera.

²⁵Konima yokuvalwa kwaTera, Nahor okwa kala nomwenyo omimvo 119 nokwa vala aanona yalwe.

²⁶Tera sho a gwanitha omimvo 70, okwa vala Abram, Nahor naHaran.

²⁷Nduka oluvalo lwaTera, he yaAbram, Nahor naHaran. Haran ohe yaLot.

²⁸Haran okwa sile muUr shaBabilonia, moshilando moka a valelwa, manga he Tera e na natango omwenyo.

²⁹Abram okwa hokana Sarai, naNahor okwa hokana Milka yaHaran. Haran ohe yaJiska.

³⁰Sarai okwa li ihaa vala.

³¹Tera okwa kutha omwana Abram, omutekulu Lot yaHaran noshitenya she Sarai, omukadhi gwaAbram. Okwa yi nayo ya zi muUr shaBabilonia, ya ye kevi lyaKaanan. Oya yi sigo okuHaran e taa tula hoka.

³²Tera okwa sile nkoka, sho a li nomimvo 205.