Read Oshindonga-Ombiimbeli Ondjapuki GENESIS 13 Bible Online

GENESIS 13 - Oshindonga-Ombiimbeli Ondjapuki bible

GENESIS 13

¹Abram okwa zi muEgipiti e ta yi kuumbugantu waKaanan pamwe nomukadhi neliko lye alihe. Lot wo okwa yi naye.

²Abram okwa li omuyamba unene e na oonzi, iikombo noongombe, osho wo oshisiliveli noshingoli.

³Abram okwa zi ko nkoka e ta kala ta tembukatembuka u uka lwokuBetel. Okwe ya pehala li li pokati kaBetel naAi, mpoka a yungilile nale oontanda

⁴nokwa li a tungile po oshiyambelo. Opo mpoka a simanekele Omuwa.

⁵Lot okwa li wo e na oonzi, iikombo noongombe negumbo lye naapiya.

⁶Omaunapelo oga li inaage ya gwanena, oshoka oya li ye na iimuna oyindji.

⁷Oontamanana odha tukuka pokati kaasita yiimuna yaAbram naasita yiimuna yaLot. (Pethimbo ndyoka Aakaanana nAaperesi oya li moshilongo.)

⁸Nena Abram okwa ti kuLot: “Tse aakwezimo. Inapu kala oontamanana pokati kaasita yandje noyoye.

⁹Natu topokeni nombili. Hogolola ombinga yoshilongo ndjoka wa hala. Ngele to gama kombinga yimwe, ngame ote gama kombinga onkwawo.”

¹⁰Lot okwa tala koombinga noombinga e ta mono ko olusilu lwaJordan aluhe, ondjila ayihe sigo okuZoar. Olwa li lu na omeya ogendji lwa fa oshikunino shOmuwa nenge lwa fa evi lyaEgipiti. (Shika osha ningwa, manga Omuwa inaa hanagula po Sodom naGomorra).

¹¹Lot okwi ihogololele olusilu lwaJordan e ta yi u uka lwokuuzilo. Osho ngaaka aalumentu mbaka yaali ya topoka.

¹²Abram okwa kala mevi lyaKaanan, ihe Lot okwa kala miilando yomolusilu e ta yungu ontanda popepi naSodom.

¹³Aantu yomuSodom oya li aayonaguli noya yono kOmuwa.

¹⁴Lot sho a yi, Omuwa okwa lombwele Abram a ti: “Lengalenga koombinga adhihe okuza mpoka u li.

¹⁵Evi alihe u wete otandi li ku pe pamwe noluvalo lwoye, notali ningi lyoye sigo aluhe.

¹⁶Otandi ke ku pa oluvalo olwindji, notalu nyengana okuyalula ngaashi ontsi yevi.

¹⁷Ngashingeyi shilila evi alihe, oshoka otandi ke li ku pa.”

¹⁸Abram okwa tembudha omatsali ge e te ya, a kale popepi noomwandi oondjapuki dhaMamre puHebron; oko nkoka a tungile ko Omuwa oshiyambelo.