Read Oshindonga-Ombiimbeli Ondjapuki GENESIS 18 Bible Online

GENESIS 18 - Oshindonga-Ombiimbeli Ondjapuki bible

GENESIS 18

¹Omuwa okwi ihololele Abraham moomwandi oondjapuki dhaMamre. Abraham manga a li a kuutumba posheelo shetsali lye omutenya,

²okwa ligamene ko e ta mono aalumentu yatatu ya thikama komeho ge. Sho e ya mono, okwa matuka nziya, e ke ya tsakaneke. Okwi ihata po a tsa oshipala she mevi

³e ta ti: “Omuwa gwandje, ngele wa sile ndje ohenda, ino pitilila ndje po, omuntu gwoye.

⁴Etelweni omeya, mu yoge oompadhi dheni mu vule okugondja momuti nguka.

⁵Otandi ke eta sha shokulya, shi mu koleke, opo mu tsikile ondjila yeni. Osho opala, sho mwe ya maandjetu.” Oyo oya yamukula ya ti: “Ninga, ngaashi wa ti.”

⁶Abraham okwa yi neendelelo metsali e ta ti kuSara: “Kutha mbala uusila womunziya, u ninge iikwiila.”

⁷Opo ihe okwa matukile kiimuna e ta kutha ko ontana yo ondodhwa e te yi pe omupiya, e yi longekidhe mbala.

⁸Okwa kutha omahini gomoosi nogomunya nonyama e ta fala iikulya kaalumentu mbaka. Ye mwene okwa li a thikama puyo momunzile gwomuti, manga taa li.

⁹Oye mu pula ya ti: “Mukadhoye Sara oku li peni?” Abraham okwa yamukula a ti: “Oku li metsali.”

¹⁰Gumwe gwomuyo okwa ti: “Omumvo tagu ya pethimbo ngaandika otandi ka galuka, namukadhoye Sara ota ka kala e na okanona okamati.” Sara okwa li konima ye posheelo shetsali, e ya pulakena.

¹¹Abraham naSara oya li ya kulupilila, naSara okwa li ihii imono we.

¹²Sara okwi iyolele e ta ti: “Sho nda kulupa ngeyi, nomusamane gwandje naye wo okwa kulupilila, moondjokana ote mono mo we omulyo gwasha?”

¹³Omuwa okwa pula Abraham a ti: “Omolwashike Sara a yolo ye ta ti: ‘Ote vulu we ngaa okuvala, sho nda kulupa ngeyi?’

¹⁴Oku na sha tashi nyenge Omuwa? Ngaashi nda ti, omumvo tagu ya pethimbo ngaandika otandi ka galuka notandi adha Sara e na okanona okamati.”

¹⁵Sara sho a li a tila, okwi ipatana a ti: “Inandi yola.” Ihe Omuwa okwa yamukula a ti: “Eeno, owe shi ninga, owa yola.”

¹⁶Aalumentu oya thikama noya yi nondjila ndjoka yu uka kuSodom, naAbraham okwe ya thindikile.

¹⁷Omuwa nokwi ipopile a ti: “Itandi holeke Abraham shoka tandi ka ninga.

¹⁸Oluvalo lwe otalu ka ninga oshigwana oshinene noshinankondo, nomuye otandi ka yambeka iigwana ayihe.

¹⁹Onde mu hogolola, opo a lombwele oyana noluvalo lwe, lu vulike kungame yo ya longe shoka shu uka noshoshili. Nongele taye shi ningi, nena otandi ka gwanitha shoka ndu uvanekele Abraham.”

²⁰Nena Omuwa okwa ti: “Oku na ekugo enene tali kugile aantu yomuSodom naGomorra, nuulunde wawo owa lunda pombanda.

²¹Otandi yi ko ndi ka tale, ekugo ndyoka ndu uvu, ngele olyoshili.”

²²Nena aalumentu yaali oya yi yu uka kuSodom, ihe Abraham okwa kala po a thikama koshipala shOmuwa.

²³Abraham okwa hedha kOmuwa e ta ti: “Oto ka yona po omuyuuki pamwe nomukolokoshi?

²⁴Moshilando ngele omu na aayuuki omilongo ntano, oto shi hanagula po? Ito shi hupitha, opo u hupithe aayuuki mboka omilongo ntano?

²⁵Omuyuuki oto mu dhipagele mumwe nomunandjo? Ito vulu oku shi ninga. Itashi vulika, omuyuuki a yonuke po pamwe nomulunde. Omupanguli guuyuni auhe ita longo ando pauyuuki?”

²⁶Omuwa okwa yamukula a ti: “MuSodom ngele onda adha mo aayuuki omilongo ntano, ote hupitha oshilando ashihe omolwawo.”

²⁷Abraham okwa popi ishewe ta ti: “Ombili, kwatha ndje ngaa, sho tandi tsikile okupopya nOmuwa, nonando ngame omuntu gwowala, ontsi nomutoko.

²⁸Pamwe oto adha mo aayuuki omilongo ne nayatano peha lyomilongo ntano. Oto hanagula po oshilando ashihe, ngele aayuuki inaa adha omilongo ntano?” Omuwa okwa yamukula a ti: “Oshilando itandi shi hanagula po, ngele otandi adha mo aayuuki omilongo ne nayatano.”

²⁹Abraham okwa popi ishewe a ti: “Ngele oye li owala omilongo ne?” Oye nokwa yamukula: “Itandi shi hanagula po, ngele oku na omilongo ne.”

³⁰Abraham okwa ti: “Ombili, ino geya, Omuwa, sho te popi ishewe te ti: Ongiini, ngele oye li omilongo ndatu?” Okwa ti: “Itandi shi ningi, ngele otandi mono mo omilongo ndatu.”

³¹Abraham okwa ti: “Ombili, kwatha ndje, sho tandi tsikile okupopya nOmuwa. Ongiini, ngele omilongo mbali ayeke taa monika mo?” Omuwa okwa ti: “Itandi shi hanagula po, ngele otandi adha mo omilongo mbali.”

³²Abraham okwa ti: “Ombili, Omuwa, ino geya, otandi popi natango lumwe. Ongiini, ngele otamu adhika omulongo?” Okwa ti: “Itandi shi hanagula po, ngele otandi adha mo omulongo.”

³³Omuwa sho a mana okukundathana naAbraham, okwa zi po, naAbraham okwa shuna kegumbo.