Read Oshindonga-Ombiimbeli Ondjapuki GENESIS 25 Bible Online

GENESIS 25 - Oshindonga-Ombiimbeli Ondjapuki bible

GENESIS 25

¹Abraham okwa hokanununa omukulukadhi edhina lye Ketura.

²Ketura okwe mu valele Simran, Jokshan, Medan, Midian, Jishbak naShua.

³Jokshan ohe yaSheba naDedan. Oluvalo lwaDedan olwo Aayashuri, Aaletushi nAaleumi.

⁴Aana yaMidian oyo Efa, Efer, Hanok, Abida naEldaa. Ayehe mbaka oyo oluvalo lwaKetura.

⁵Abraham okwa gandja ayihe kuIsak, ihe manga a li e na omwenyo, okwa pe

⁶oyana mboka ye mu valelwa kaakiintu ye yalwe, omagano. Nena okwa laleke aanona mbano, yu uke kevi lyokuuzilo, kokule nomwana Isak.

⁷Abraham okwa si e na omimvo ethele nomilongo heyali nantano.

⁸Okwa si muukokele uunene nokwa li a kuta omwenyo, sho a gongelwa poohekulu.

⁹Oyana Isak naIsmael oye mu fumvike mekololo lyaMakpela meyana lyOmuheti Efron lyaZohar li li kuuzilo waMamre.

¹⁰Eyana ndyoka Abraham e li landa kAaheti; Abraham nomukadhi ayehe yaali oya fumvikwa mo.

¹¹Konima yeso lyaAbraham Kalunga okwa yambeke Isak, ngoka a li a kala popepi “nOmuthima gwOmunamwenyo e wete ndje.”

¹²Ndjika ondjokonona yaIsmael yaAbraham. Yina oHagar, omudhike Omuegipiti gwaSara.

¹³Oyana aamati yaIsmael okuza kosheeli sigo konkelo oyo mbaka: Nebaiot, Kedar, Adbeel, Mibsam,

¹⁴Mishma, Duma, Massa,

¹⁵Hadad, Tema, Jetur, Nafish naKedema.

¹⁶Oya li oohekulu yomazimo omulongo nagaali, nomadhina gawo oga lukilwa omikunda dhawo nomahala gawo.

¹⁷Ismael okwa si e na omimvo ethele nomilongo ndatu naheyali e ta taambelwa poohekulu.

¹⁸Oluvalo lwaIsmael olwa kala moshilongo pokati kaHavila naShur, kuuzilo waEgipiti mondjila yu uka kuAssur. Olwa kala lu na uutondwe noluvalo lulwe lwaAbraham.

¹⁹Ndika olyo ehokololo lyaIsak yaAbraham.

²⁰Isak okwa li e na omimvo omilongo ne, sho a hokana Rebekka yaBetuel, Omuaramea gwokuPaddan muMesopotamia. Rebekka omumwayina gwaLaban.

²¹Isak okwa galikanene omukadhi Rebekka, oshoka okwa li omuntimbe. Omuwa oku uvu egalikano lye, naRebekka okwa ningi omusimba.

²²Okwa li metegelelo lyaakwaanambwiyu, nomanga aanona inaa valwa, oya kondjithathana mela lyayina. Rebekka okwa ti: “Omolwashike nda adhika kiinima ya tya ngeyi?” Nokwa yi a ka pule eyamukulo kOmuwa.

²³Omuwa okwa ti kuye: “Mela lyoye omu na iigwana iyali. Oto ka vala aantu yaali taa kondjithathana. Gumwe ota ningi omunankondo e vule mukwawo. Omukuluntu ota longele ondenge ye.”

²⁴Ethimbo lyokuvala sho lya thiki, Rebekka okwa vala epaha lyaamati yaali.

²⁵Osheeli osha li shi na olufufu olundjimbi lwa fa lwoshinamwenyo, nosha lukwa Esau.

²⁶Onkelo oya piti mo ya kwata oshithi shaEsau e taye mu luku Jakob. Sho ya valwa, Isak okwa li e na omimvo omilongo hamano.

²⁷Aamati oya koko. Esau okwa ningi omukongo omunene, omulumentu e hole mombuga, ihe Jakob okwa li omumweni e hole pegumbo.

²⁸Isak okwa hokwa Esau, oshoka okwa li e hole okulya onyama yiiyamakuti, ihe Rebekka okwa hokwa Jakob.

²⁹Esiku limwe manga Jakob a li a tula po oshigali, Esau okwa zi kuukongo u ulumbwambwa kondjala.

³⁰Okwa ti kuJakob: “Onde etwa mo kondjala, pe ndje wo moshigali shoye oshitiligane.” (Omolwashoka hi ithanwa Edom.)

³¹Jakob okwa yamukula a ti: “Otandi shi ku pe ashike, ngele oto pe ndje uuthemba woye wuusheeli.”

³²Esau okwa ti: “Eewa! Ngame ote si; uuthemba wuusheeli otau kwatha ndje shike?”

³³Jakob okwa yamukula a ti: “Gana tango kutya oto pe ndje uuthemba woye.” Esau okwa gana e ta pe Jakob uuthemba we wuusheeli.

³⁴Nena Jakob okwe mu pe oshikwiila noshigali. Okwa li ihe ye e ta nu nokwa zi po. Osho ngaaka Esau a dhini uuthemba we wuusheeli.