Read Oshindonga-Ombiimbeli Ondjapuki GENESIS 27 Bible Online

GENESIS 27 - Oshindonga-Ombiimbeli Ondjapuki bible

GENESIS 27

¹Isak okwa li a kulupa, nomeho ge oga tsika. Okwi ithana osheeli she Esau e ta ti kuye: “Mentu gwandje.” Esau okwa ti: “Tate.”

²Isak okwa ti: “Ou wete kutya onda kulupa nondi li pokusa.

³Kutha ano uuta woye niikuti, u ye mokuti u dhipagele ndje oshiyamakuti.

⁴Telekela ndje oondya dha dhoga, ndhoka ndi hole, u dhi etele ndje. Shampa nde dhi li, otandi ke ku yambeka, manga inaandi sa.”

⁵Isak sho a li ta lombwele Esau, ye Rebekka okwa pulakena. Esau sho a yi kuukongo,

⁶Rebekka okwa ti kuJakob: “Ondu uvu naanaa ho sho ta lombwele Esau ta ti:

⁷‘Etela ndje oshiyamakuti, u shi telekele ndje. Shampa nde shi li, otandi ku yambeke montaneho yOmuwa, manga inaandi sa.’

⁸Ano ngashingeyi, mumwandje, pulakena ndje sho te ti.

⁹Inda kiimuna, u kuthe uukombwena uyali wo ondoka, opo ndi teleke iikulya yi holike kuho.

¹⁰Oto yi mu faalele e te ke ku yambeka, manga inaa sa.”

¹¹Ihe Jakob okwa ti kuyina: “Ou shi shi kutya Esau oku na olufufu, manga ngame ndaa lu na.

¹²Pamwe tate ota pampadhala ndje e ta dhimbulula kutya otandi mu kotokele. Pamukalo nguka otandi iyetele etulomutima, hayambeko.”

¹³Yina okwa yamukula: “Etulomutima lyoye nali ye mungame, mumwandje. Ninga owala shoka tandi ti. Inda, u ka talele ndje uukombwena.”

¹⁴Jakob okwa yi e ke u tale, e te u etele yina, yina nokwe u teleke oondya dha dhoga, ndhoka he e dhi hole.

¹⁵Nena okwa kutha oonguwo dhaEsau oombwanawa, ndhoka e dhi pungula megumbo, e te dhi zaleke Jakob.

¹⁶Okwe mu zaleke uupa wiikombo komaako nomothingo ye yaa na olufufu.

¹⁷Okwe mu pe iikulya ya dhoga pamwe noshikwiila shoka a ninga.

¹⁸Nena Jakob okwa yi kuhe e ta ti: “Tate!” He okwa yamukula a ti: “Ee. Ongoye lye, mentu gwandje?”

¹⁹Jakob okwa yamukula a ti: “Osheeli shoye Esau. Onda ningi, ngaashi wa lombwele ndje. Penduka, u lye onyama ndjoka nde yi ku etele, opo u yambeke ndje.”

²⁰Isak okwa ti: “Mentu gwandje, owe endelele ngiini oku shi mona?” Jakob okwa yamukula a ti: “Omuwa, Kalunga koye, okwa kwatha ndje, ndi shi mone.”

²¹Isak okwa ti ku Jakob: “Hedha ko, opo ndi ku pampadhale. Ongoye ngaa shili omumwandje Esau?”

²²Jakob okwa hedha kuhe, ngoka e mu pampadhala e ta ti: “Ewi olyaJakob, ihe iikaha oyaEsau.”

²³Ina dhimbulula Jakob, oshoka omaako ge ga li ge na olufufu ga fa gaEsau. Opo a ale e mu yambeke,

²⁴ihe okwa pula ishewe a ti: “Ongoye ngaa shili Esau?” Jakob okwa yamukula a ti: “Ee.”

²⁵Isak okwa ti: “Etela ndje nduno onyama. Konima nge nde yi li, opo tandi ku yambeke.” Jakob okwe yi mu etele nokwe mu etele nomaviinu wo, a nwe.

²⁶Nena he okwa ti kuye: “Mentu gwandje, hedha ko, u thipe ndje komilungu.”

²⁷Sho a hedha ko oku mu thipa komilungu, Isak okwa nika ko ezimba lyoonguwo dhe, onkee okwe mu yambeke. Okwa ti: “Ezimba ewanawa lyomumwandje olya fa ezimba lyelundu ndyoka lya yambekwa kOmuwa.

²⁸Kalunga ne ku pe oomume dhomegulu nevi lyo ondoka! Ne ku pe eloolo lyiilya nolyomaviinu.

²⁹Iigwana nayi ku longele, naantu naye ku inyongamene. Pangela mokati kaanezimo lyoye, oluvalo lwanyoko nalu ku inyongamene. Oomboka taye ku tula omutima, naa tulwe omutima; naamboka taye ku laleke nuuyamba, naa lalekwe nuuyamba.”

³⁰Isak opo tuu a mana okuyambeka Jakob, naJakob a zi po puye, omumwayina Esau okwa galuka kuukongo.

³¹Naye wo okwa teleke oondya dha dhoga e te dhi fala kuhe. Okwa ti: “Tate, penduka, u lye onyama ndjoka nde yi ku etele, opo u yambeke ndje.”

³²Isak okwa pula a ti: “Ongoye lye?” Esau okwa yamukula: “Ngame osheeli shoye Esau.”

³³Isak okwa tameke okukakama noonkondo e ta pula ta ti: “Olye ano ngwiyaka a dhipaga oshiyamakuti nokwe shi eta kungame? Opo nde shi li, manga inoo ya. Onde mu yambeka nosha pwa tuu ngaaka.”

³⁴Esau sho e shi uvu, okwa takuma mokule e ta ti: “Tate, yambeka ndje wo!”

³⁵Isak okwa yamukula: “Omumwanyoko okwi ile nokwa kotokele ndje. Okwa kutha po eyambeko lyoye.”

³⁶Esau okwa ti: “Nduka olutiyali, sho a kotokele ndje. Itashi kumitha, sho a lukwa Jakob. Okwa kutha ndje uuthemba wandje wuusheeli, nena a kutha po ishewe eyambeko lyandje. Ino thigila ndje po nando eyambeko?”

³⁷Isak okwa yamukula a ti: “Onde mu ningi nokuli omupangeli gwoye, naakwawo ayehe onde ya ningi aapiya ye. Onde mu pa eloolo lyiilya nolyomaviinu. Mentu gwandje, kape na we sho te vulu oku ku ningila.”

³⁸Esau okwa tsikile okuhehela he e ta ti: “Tate, ndele nando eyambeko limwelimwe olyo ngaa kuu na? Yambeka ndje wo, tate!” Ye ota tameke okulila nokuli.

³⁹Nena Isak okwa ti kuye: “Oto kala kokule nevi lyo ondoka nokokule noomume dhokegulu.

⁴⁰Oto hupithwa kegongamwele lyoye. Oto ningi omupiya gwomumwanyoko. Ihe ngele oto pwidhuka, oto ki inaga ondjoko ye.”

⁴¹Esau okwa tondo Jakob, molwashoka he a yambeke Jakob. Okwa dhiladhila: “Omasiku gokulila oosa dhatate oga thikana. Konima otii ka dhipaga omumwameme Jakob.”

⁴²Rebekka sho u uvu edhiladhilo lyaEsau, okwi ithana Jakob e ta ti: “Omumwanyoko Esau okwi iyuvanene, e ku dhipage.

⁴³Ngashingeyi, mumwandje, ninga shoka tandi ti. Inda ontuku kaandjamumwameme Laban kuHaran,

⁴⁴u kale puye manga, sigo ondjahi yomumwanyoko tayi loto

⁴⁵e ta dhimbwa shoka we shi mu ningile. Otandi ke ku tumina elaka, u galukile kegumbo. Omolwashike ndi mu kanithe amuhe yaali esiku limwe?”

⁴⁶Rebekka okwa lombwele Isak a ti: “Omwenyo gwandje ogwa vulithwa kaakiintu mbaka yaEsau aakwiilongo. Jakob ngele ota ka hokana ishewe aakadhona mbaka Aaheti, otandi si owala.”