Read Oshindonga-Ombiimbeli Ondjapuki GENESIS 29 Bible Online

GENESIS 29 - Oshindonga-Ombiimbeli Ondjapuki bible

GENESIS 29

¹Jakob okwa tsikile ondjila ye yokuuzilo.

²Ohaluka okwa thiki pomuthima gu li melundu pu na iigunda yoonzi dha lala. Iigunda mbika oya li hayi hugilwa momuthima nguka gwa siikilwa nemanya edhigu.

³Shampa oonzi dhe ya po adhihe, aasita ohayu undula po emanya e taye dhi hugile. Konima ohaye li shuna po ishewe pehala lyalyo.

⁴Jakob okwa pula aasita a ti: “Yakwetu, ne oyapeni?” Oya yamukula ya ti: “OyokuHaran.”

⁵Okwa pula a ti: “Laban, omutekulu gwaNahor, omu mu shi?” Oya yamukula ya ti: “Eeno, otu mu shi.”

⁶Okwa pula a ti: “Oku li tuu nawa?” Oya yamukula ya ti: “Eeno, oku li nawa. Tala, omwana omukadhona Rakel oye ngwiya te ya e na oonzi dhahe.”

⁷Jakob okwa ti: “Tala, omutenya natango, nokali shi ethimbo lyokukongolola oonzi. Dhi hugileni, dho dhi ye dhi ka nape.”

⁸Oya yamukula ya ti: “Itatu vulu oku shi ninga, manga oonzi adhihe inaadhi gwana po. Opo ihe emanya tali kuthwa po, e tatu dhi hugile.”

⁹Jakob manga ta kundathana nayo, Rakel okwa thiki noonzi.

¹⁰Jakob sho a mono Rakel pamwe noonzi dhahekulu Laban, okwa yi komuthima e ta kutha po emanya e te dhi hugile.

¹¹Nena okwe mu thipi komilungu nokwa lili kenyanyu.

¹²Okwe mu hokololele a ti: “Ngame omunezimo lyaho, omuna gwaRebekka.” Rakel okwa matuka, a ka lombwele he.

¹³Laban sho u uvu omutekulu gwe Jakob, okwa matuka e ke mu tsakaneke. Okwe mu papatele e te mu thipi komilungu e te mu fala megumbo. Jakob sho a hokololele Laban ayihe ya ningwa po,

¹⁴Laban okwa ti: “Eeno, osho naanaa, ngoye onyama nombinzi yandje.” Jakob okwa kala ko omwedhi.

¹⁵Laban okwa lombwele Jakob a ti: “Nando ngoye omukwetu, ku na okulongela ndje owala. Lombwela ndje kutya ondjambi yoye oyashike.”

¹⁶Laban okwa li e na oyana aakadhona yaali. Edhina lyosheeli oLea, nonkelo oRakel.

¹⁷Lea okwa li e na omeho ga nkundipala, ihe Rakel okwa li omwaanawa a shitika.

¹⁸Jakob okwa li e hole Rakel nokwa ti: “Otandi ku longele omimvo heyali, ngele oto zimine ndje, ndi hokane Rakel.”

¹⁹Laban okwa yamukula a ti: “Oku mu ku pa oku vule oku mu gandja komuntu gulwe; kala pungame.”

²⁰Jakob okwa longo omimvo heyali, opo a pewe Rakel, nomimvo ndhoka odha li dha fa kuye omasiku gowala omashona ga piti po, oshoka okwa li e mu hole.

²¹Nena Jakob okwa ti kuLaban: “Ethimbo lya thiki; pe ndje omukiintu gwandje, ndi mu hokane.”

²²Laban okwa hanga ohango e ta hiya ayehe.

²³Ihe uusiku mbwiyaka Jakob a li e na okupewa Rakel, Laban okwa kutha Lea e te mu pe Jakob, naJakob okwa lala naye.

²⁴(Laban okwa gandja omupika gwe omukadhona Silpa, a ninge omudhike gwaLea.)

²⁵Ongula sho kwa shi, Jakob okwa mono kutya nani omuntu oLea. Okwa yi kuLaban e ta ti: “Omolwashike wa ningi ndje ngeyi? Ngame onda longo, ndi pewe Rakel. Omolwashike wa kotokele ndje?”

²⁶Laban okwa yamukula: “Kagu shi omukalo gwoshilongo shetu okugandja omunona a hokanwe tango, manga omukuluntu e li po.

²⁷Tegelela owala, omasiku gohango ga kuke, notandi ke ku pa Rakel, ngele oto ka longela ndje ishewe omimvo omikwawo heyali.”

²⁸Jakob okwa zimine, nomasiku gohango sho ga kuka, Laban okwe mu pe omwana Rakel, a ninge omukadhi.

²⁹(Laban okwa gandja omupika gwe omukadhona Bilha kuRakel, a ninge omudhike gwe.)

³⁰Jakob okwa ka lala ishewe naRakel, nokwa li e mu hole unene e vule Lea. Nena okwa longele Laban omimvo omikwawo heyali.

³¹Omuwa sho a mono kutya Lea ke holike, okwe mu pe oluvalo, ihe Rakel okwa ningi omuntimbe.

³²Lea okwa ningi omusimba e ta vala omumati e ta ti: “Omuwa okwa mono uukweyi wandje, ngashingeyi omusamane gwandje ota kala e hole ndje.” Lea okwa luka omumati Reuben.

³³Okwa ningi omusimba ishewe e ta vala omumati. Okwa ti: “Omuwa okwa pe ndje omumati nguka, oshoka oku uvu kutya kandi holike.” Okwe mu luka Simeon.

³⁴Okwa ningi omusimba ishewe e ta vala omumati gulwe. Okwa ti: “Ngashingeyi omusamane gwandje ota kala a kanyatela ndje, oshoka onde mu valele aamati yatatu.” Oye nokwe mu luka Levi.

³⁵Nena okwa ningi omusimba ishewe e ta vala omumati gulwe. Okwa ti: “Ngashingeyi ote hambelele Omuwa.” Oye nokwe mu luka Juda. Nena okwa hulitha okuvala.