Read Oshindonga-Ombiimbeli Ondjapuki GENESIS 32 Bible Online

GENESIS 32 - Oshindonga-Ombiimbeli Ondjapuki bible

GENESIS 32

¹Jakob sho a tsikile ondjila ye, okwa tsakanekwa kaayengeli.

²Sho e ya mono, okwa ti: “Ndika etangakwiita lyaKalunga,” onkee ehala ndyoka e li luku Mahanaim.

³Jakob okwa tumu aatumwa, ye mu tetekele, ya ye komumwayina Esau moshilongo shaEdom.

⁴Okwe ya kumagidha ya tye: “Ongame Jakob, omupiya gwoye, tandi ihokolola kumwene gwandje Esau kutya onda li nda kala puLaban sigo ongashingeyi.

⁵Onda likola oongombe, uusino, oonzi, iikombo naapika. Mwene gwandje, otandi ku tumine elaka, u sile ndje ohenda.”

⁶Aatumwa sho ya galukile kuJakob, oya ti: “Otwa yile komumwanyoko Esau, nokuli oku li mondjila te ya e ku tsakaneke, oku na aalumentu omathele gane.”

⁷Jakob okwa haluka e ta kunkwa. Okwa topola aantu ye moongundu mbali, osho wo oonzi, iikombo, oongombe noongamelo dhe.

⁸Okwa dhiladhila: “Esau nge ta dhenge ongundu yotango, onkwawo otayi vulu okuya ontuku.”

⁹Jakob okwa galikana a ti: “Kalunga katatekulu Abraham, Kalunga katate Isak, uva ndje! Omuwa, ongoye wa lombwele ndje wa ti: ‘Shuna kevi lyaandjeni nokezimo lyeni, ongame notandi ku ningi nawa.’

¹⁰Inandi opalela esilohenda lyoye nuudhiginini woye we u ulukile ndje, ngame omuntu gwoye. Onda tokolele Jordan ndi li iikaha yowala, eeno, ondhimbo ayike nda li ndi yi na, ihe nena onda galuka ndi na oongundu mbali.

¹¹Hupitha ndje miikaha yomumwameme Esau, oshoka ongame nda tila kutya ote ke tu homona e te tu hanagula po atuhe, nokuli aakulukadhi naanona.

¹²Dhimbulukwa, nkene u uvaneke, u ninge ndje nawa e to pe ndje oluvalo olwindji talu nyenge okuyalulwa, lu thike pehekevi lyomooha dhefuta.”

¹³Sho ya tokelwa hoka uusiku, Jakob okwa yoolola miimuna ye omagano ga ye komumwayina Esau:

¹⁴iikombo iinzinzi omathele gaali niilumentu omilongo mbali, oonzi oonzinzi omathele gaali noondumentu omilongo mbali,

¹⁵oongamelo oonyali omilongo ndatu nuunimona wadho, oongombe oonzinzi omilongo ne noontsezi omulongo, uusino uukiintu omilongo mbali nuulumentu omulongo.

¹⁶Okwe yi topola miigunda niigunda e ta tula moshigunda kehe omuwiliki gwasho. Okwe ya lombwele a ti: “Tetekelelii ndje, nopokati koshigunda noshigunda napa kale oshinano melandulathano.”

¹⁷Okwa lombwele omupiya gwotango a ti: “Omumwamene Esau nge te ku tsakaneke nota pula ta ti: ‘Mwene gwoye olye? Oto yi peni? Iimuna mbika oyalye to hingi?’

¹⁸Yamukula u tye: ‘Oyomupiya gwoye Jakob e yi tumine mwene gwe Esau omagano. Jakob ye mwene oku li konima e tu landula.’ ”

¹⁹Osho wo a lombwele omutiyali, omutitatu nokaawiliki ayehe yiigunda a ti: “Osho naanaa shoka mu na okulombwela Esau, nge tamu mu tsakaneke.

²⁰Omu na okutya: ‘Eeno, omupiya gwoye Jakob oku li komina e tu landula.’ ” Jakob okwi ipopile ta ti: “Otandi mu geulukitha nomulongelo, nonge tatu tsakanene, ngiika ota ka taamba ndje nombili.”

²¹Okwa tumu omagano ge mu tetekelele ye e ta lala montanda.

²²Uusiku tuu mboka Jakob okwa penduka e ta kutha aakadhi yaali, aadhikekadhi ye yaali noyana aamati omulongo nagumwe e taa taaguluka omulonga Jabbok.

²³Sho e ya laleke, ya ka taaguluke, okwa taagulukitha wo omaliko ge agehe.

²⁴Jakob okwa kala konima oye awike. Nena omulumentu okwe ya e ta kondjo naye, sigo eluwa lya tende.

²⁵Omulumentu sho a dhimbulula kutya nani ite mu sindi molugodhi, okwa ngwamuna Jakob monto, oyo noya dhamuka.

²⁶Omulumentu okwa ti: “Etha ndje, ndi ye, eluwa otali tende.” Jakob okwa yamukula a ti: “Itandi ku etha, manga inoo yambeka ndje.”

²⁷Omulumentu okwe mu pula a ti: “Ongoye lye ano?” Oye okwa ti: “Ongame Jakob.”

²⁸Omulumentu okwa ti: “Edhina lyoye itali kala we Jakob. Sho wa kondjo naKalunga nonaantu nowa sindana, onkee edhina lyoye oIsrael.”

²⁹Jakob okwa ti: “Lombwela ndje edhina lyoye.” Ihe ye okwa yamukula a ti: “Omolwashike wa hala okutseya edhina lyandje?” Nena okwa yambeke Jakob.

³⁰Jakob okwa ti: “Onda tala Kalunga koshipala noshipala, ihe nando ongaaka, omwenyo gwandje ogwa hupithwa.” Ehala ndyoka okwe li luku Penuel.

³¹Etango olya li tali piti, sho Jakob ta zi puPenuel, nokwa li ta tina omolwonto ye.

³²Sigo onena Aaisraeli ihaa li oothipa dhomonto, oshoka opo pehala mpoka omulumentu a dhengele Jakob.