Read Oshindonga-Ombiimbeli Ondjapuki GENESIS 34 Bible Online

GENESIS 34 - Oshindonga-Ombiimbeli Ondjapuki bible

GENESIS 34

¹Esiku limwe omukadhona Dina yaJakob naLea okwa ka talela po aakadhona yomoshilando shAakaanan.

²Shekem, omuna gwomunashikandjo Hamor Omuhevi, sho e mu ti tuu keho, okwe mu kwata koonkondo e ta lala naye nokwe mu mitike.

³Ihe okwa pwile mohole naDina yaJakob e ta kala te mu ikumbu.

⁴Shekem okwa lombwele he Hamor a ti: “Omukadhona nguka onde mu hala, a ninge mukadhandje.”

⁵Jakob okwa koneke kutya omwana Dina okwa mitikwa, ihe oyanamati sho ya li kuusita wiimuna ye kohambo, ina ninga sha, sigo ya galuka.

⁶Hamor, he yaShekem, okwa yi ya ka kundathane naJakob

⁷pethimbo mpoka aana yaJakob ya zi kohambo. Sho ye shi uvu, oya li ya haluka noya geele Shekem, sho a ningi esithahoni muIsrael nokwa mitike omuna gwaJakob. Osho oshinima ihaashi ningwa.

⁸Hamor okwa ti kuye: “Omumwandje Shekem oku hole omumwoye omukadhona, tu kwatheni, e mu hokane po.

⁹Natu hanganeni, opo tu hokanathaneni tse nane.

¹⁰Nena otamu vulu okukala mokati ketu moshilongo; otamu kala shaa mpoka mwa hala, omwa manguluka okushingitha nokulikola eliko.”

¹¹Nena Shekem okwa lombwele he yaDina naamwayina ta ti: “Silii ndje ohenda, otandi ke mu pa ashihe shoka mwa hala.

¹²Lombwelii ndje iigonda mbyoka mwa hala ne mu yele pombanda eyambo lyomongalo, ngaashi mwa hala. Otandi mu pe shoka tamu pula, ngele tamu zimine, ndi mu hokane po.”

¹³Molwashoka Shekem a yono po omumwayina Dina, aana yaJakob oya yamukula Shekem nahe Hamor nomakengelelo.

¹⁴Oya ti kuye: “Itatu vulu okuzimina, omumwameme a hokanwe komulumentu inaa pita etanda; otashi tu sitha ohoni.

¹⁵Otatu zimine ashike, ngele otamu kala mwe tu fa mwa pita etanda ne aalumentu amuhe.

¹⁶Nena otatu zimine, tu hokanathaneni. Otatu kala mokati keni e tatu ningi yamwe yomune.

¹⁷Ihe ngele itamu taamba edhiladhilo lyetu, mu pite etanda, otatu mu kutha omumwameme e tatu yi.”

¹⁸Edhiladhilo ndika olyo opalele Hamor nomwana Shekem,

¹⁹nomugundjuka ina kwatakwata we, oshoka okwa li e hole omukadhona omuna gwaJakob. Okwa li omunenentu mezimo lyawo alihe.

²⁰Hamor nomwana Shekem oya yi kehala lyoshigongi posheelo shoshilando e ta lombwele ooyakwawo taa ti:

²¹“Aalumentu mbaka aanambili, ya pitikeni, ya kale moshilongo pamwe natse yo ye ende shaa mpoka. Evi olye ya gwanena wo. Natu hokane oyana, tse tu ya pe wo yetu, ye ya hokane.

²²Ihe aalumentu mbaka otaa zimine, ya kale mokati ketu yo ya ninge yamwe natse ashike, ngele aalumentu ayehe otaa piti etanda, ngaashi yo ya pita etanda.

²³Omaliko gawo, iimuna yawo niinima yawo ayihe, itayi ka ninga yetu? Natu zimineni, opo ya kale putse.”

²⁴Aantu ayehe yomoshilando oya zimine shoka Hamor naShekem ya ti, aalumentu ayehe noya piti etanda.

²⁵Sho pwa piti omasiku gatatu, manga aalumentu ya li ye na iilalo yetanda, aana yaJakob yaali, Simeon naLevi, aamwayina yaDina, oya kutha omagongamwele gawo e taa yi moshilando, manga inaashi fekela sha, e taa dhipaga aalumentu ayehe.

²⁶Oya dhipaga wo Hamor nomwana Shekem. Oya kutha mo Dina maandjaShekem e taa yi.

²⁷Konima yedhipago aana yaJakob yalwe oya yugu oshilando e taye ya galulile ondjahi molwokuyona omumwayina.

²⁸Oya kutha po iigunda yiimuna, oonzi niikombo, oongombe nuusino noshaa shoka sha li moshilando nokomalundu.

²⁹Oya kutha iinima ayihe yi na ondilo, oya kwata po aakiintu ayehe naanona e taa hakana po shaa shoka sha li momagumbo.

³⁰Jakob okwa lombwele Simeon naLevi a ti: “Omwa etele ndje uudhigu; ngashingeyi Aakaanana nAaperesi noshaa ngoka moshilongo ota tondo ndje. Kandi na aantu oyendji; ngele ayehe taa hangene ndje ya ponokele ndje, ezimo lyetu alihe otali ka hanagulwa po.”

³¹Oya yamukula ya ti: “Inatu hala, omumwameme ta ningwa ngaaka a fa ohonda.”