Read Oshindonga-Ombiimbeli Ondjapuki GENESIS 38 Bible Online

GENESIS 38 - Oshindonga-Ombiimbeli Ondjapuki bible

GENESIS 38

¹Pethimbo ndyoka Juda okwa tembuka paamwahe nokwa ka kala pamwe nomulumentu, edhina lye Hira, gwokoshilando Adullam.

²Oko nkoka i itsu omukadhona gwaShua, omulumentu Omukaanani. Okwe mu hokana,

³e te mu valele omumati e te mu luku Er.

⁴Okwa ningi ishewe omusimba e ta vala omumati nokwe mu luku Onan.

⁵Okwa vala ishewe omumati e te mu luku Shela. Omumati nguka sho a valwa, Juda okwa li muKesib.

⁶Juda okwa kongele osheeli she Er omukiintu edhina lye Tamar.

⁷Er okwa li inaa opalela Omuwa, nomolwashoka Omuwa okwe mu etha a se.

⁸Juda okwa lombwele omumwayina gwaEr Onan a ti: “Inda, u ka lale nomuselekadhi gwomumwanyoko. Gwanitha oshilonga shoye, opo omumwanyoko a kale e na oluvalo.”

⁹Ihe okwa li e shi shi kutya uunona kau shi we, onkee shaa tuu a lala nomuselekadhi gwomumwayina, omasita goluvalo okwe ga sitamene pevi, opo kaaha valele omumwayina oluvalo.

¹⁰Shika osha geyitha Omuwa e te mu dhipaga po ishewe.

¹¹Nena Juda okwa ti koshitenya she Tamar: “Shuna kaandjaho, u kale omuselekadhi, sigo omumwandje Shela ta koko.” Okwa popi ngaaka, oshoka a tila, pamwe Shela naye wo ota ka dhipagwa, ngaashi aamwayina ya ningwa. Tamar okwa shuna kaandjawo.

¹²Konima yethimbo ele omukulukadhi gwaJuda, omuna gwaShua, okwa si. Oosa sho dha halakana, Juda nakuume ke Hira gwomuAdullam oya yi kuTimna, a ka kululithe oonzi dhe.

¹³Yamwe oya lombwele Tamar kutya hemweno ota yi kuTimna, a ka kululithe oonzi dhe.

¹⁴Tamar okwa hula mo oonguwo dhuuselekadhi e ta siikile oshipala she newiiwili e ta ka kuutumba posheelo shaEnaim, oshilando shi li pondjila yokuya kuTimna. Okwa li a tseya kutya onkelo yaJuda Shela oya koka, ihe ine mu pewa, e mu hokane po natango.

¹⁵Juda sho e mu mono, okwa li e shi ohonda, oshoka okwa siikila oshipala she.

¹⁶Okwa kanduka mondjila, a yi kuye e ta ti: “Ila, tu lale.” (Ine mu dhimbulula kutya oye oshitenya she.) Tamar okwa ti: “Oto futu ndje shike?”

¹⁷Juda okwa yamukula a ti: “Otandi ke ku tumina okakombwena komoshigunda shandje.” Tamar okwa ti: “Eewa, ihe ongele to pe ndje ombambyona yi kale po, sigo wa tumu oshikombo.”

¹⁸Juda okwa pula a ti: “Ombambyona oyashike?” Tamar okwa yamukula a ti: “Okalinga koshihako shoye nongodhi yako nondhimbo ndjoka u na moshikaha shoye.” Okwe yi mu pe. Nena okwa lala naye e ta ningi ela.

¹⁹Tamar okwa shuna kaandjawo e ti isuukulula ewiiwili nokwa zala oonguwo dhe dhuuselekadhi.

²⁰Juda okwa tumu kuume ke Hira, a fale oshikombo ye a etelele iinima yombambyona, ihe Hira ina mona Tamar.

²¹Okwa pula aantu yopuEnaim ta ti: “Ohonda ndjiyaka ya li pondjila mpano, oyi li peni?” Aantu oya yamukula ya ti: “Kapwa li ohonda yasha mpaka.”

²²Hira okwa shuna kuJuda e ta ti: “Inandi mu mona ko. Aantu otaa ti kutya kakwa li nando ohonda hwiyaka.”

²³Juda okwa ti: “Iinima mbyoka ne yi pungule. Inatu hala, aantu ye tu yole. Onda kambadhala oku mu futa, ihe ino mu mona ko.”

²⁴Sho pwa piti oomwedhi ndatu, Juda okwa lombwelwa taku tiwa: “Oshitenya shoye Tamar a pundukile moluhondelo noku na ela.” Juda okwa gandja elaka tali ti: “Mu pitithii mo, mu ke mu fike po a se.”

²⁵Sho a li ta pitithwa mo, okwa tumu elaka kuhemweno tali ti: “Epunda onde li pewa kumwene gwiinima mbika. Yi tala nawa, ngoye u mone kutya oyalye-okalinga koshihako nongodhi yako nondhimbo.”

²⁶Juda okwe yi dhimbulula e ta ti: “Oku li mondjila, ngame inandi mu gwanithila oshinakugwanithwa shandje, oshoka inandi mu pa omumwandje Shela, e mu hokane po.” Okuza mpoka Juda ina lala we naye.

²⁷Ethimbo lye lyokuvala sho lya thikana, osha holoka kutya ota ka vala epaha.

²⁸Manga a li ta thetwa, gumwe gwaakwanambwiyu okwa pititha mo okwaako; omuvalithi okwe ku kwata e te ku manga okangodhi okatiligane e ta ti: “Nguka osheeli.”

²⁹Ihe okwa shunitha mo okwaako kwe, omumwayina oye a valwa tango. Nena omuvalithi okwa ti: “Owa gwaya mo ngiini,” e te mu luku Perez.

³⁰Nena omumwayina okwa valwa e na ongodhi ontiligane poshikesho e te mu luku Sera.