Read Oshindonga-Ombiimbeli Ondjapuki GENESIS 39 Bible Online

GENESIS 39 - Oshindonga-Ombiimbeli Ondjapuki bible

GENESIS 39

¹Aaismaeli oya fala Josef kuEgipiti e taye mu landa po naPotifar, elenga lyomukwaniilwa, omukuluntu gwaalangeli yuuwa.

²Omuwa okwa li pamwe naJosef nokwe mu pe elago ewanawa. Okwa kala megumbo lyamwene gwe Omuegipiti,

³ngoka a mono kutya Omuwa okwa pe Josef elago ewanawa mwaayihe te yi ningi.

⁴Potifar okwa li e mu hokwa e te mu ningi elenga lye lyomekolo; osho ngaaka a tula egumbo lye niinima ye ayihe metonatelo lye.

⁵Okuza mpoka Omuwa okwa yambeke egumbo lyOmuegipiti omolwaJosef, osho wo ayihe e yi na megumbo nenge komalundu.

⁶Potifar okwa gandja ayihe a li e yi na miikaha yaJosef nokwa li kee na we oshimpwiyu shasha, shila okulya akuke. Josef okwa li omwaanawa a shitika,

⁷nokonima yethimbo omukulukadhi gwaPotifar okwa haluka Josef e te mu lombwele ta ti: “Tu lale.”

⁸Josef okwa tindi e ta ti: “Tala ko, mwene gwandje ke na oshimpwiyu shasha megumbo muka, oshoka omo ndi li. Okwa ningi ndje omutonateli gwaayihe e yi na.

⁹Megumbo muka ondi na mo oonkondo dhi thike pudhe, noina keelela ndje sha shilwe, kakele koye. Ondi longe ngiini uuwinayi u thike mpono, ndi yone kuKalunga?”

¹⁰Nando omukulukadhi a kala ta pula Josef esiku nesiku, Josef ina zimina a lale naye.

¹¹Ihe esiku limwe Josef sho a yi megumbo, a longe iilonga ye, megumbo kamwa li nando omupiya gumwe.

¹²Omukulukadhi okwe mu kwata konguwo ye e ta ti: “Tu lale.” Ihe Josef okwa thigi onguwo ye miikaha ye e ta yi ondapo pondje.

¹³Omukulukadhi sho a mono kutya Josef a thigi po onguwo ye e ta yi ondapo pondje,

¹⁴Okwi igidha aapiya ye yomegumbo e ta ti: “Taleni ko nduno! Okahebeli haka ke etwa komusamane gwandje maandjetu, otake tu sitha ohoni. Oke ya mondjugo yandje noka kambadhala okulala nangame, ihe onda kugu onkugo mokule.

¹⁵Sho nda kugu onkugo, oka yi ontuku pondje, ka thigi po onguwo yako pungame.”

¹⁶Omukulukadhi okwa pungula onguwo puye, sigo mwene gwaJosef e ya kegumbo.

¹⁷Okwe mu hokololele wo e ta ti: “Omupika ngoka Omuhebeli we eta huka, okwe ya kungame, a sithe ndje ohoni.

¹⁸Ihe sho nda kugu onkugo, okwa yi ontuku pondje, a thigi po onguwo ye pungame.”

¹⁹Mwene gwaJosef sho u uvu ehokololo lyomukulukadhi gwe ta ti: “Osho omupika gwoye a ningi ndje,” okwa geye noonkondo

²⁰e ta kwata Josef e te mu tula mondjedhililo moka mu na oonkwatwa dhomukwaniilwa, nomo a kala e edhililwa moka.

²¹Ihe Omuwa okwa li naJosef e te mu yambeke, onkee omukuluntu gwondjedhililo okwe mu hokwa.

²²Okwa langeke Josef, a ninge omutonateli gwoonkwatwa adhihe e te mu inekelele iinima ayihe mondjedhililo.

²³Omukuluntu gwondjedhililo ka li we e na oshimpwiyu shasha, oshoka ayihe oya li miikaha yaJosef, nOmuwa okwe mu pe elago ewanawa mwaayihe e yi longo.