Read Oshindonga-Ombiimbeli Ondjapuki GENESIS 4 Bible Online

GENESIS 4 - Oshindonga-Ombiimbeli Ondjapuki bible

GENESIS 4

¹Adam okwa lala nomukadhi Eva e ta ningi omusimba. Okwa vala okanona okamati e ta ti: “Kekwatho lyOmuwa onda pulumutha okamati.” Okwe ka luku Kain.

²Konima yaambika okwa vala ishewe omumati, Abel. Abel okwa ningi omusita gwiimuna, ihe Kain omulongi gwepya.

³Sho pwa piti omasiku, Kain okwa yambele Omuwa omayambo giiliwa yomepya lye.

⁴Abel okwe eta onzigona ondjelipa yomoonzi dhe nokwe yi dhipaga e te yi yambele Omuwa. Omuwa okwa hokwa Abel nondjambo ye,

⁵ihe ina hokwa Kain nondjambo ye. Kain okwa geye a sizimaneka oshipala she kondjahi.

⁶Omuwa nokwa ti kuKain: “Omolwashike wa geya? Oshike wa sizimaneka oshipala?

⁷Ngele to longo uuwanawa, nena oshipala shoye oshi li nawa, ihe ngele to longo uuwinayi, nena uulunde owe ku langele posheelo. Owo wa hala oku ku pangela, ihe ou na oku u pangela.”

⁸Opo ihe Kain okwa lombwele mumwayina Abel ta ti: “Tu ye kelundu.” Sho ya yi ko, Kain okwa ponokele omumwayina e te mu dhipaga.

⁹Omuwa okwa pula Kain a ti: “Omumwanyoko Abel oku li peni?” Kain okwa yamukula a ti: “Kandi shi wo. Ongame omusita gwomumwameme nani?”

¹⁰Nena Omuwa okwa ti: “Omolwashike wa longo iihuna yi thike mpono? Ombinzi yomumwanyoko otayi kugile ndje mevi.

¹¹Okuza ngashingeyi ongoye omuthingwa, noto tidhwa mo mepya. Evi olye ekama okana kalyo okutaamba ombinzi yomumwanyoko, sho we mu dhipaga.

¹²Nge to longo epya lyoye, itali ku kutitha; oto ka ninga epongo nontembuki kombanda yevi.”

¹³Kain okwa lombwele Omuwa a ti: “Ondjo yandje ondhigu unene, ite vulu oku yi humbata.

¹⁴Oto tidha ndje mo mepya nokoshipala shoye. Otandi ka ninga epongo nontembuki kombanda yevi, noshaa ngoka ta mono ndje, ota dhipaga ndje.”

¹⁵Omuwa okwa yamukula a ti: “Aawe, ngele ope na ngoka te ku dhipaga, ota ka geelwa luheyali.” Omuwa okwa ndhindhilike Kain endhindhiliko lyokulondodha shaa ngoka te mu tsakaneke, keehe mu dhipage.

¹⁶Kain nokwa zi ko koshipala shOmuwa e ta yi, a ka kale moshilongo hashi ithanwa Nod, kuuzilo waEden.

¹⁷Kain okwa lala nomukadhi e ta ningi omusimba. Okwa vala okamati nokwe ka luku Enok. Kain okwa tungu oshilando e te shi lukile omwana Enok.

¹⁸Enok okwa vala Irad, ngoka a li he yaMehujael, naMehujael okwa vala Metushael, he yaLamek.

¹⁹Lamek okwa li a hokana ombanda, aakadhi oAda naZilla.

²⁰Ada okwa vala Jabal, ngoka a li hekulu yaanamatsali naanahambo.

²¹Omumwayina okwa li Jubal, hekulu yaahiki yuuharpa noohiya.

²²Zilla okwa vala Tubal Kain, omuhambudhi gwiilongitho yi ili noyi ili yiiyela iikushu niiluudhe. Omumwayina omukiintu gwaTubal Kain oNaama.

²³Lamek okwa lombwele aakadhi a ti: “Ada naZilla, pulakenii ndje, aakulukadhi yaLamek, uveni oohapu dhandje. Onda dhipaga omuntu, sho a dhenge ndje oshilalo, omuntu omugundjuka omolwombole yandje.

²⁴Kain ngele ta geelwa luheyali, Lamek omilongo heyali luheyali.”

²⁵Adam okwa lala ishewe nomukadhi e ta ningi omusimba. Okwa vala omumati gulwe e ta ti: “Kalunga okwa pe ndje omumati peha lyaAbel, ngoka a dhipagwa kuKain.” Onkee okwe mu luku Set.

²⁶Set okwa vala omumati e te mu luku Enos. Pethimbo ndyoka aantu oya tameke okugalikana Omuwa.