Read Oshindonga-Ombiimbeli Ondjapuki GENESIS 46 Bible Online

GENESIS 46 - Oshindonga-Ombiimbeli Ondjapuki bible

GENESIS 46

¹Jakob okwa manga po iinima ye ayihe e ta yi kuBeersheba, hoka a yamba oontselelandjambo kuKalunga kahe Isak.

²Kalunga okwe mu popitha memoniko uusiku e te mu ithana ta ti: “Jakob, Jakobwee!” Jakob okwa yamukula a ti: “Ee!”

³Kalunga okwa ti: “Ongame Kalunga, Kalunga kaho. Ino tila okuya kuEgipiti; oluvalo lwoye otandi ke lu ninga oshigwana oshinene.

⁴Otandi yi nangoye kuEgipiti notandi ka galulila oluvalo lwoye kevi huka. Josef oye te ku thithikilitha omeho goye, sho to si.”

⁵Jakob okwa zi muBeersheba. Oyana oye mu londeke pamwe naanona naakulukadhi yawo momatemba ngoka ga zi komukwaniilwa gwaEgipiti.

⁶Oya kutha iinima yawo ayihe mbyoka ye yi imonene muKaanan e taa yi kuEgipiti. Jakob okwa yi noluvalo lwe aluhe:

⁷Oyana aamati, aatekulu ye aamati, oyana aakadhona naatekulu ye aakadhona.

⁸Aaisraeli mboka ya yi kuEgipiti, oyo mbaka: Jakob nosheeli she Reuben,

⁹aana yaReuben Hanok, Pallu, Hezron naKarmi.

¹⁰Simeon noyana Jemuel, Jamin, Ohad, Jakin, Zohar naShaul, omuna gwomukulukadhi Omukaanani.

¹¹Levi noyana Gerson, Kohat naMerari.

¹²Juda noyana Shela, Perez naSera. (Aana yaJuda yalwe Er naOnan oya sile muKaanan). Perez okwa li e na aanona Hezron naHamul.

¹³Issaskar noyana Tola, Puwa, Jashub naShimron.

¹⁴Sebulon noyana Sered, Elon naJahleel.

¹⁵Mbaka aamati yaLea e ya valele Jakob muMesopotamia pamwe nomumwayina omukadhona Dina. Aantu ayehe kumwe aamati naakadhona omilongo ndatu nayatatu.

¹⁶Gad noyana Zifjon, Haggi, Shuni, Ezbon, Eri, Arodi naAreli.

¹⁷Aser noyana Imna, Ishva, Ishvi, Beria nomumwayina omukadhona Sera. Aana yaBeria oyo Heber naMalkiel.

¹⁸Mbaka omulongo nayahamano yomoluvalo lwaJakob ya valwa kuSilpa, omudhike ngoka Laban e mu pele omwana Lea.

¹⁹Rakel, omukulukadhi gwaJakob, okwe mu valele aamati yaali, Josef naBenjamin.

²⁰Oyanamati yaJosef oyo Manasse naEfraim. Oye mu valelwa muEgipiti kuAsenat, omuna gwomuyambi Potifera gwokuOn.

²¹Oyanamati yaBenjamin oyo Bela, Beker, Ashbel, Gera, Naeman, Ehi, Rosh, Muppim, Huppim naArd.

²²Mbaka omulongo nayane oyo oluvalo lwaJakob yomuRakel.

²³Dan nomwana Hushim.

²⁴Naftali noyana Jakzeel, Guni, Jezer naShillem.

²⁵Mbaka yaheyali oyo oluvalo lwaJakob muBilha, omudhike ngoka Laban e mu pele omwana Rakel.

²⁶Oluvalo lwaJakob aluhe kumwe ndoka lwa yi kuEgipiti, olwo omilongo hamano nahamano, aakiintu yoyana inaa yalulilwa mo.

²⁷Josef okwa valelwa aamati yaali muEgipti. Nopo ihe, Aaisraeli ayehe muEgipiti oya ningi omilongo heyali.

²⁸Jakob okwa tetekelitha Juda, a ka tale Josef e mu tsakaneke muGoshen. Sho a thiki ko,

²⁹Josef okwa londo metemba lye e ta yi kuGoshen, a ka tsakaneke he. Sho ya tsakanene, Josef okwi idhingile omaako ge mothingo yahe e ta lili olule.

³⁰Jakob okwa lombwele Josef a ti: “Ngashingeyi otandi ka sa nenyanyu, sho nda mono oshipala shoye nondi shi kutya ou na omwenyo.”

³¹Nena Josef okwa ti kaamwahe nokaanegumbo lyahe: “Otandi ka tseyithila omukwaniilwa kutya aamwameme natate negumbo lye alihe mboka ya kala muKaanan, oye ya kungame.

³²Otandi ke mu hokololela kutya one aasita yiimuna mwe etelela oonzi, iikombo, oongombe naayihe mu yi na.

³³Omukwaniilwa nge te mu ithana e te mu pula iilonga yeni,

³⁴tyeni kutya one aasita yiimuna mokukalamwenyo kweni akuhe, ngaashi naanaa oohokulu ya li haa litha. Nena ote mu pitika, mu kale moshikandjo shaGoshen.” Josef okwa popi ngaaka, oshoka aasita yiimuna oyo oshidhila kAaegipiti.