Read Oshindonga-Ombiimbeli Ondjapuki GENESIS 6 Bible Online

GENESIS 6 - Oshindonga-Ombiimbeli Ondjapuki bible

GENESIS 6

¹Aantu sho yi indjipala kombanda yevi noya valelwa aakadhona,

²aamati aana yaKalunga oya tala aakadhona aana yaantu yo opala noya hokana mboka ye yi ihogololele.

³Nena Omuwa okwa popi e ta ti: “Ombepo yandje itayi kala nokukumagidha omuntu aluheluhe, oshoka oye omusi; omasiku ge naga ninge omimvo ethele nomilongo mbali.”

⁴Muuyuni mbwiyaka nomuuyuni we u landula omwa li mu na aalefule. Oyo oluvalo lwaamati aana yaKalunga mboka ya hokana aakadhona aana yaantu. Oya li oofule naanamadhina okuza kuukulu wonale.

⁵Omuwa sho a mono uuwinayi waantu kombanda yevi mpoka u thike, nomadhiladhilo gawo nkene ga pilaala ethimbo alihe,

⁶oku uvu nayi, sho a shitile omuntu kombanda yevi.

⁷Omuwa okwa popi e ta ti: “Aantu mbaka nde ya shiti, otandi ya kombo ko kombanda yevi, nosho wo iinamwenyo noondhila, oshoka ondi ipe ombedhi, sho nde ya shiti.”

⁸Ihe Omuwa okwa li a hokwa Noa.

⁹Ndjika oyo ondjokonona yaNoa. Okwa vala aamati yatatu: Sem, Ham naJafet. Noa ka li e na uusama, okwa li omuyuuki pethimbo lye. Okwa kala mekwatathano naKalunga,

¹¹ihe aantu ayehe oya li aawinayi koshipala shaKalunga, niikolokosha oya li ya taandela shaa mpoka.

¹²Kalunga okwa tala uuyuni nokwa mono kutya owo uuwinayi, oshoka aantu mboka ya kala mo, oya kala muuwinayi.

¹³Kalunga okwa lombwele Noa a ti: “Onda tokola ndi hulithe po aantu ayehe. Otandi ya kombo po thiluthilu, oshoka uuyuni ou udha iilonga yawo iiwinayi.

¹⁴Itungila onguluwato yiipilangi yo opala, nayi kale yi na omala, ngoye u yi hote nomaka meni nokombanda.

¹⁵Nayi kale oondya 300 momutaandelo, oondya 50 momutamo noondya 30 momuthika.

¹⁶Konguluwato tula ko ondunda nokuthiga po othaalo yolundya lumwe pokati kondunda nolungenge lwonguluwato. Yi tunga moontala ndatu, nomweelo molupati.

¹⁷Otandi ka tuma eyelu kombanda yevi, li yonagule po omufudho aguhe. Shaa shoka shi na omwenyo kombanda yevi, otashi si.

¹⁸Ihe otandi ka dhika ehangano nangoye. Inda monguluwato nomukiintu gwoye, aamwoyemati naakadhi.

¹⁹Monguluwato fala mo iinamwenyo yomaludhi agehe ooiyali, oshilumentu noshikiintu moludhi kehe lwiinamwenyo nolwoondhila, opo yi hupe yi kale yi na omwenyo.

²¹Fala mo wo iikulya yomaludhi agehe, yoye mwene noyiinamwenyo.”

²²Noa okwa ningi, ngaashi Kalunga e mu lombwele.