Read Oshindonga-Ombiimbeli Ondjapuki GENESIS 7 Bible Online

GENESIS 7 - Oshindonga-Ombiimbeli Ondjapuki bible

GENESIS 7

¹Omuwa okwa lombwele Noa a ti: “Inda monguluwato negumbo lyoye alihe; onda mono kutya ongoye awike muuyuni auhe ho longo uuyuuki.

²Fala mo iinamwenyo ooiyali luheyali yomomaludhi agehe ngoka gaa na oshipwe, opo ihe iinamwenyo ooiyali ayihe yoshipwe.

³Fala mo oondhila oombali luheyali komaludhi gadho. Shi ninga, opo omaludhi giinamwenyo nenge goondhila ga kale ge na omwenyo go ga ka indjipale ishewe.

⁴Ngele pwa piti omasiku gaheyali, otandi ka lokitha omvula tayi ka tilahi omeya omasiku omilongo ne omutenya nuusiku, opo yi hanagule po iinamwenyo ayihe nde yi shiti.”

⁵Noa okwa ningi, ngaashi Omuwa e mu lombwele.

⁶Noa okwa li e na omimvo omathele gahamano, eyelu sho lye ya kombanda yevi.

⁷Oye nomukadhi, oyanamati naakadhi, oya yi monguluwato, ya ka holame eyelu.

⁸Oshilumentu noshikiintu moludhi kehe lwiinamwenyo nolwoondhila lwaa na oshipwe ngaashika wo lwoshipwe

⁹oya yi monguluwato pamwe naNoa, ngaashi Kalunga a ti.

¹⁰Sho pwa piti omasiku gaheyali, eyelu olye ya.

¹¹Noa sho a gwanitha omimvo omathele gahamano, mesiku etimulongo netiheyali lyomwedhi omutiyali oothithiya adhihe dhomuule odhe eguluka, noombende adhihe dhokegulu odha makuka.

¹²Omvula oya puuka noya loko omutenya nuusiku omasiku omilongo ne.

¹³Esiku tuu ndyoka Noa nomukadhi oya yi monguluwato noyanamati yatatu: Sem, Ham naJafet naakadhi.

¹⁴Oya yi mo niinamwenyo yomaludhi agehe gopaantu nogomokuti, iinene niishona, noondhila dhomaludhi agehe.

¹⁵Iinamwenyo iilumentu niikiintu yomaludhi agehe oya yi monguluwato pamwe naNoa,

¹⁶ngaashi Kalunga e mu lombwele. Nena Omuwa okwa pata omweelo konima yaNoa.

¹⁷Eyelu olye ya kombanda yevi momasiku omilongo ne, onguluwato noya kaama kombanda yomeya omale.

¹⁸Omeya oga lundalala, nonguluwato oya telagana kombanda yago.

¹⁹Omeya ogi itumbu, sigo ga siikile oondundu oondeendeka;

²⁰oga tsikile okulundalala, sigo ga ningi oometa heyali kombanda yoondundu.

²¹Oonakukala ayehe kombanda yevi ye na omwenyo, oya si: oondhila adhihe, iinamwenyo ayihe naantu ayehe.

²²Shaa shoka sha li shi na omufudho kombanda yevi, osha si.

²³Omuwa okwa hanagula po iinamwenyo ayihe kombanda yevi: aantu, iiyamakuti noondhila. ONoa awike a hupu ko naamboka ya li puye monguluwato.

²⁴Omeya oga siikile evi omasiku ethele nomilongo ntano.