Read Oshindonga-Ombiimbeli Ondjapuki GENESIS 8 Bible Online

GENESIS 8 - Oshindonga-Ombiimbeli Ondjapuki bible

GENESIS 8

¹Kalunga okwa dhimbulukwa Noa niinamwenyo ayihe ya li pamwe naye monguluwato. Okwa pepitha ombepo, nomeya oga tameke okupwina.

²Oothithiya dhomuule noombende dhokegulu odha thiti. Omvula oya sheka,

³nomeya oga tameke okukuluka momasiku ethele nomilongo ntano.

⁴Mesiku etimulongo netiheyali lyomwedhi omutiheyali onguluwato oya hakele kondungu yondundu Ararat.

⁵Omeya oge ende taga pwine, nomesiku lyotango lyomwedhi omutimulongo oondungu dhoondundu odha anduka ko.

⁶Sho pwa piti omasiku omilongo ne, Noa okwe egulula ombende

⁷e ta pititha mo edhilakola. Edhilakola inali galuka we, olya kala tali telagana, sigo omeya ga pwine.

⁸Sho pwa piti okathimbo, Noa okwa piitha mo onguti, a tale, ngele omeya oga pwina,

⁹ihe oshoka oga li ga siikile natango evi, onguti inayi mona nando eha lyokulambela. Oya galukile konguluwato, naNoa okwa ganeke oshikaha she e te yi shuna mo.

¹⁰Noa okwa tegelele omasiku gaheyali e ta piitha mo ishewe onguti.

¹¹Ongulohi oya galukile kuye yi na efo lyomuolivi komulungu. Noa okwa koneke kutya nani omeya oga pwina.

¹²Okwa tegelele ishewe omasiku gaheyali e ta piitha mo onguti, noinayi galuka we.

¹³Noa sho a gwanitha omimvo 601, mesiku lyotango lyomwedhi gwotango, omeya oga adhika ga pwine. Noa okwa kutha ko ondunda yonguluwato e ta tala koombinga noombinga. Okwa mono kutya nani evi olya kaha.

¹⁴Mesiku etimilongombali netiheyali lyomwedhi omutiyali evi olya li ekukutu thiluthilu.

¹⁵Kalunga okwa lombwele Noa a ti:

¹⁶“Za mo monguluwato, ongoye mwene nomukulukadhi gwoye naamwoyemati naakadhi.

¹⁷Piitha mo oondhila adhihe niinamwenyo, opo yi valathane yo yi indjipale kombanda yevi alihe.”

¹⁸Noa okwa piti mo nomukadhi noyanamati naakadhi.

¹⁹Iinamwenyo ayihe noondhila odha piti mo monguluwato moongundu dhomaludhi gadho.

²⁰Noa okwa tungile Omuwa oshiyambelo; okwa kutha shimwe shomoludhi kehe lwiinamwenyo yaa na oshipwe nolwoondhila e te yi lungunitha po omidhidhindjambo koshiyambelo.

²¹Ezimba lyoondjambo olya nyanyudha Omuwa, e ti ipopile ta ti: “Evi itandi li geelele we omuntu; onda tseya kutya omadhiladhilo ge omawinayi okuza kuunona we. Itandi ka hanagula po we iinamwenyo ayihe, ngaashi nda ningi ngashingeyi.

²²Ihe manga uuyuni u li po, otaku ka kala ethimbo lyokukuna nethimbo lyokuteya. Otaku ka kala aluhe uutalala nuupyu, othinge nokufu, omutenya nuusiku.”