Read Oshindonga-Ombiimbeli Ondjapuki 1 AAKWANIILWA 14 Bible Online

1 AAKWANIILWA 14 - Oshindonga-Ombiimbeli Ondjapuki bible

1 AAKWANIILWA 14

¹Pethimbo ndyoka Abia yaJeroboam okwa akukilwa koshivu.

²Jeroboam okwa ti komunyekadhi gwe: “Idhimbika ngoye mwene po pwaa kale ngoka te ku dhimbulula, u ye kuShilo komuhunganeki Ahija. Oye tuu ngoka a lombwele ndje kutya ote ningi omukwaniilwa gwaIsrael.

³Mu faalela iikwiila omulongo nokayiga komagadhi goonyushi. Mu pula kutya omumwetu ota kala po ngiini, oye note ku lombwele.”

⁴Osho ngaaka omunyekadhi a yi kaandjaAhija kuShilo. Ahija okwa li a tsika kuukulupe.

⁵Omuwa okwe mu lombwele kutya mukadhaJeroboam ote ya, e mu pule sha kombinga yomwana, ngoka ta alukwa. Omuwa nokwa lombwele Ahija shoka e na okutya. Omunyekadhi gwaJeroboam sho a thiki, okwi iningi a fa omuntu i ili.

⁶Ihe Ahija sho e mu uvu te ya pomweelo, okwa ti: “Ila mo. Ondi ku shi, ongoye omunyekadhi gwaJeroboam. Omolwashike to idhimbike wa fa omuntu i ili? Ondi na onkundana ombwinayi kungoye.

⁷Inda, u ka lombwele Jeroboam kutya Omuwa, Kalunga kaIsrael, ota ti kuye ngeyi: ‘Onde ku hogolola mokati kaantu e tii ku ningi omuleli gwaantu yandje Aaisraeli.

⁸Onda kutha oluvalo lwaDavid uukwaniilwa, ndi u ku pe. Ihe ngoye ino fa nando omuntu gwandje David, ngoka a li i inekela ndje mwaayihe, a vulika komautho gandje nokwa ningi ashike shoka nda hokwa.

⁹Ngoye owa longo iihuna iinene u vule mboka ye ku tetekelele muukwaniilwa. Owe ekelehi ndje e to tukulutha ondjahi yandje mokuninga iimenka nokuhambula omafano noku ga simaneka.

¹⁰Molwashika otandi undulile omupya koluvalo lwoye e tandi ka dhipaga aalumentu ayehe moluvalo lwoye, aanona naakuluntu. Otandi ke etha egumbo lyoye; otaa ka kombwa po ya fa oonyata.

¹¹Omuntu gwaandjeni ngoka ta sile moshilando, ota ka lika po koombwa, noshaa ngoka ta sile melundu, ota ka lika po koontsa. Ongame Omuwa nde dhi tya ndho!’ ”

¹²Ahija okwa tsikile ta lombwele omunyekadhi gwaJeroboam ta ti: “Ngashingeyi shuna kegumbo. Shimpa wa yi moshilando, omumwoye ota ka sa.

¹³Aaisraeli ayehe otaye ke mu lila oosa e taye mu fumvike. Oye awike gwomegumbo lyaJeroboam ta fumvikwa ta yi mombila, oshoka oye awike Omuwa, Kalunga kaIsrael, e mu hokwa.

¹⁴Omuwa ota ka langeka muIsrael omukwaniilwa ngoka ta ka dhima po ezimo lyaJeroboam.

¹⁵Omuwa ota ka geela Israel, aantu notaa ka kakama, ngaashi enenge tali inyenge momulonga. Ota ka nakula mo Aaisraeli mevi ndika ewanawa ndyoka e li pe oohekulu, e te ya halakanithile handiyaka yomulonga Eufrat, molwashoka oya tukulutha ondjahi ye mokuninga iimenka yoshikalungakiintu Asheera.

¹⁶Omuwa ota ka etha Israel, molwashoka Jeroboam okwa yono e ta fala Aaisraeli muulunde.”

¹⁷Omunyekadhi gwaJeroboam okwa shuna kuTirza. Hela tuu a lyata oompadhi dhe peelo lyegumbo, ye omunona ota si.

¹⁸Aaisraeli oye mu lili oosa e taye mu fumvike, ngaashi Omuwa a ti, sho a popitha omuntu gwe, omuhunganeki Ahija.

¹⁹Ashihe shilwe shoka omukwaniilwa Jeroboam a ningi, iita mbyoka a hingi nonkene a lele, ayihe oya nyolelwa membo lyondjokonona yaakwaniilwa yaIsrael.

²⁰Jeroboam okwa li omukwaniilwa omimvo omilongo mbali nambali. Okwa si e ta fumvikwa, nomwana Nadab okwe mu landula muukwaniilwa.

²¹Rehoboam yaSalomo okwa li e na omimvo omilongo ne nagumwe, sho a ningi omukwaniilwa gwaJuda, nokwa lele omimvo omulongo naheyali muJerusalem, oshilando shoka Omuwa e shi hogolola miikandjo ayihe yaIsrael, shi ninge epandja lyokugalikanena mo. Yina yaRehoboam oNaama Omuammoni.

²²Aajuda oya yono kOmuwa noya tukulutha ondjahi yOmuwa ye vule oohekulu ayehe.

²³Oya tungu omahala giinonoma noya dhike oongundhimanya nomandhindhiliko gaAsheera nokunonoma kiikulundundu nomomizile dhomiti.

²⁴Okwa li wo aalumentu naakiintu mboka ya kala muuholume momahala giinonoma yuupagani. Aajuda oya ningi iihuna ayihe mbyoka ya longwa kaantu mboka Omuwa a li e ya tidha mevi ndyoka komeho gAaisraeli.

²⁵Momumvo omutitano gwepangelo lyaRehoboam, Shishak, omukwaniilwa gwaEgipiti, okwa matukile Jerusalem.

²⁶Okwa yugu po omaliko agehe gotempeli nogambala. Okwa kutha po wo iikandekitho yoshingoli mbyoka Salomo a li e yi hambulitha.

²⁷Peha lyayo Rehoboam okwa hambulithile po iikandekitho yoshikushu nokwe yi pe aambala mboka ya li ye na oshimpwiyu shokutonatela eelo lyuuwa.

²⁸Aluhe omukwaniilwa nge ta yi kotempeli, nena aalangeli ohaa humbata iikandekitho noku yi shuna ishewe kongulu yetonatelo.

²⁹Ashihe shilwe shoka omukwaniilwa Rehoboam a ningi, osha nyolelwa membo lyondjokonona yaakwaniilwa yaJuda.

³⁰Methimbo alihe ndino Rehoboam naJeroboam oya li ya hingilathana iita pwaa na luthuwo.

³¹Rehoboam okwa si nokwa fumvikwa mombila yaakwaniilwa moshilando shaDavid, nomwana Abia okwe mu landula muukwaniilwa.