Read Oshindonga-Ombiimbeli Ondjapuki 1 AAKWANIILWA 16 Bible Online

1 AAKWANIILWA 16 - Oshindonga-Ombiimbeli Ondjapuki bible

1 AAKWANIILWA 16

¹Omuwa okwa lombwele omuhunganeki Jehu yaHanani e te mu pe elaka ndika tali popi Baasha tali ti:

²“Owa li omunima gwowala, ihe onde ku ningi omuwiliki gwaantu yandje Aaisraeli. Ihe owa yono wa fa Jeroboam nowa fala aantu yandje muulunde. Oondjo dhawo odha tukulutha ondjahi yandje,

³onkee ano otandi ke ku komba po negumbo lyoye, ngaashi naanaa nda ningi Jeroboam.

⁴Omukwanezimo lyoye kehe ta sile moshilando, ota ka lika po koombwa, naangoka ta sile melundu, ota ka lika po koontsa.”

⁵Ashihe shilwe shoka Baasha a ningi niilonga ye ayihe yuufule oya nyolelwa membo lyondjokonona yaakwaniilwa yaIsrael,

⁶Baasha okwa si nokwa fumvikwa muTirza, nomwana Ela okwe mu landula muukwaniilwa.

⁷Elaka ndiyaka lyOmuwa tali popi Baasha negumbo lye, olya li lya pewa omuhunganeki Jehu moluulunde mboka wa ningwa kuBaasha, sho a yono kOmuwa. Okwa tukulutha ondjahi yOmuwa, hamoluuwinayi auke mboka a ningi ngaashi naanaa omukwaniilwa Jeroboam, ihe oshoka a dhipaga po ezimo lyaJeroboam alihe.

⁸Momumvo omutimilongombali nahamano gwepangelo lyaAsa, omukwaniilwa gwaJuda, Ela lyaBaasha okwa ningi omukwaniilwa gwaIsrael, nokwa lele muTirza omimvo mbali.

⁹Gumwe gwomaambala ye Simri, ngoka a li ondjayi yetata lyomatembakwiita okwe mu uvanene monanguwi. Esiku limwe muTirza Ela okwa li a kolwa maandjaArza, ngoka a li ha tonatele muuwa.

¹⁰Simri okwe ya megumbo e ta dhipaga Ela, nokwe mu landula muukwaniilwa. Shika osha ningwa momumvo omutimilongombali nomutiheyali gwepangelo lyaAsa, omukwaniilwa gwaJuda.

¹¹Nanziya Simri sho a ningi omukwaniilwa, okwa dhipaga po ezimo alihe lyaBaasha. Ina hupitha omulumentu nando ogumwe gwomezimo ndyoka nenge kuume ke.

¹²Osho Simri a dhipaga po ezimo alihe lyaBaasha pahapu ndhoka Omuwa a popi Baasha komuhunganeki Jehu.

¹³Molwiimenka yawo nomolwashoka ya fala Israel muulunde, Baasha nomwana Ela oya pendutha ondjahi yOmuwa, Kalunga kaIsrael.

¹⁴Ashihe shilwe shoka Ela a ningi, osha nyolelwa membo lyondjokonona yaakwaniilwa yaIsrael.

¹⁵Momumvo omutimilongombali naheyali gwepangelo lyaAsa, omukwaniilwa gwaJuda, Simri okwa lele Israel omasiku gaheyali e li muTirza. Omatanga gAaisraeli oga li ga kondeka oshilando Gibbeton muFilistia.

¹⁶Sho gu uvu kutya Simri okwa uvanene omukwaniilwa monanguwi nokwe mu dhipaga, oga kwaniileke ondjayi yiita Omri, a kale omukwaniilwa gwaIsrael.

¹⁷Omri nomatanga ge oya thigi po Gibbeton e taa yi, ya ka kondeke Tirza.

¹⁸Simri sho a mono kutya oshilando osha matukilwa, okwa yi mohote yomeni lyombala e ta tomeke ombala omulilo nokwa sile mo.

¹⁹Shika osha ningwa molwokuyona kwe kOmuwa. Ngaashi omutetekeli gwe Jeroboam, naye wo okwa geyitha Omuwa nuulunde we mwene nasho a tula Israel muulunde.

²⁰Ashihe shilwe shoka Simri a ningi nasho a ningile omukwaniilwa oshinkumungu, oya nyolelwa membo lyondjokonona yaIsrael.

²¹Aaisraeli oya li ya topoka: yamwe yomuyo oya li ya hala ya kwaniileke Tibni yaGinat, nayamwe oya gama kuOmri.

²²Pehulilo mboka ya gama kuOmri, oya sindana. Tibni a si, naOmri a ningi omukwaniilwa.

²³Osho ngaaka momumvo omutimilongondatu nogwotango gwepangelo lyaAsa, omukwaniilwa gwaJuda, Omri okwa ningi omukwaniilwa gwaIsrael nokwa lele omimvo omulongo nambali. Omimvo hamano dhotango okwa lele e li muTirza.

²⁴Nena okwa landa oshikulundundu shaSamaria iimaliwa yiisiliveli omayuvi gahamano komusamane gumwe, edhina lye Shemer. Omri okwa tungu ko oshilandohote e te shi luku Samaria, e shi lukile Shemer, mwene gwoshikulundundu.

²⁵Omri okwa yono kOmuwa e vule ayehe mbeyaka ye mu tetekela.

²⁶Okwa li a fa Jeroboam, okwa tukulutha ondjahi yOmuwa, Kalunga kaIsrael, nuulunde we nasho a fala aantu muulunde nomokusimaneka iimenka.

²⁷Ashihe shilwe shoka Omri a ningi niilonga ye ayihe oya nyolelwa membo lyondjokonona yaakwaniilwa yaIsrael.

²⁸Omri okwa si nokwa fumvikwa muSamaria, nomwana Ahab okwe mu landula muukwaniilwa.

²⁹Momumvo omutimilongondatu nahetatu gwepangelo lyomukwaniilwa Asa, Ahab yaOmri okwa ningi omukwaniilwa gwaIsrael nokwa lele muSamaria omimvo omilongo mbali nambali.

³⁰Okwa yono kOmuwa e vule aatetekeli ye ayehe.

³¹Kasha li she mu gwanena okuyona ngaashi omukwaniilwa Jeroboam; okwa pitilile po e ta hokana Isebel, omuna gwomukwaniilwa gwaSidon, Etbaal, nokwa longele Baal.

³²Okwa tungile Baal otempeli muSamaria, e mu ningile oshiyambelo e te shi tula motempeli.

³³Okwa dhike wo oshiyelekela shoshikalungakiintu Asheera. Okwa tukulutha unene ondjahi yOmuwa, Kalunga kaIsrael, e vule aakwaniilwa yaIsrael ayehe ye mu tetekelele.

³⁴Muuyuni we Hiel gwokuBetel okwa tungulula Jeriko. Ihe ngaashi Omuwa a popitha nale Josua yaNun, Hiel okwa kanitha omwanamati osheeli Abiram, sho a fulu omukanka gwaJeriko, nomwanamati onkelo Segub, sho a kula omiyelo dhasho.