Read Oshindonga-Ombiimbeli Ondjapuki 1 AAKWANIILWA 22 Bible Online

1 AAKWANIILWA 22 - Oshindonga-Ombiimbeli Ondjapuki bible

1 AAKWANIILWA 22

¹Pokati kaSiria naIsrael opwa li ombili omimvo mbali dha landula ko,

²ihe momumvo omutitatu omukwaniilwa gwaJuda Jehosafat okwa ka talela po omukwaniilwa gwaIsrael Ahab.

³Ahab okwa pula omalenga ge a ti: “Matsa omolwashike inaatu ninga nando osha, tu kuthe ko Ramot shaGilead komukwaniilwa gwaSiria? Ndishi oshetu!”

⁴Ahab nokwa pula Jehosafat ta ti: “Oto ka ya pamwe nangame, tu ka homone Ramot?” Jehosafat okwa yamukula a ti: “Ondi ilongekidha nde ku fa nosho wo aakwiita yandje naakawilinkambe yandje.

⁵Ihe tango tu puleni Omuwa.”

⁶Ahab okwi ithanene mo aahunganeki ye thike lwopomathele gane, e te ya pula ta ti: “Nandi ye ndi ka homone Ramot nenge aawe?” Oya yamukula ya ti: “Shi matukila, Omuwa ote ku pe esindano.”

⁷Ihe Jehosafat okwa pula a ti: “Kape na muhunganeki gulwe ngoka tatu vulu oku mu pula omayele gOmuwa?”

⁸Ahab okwa yamukula a ti: “Oku na ngaa Mikaia yaImla. Ihe onde mu tonda, oshoka iha hunganekele ndje uuwanawa; aluhe uuwinayi auke.” Jehosafat okwa yamukula a ti: “Ino tya ngaaka.”

⁹Nena Ahab okwi ithana elenga lye e te li lombwele, li ka tale Mikaia nanziya.

¹⁰Aakwaniilwa mbaka yaali oya li yi inzandula moonguwo dhawo dhopaukwaniilwa e taa kuutumba kiipangelapundi yawo polupale pondje yosheelo shaSamaria, naahunganeki ayehe taa hunganeke komeho gawo.

¹¹Gumwe gwomuyo Sedekia yaKenaana okwa hambula ooniga dhiiyela iiluudhe e ta ti kuAhab: “Omuwa ta ti ngeyi: ‘Oto ka kondjitha Aasiria nooniga ndhika e to ya sindi thiluthilu.’ ”

¹²Aahunganeki yalwe ayehe oye shi koleke wo taa ti: “Indeni, mu ka kondjithe Ramot notamu ka sindana. Omuwa ote ke mu pa esindano.”

¹³Elenga ndiyaka lya li lya ka tala Mikaia, olya ti kuye: “Aahunganeki yalwe ayehe oya hunganekela omukwaniilwa elago, nangoye wo popya oohapu oombwanawa we ya fa.”

¹⁴Ihe Mikaia okwa yamukula a ti: “Otandi uvaneke kOmuwa omunamwenyo kutya otii ka popya ashike shoka ta lombwele ndje.”

¹⁵Sho e ya koshipala shomukwaniilwa Ahab, omukwaniilwa okwe mu pula a ti: “Mikaia, tse nomukwaniilwa Jehosafat natu ka homone Ramot, nenge aawe?” Mikaia okwa yamukula a ti: “Ka homoneni! Otamu ka sindana shili. Omuwa ote mu pe esindano.”

¹⁶Ahab okwa yamukula a ti: “Ngele oto lombwele ndje medhina lyOmuwa, popya oshili! Olungapi ano ndi na oku shi ku lombwela?”

¹⁷Mikaia okwa yamukula: “Ondi wete etangakwiita lyaIsrael lya halakana lya fa oonzi dhaa na omusita. NOmuwa okwa ti: ‘Aantu mbaka kaa na omukwatelikomeho; ya etheni ya ye kaandjawo nombili.’ ”

¹⁸Ahab okwa ti kuJehosafat: “Inandi shi ku lombwela kutya iha hunganekele ndje uuwanawa? Aluhe uuwinayi auke!”

¹⁹Mikaia okwa tsikile a ti: “Ngashingeyi pulakeneni shoka Omuwa ta ti! Onda mono Omuwa a kuutumba koshipangelapundi she megulu pamwe naayengeli ye ayehe ya thikama ontega naye.

²⁰Omuwa okwa pula a ti: ‘Olye ta ka kotokela Ahab, opo a ka ye a ka dhipagelwe kuRamot?’ Gumwe okwa ti ngeyi, nomukwawo okwa popi ngeyaka,

²¹sigo ombepo ya holoka komeho tayi hedha kOmuwa e tayi ti: ‘Otandi ke mu kotokela.’

²²Omuwa okwa pula a ti: ‘To mu ende ngiini?’ Ombepo oya yamukula ya ti: ‘Otandi ka popitha aahunganeki yaAhab iifundja.’ Omuwa okwa ti: ‘Inda, u ke mu kotokele. Oto ke shi tompola.’ ”

²³Mikaia okwa hulitha a ti: “Omuwa okwa ningi aahunganeki yoye, ye ku fundje. Ihe ye mwene okwa tokola kutya oto ka adhika koshiponga!”

²⁴Nena omuhunganeki Sedekia okwa yi kuMikaia e te mu dhenge kolupanda ye ta pula ta ti: “Ombepo yOmuwa oya thigi ndje po uunake, yi popye nangoye?”

²⁵Mikaia okwa yamukula: “Oto ke shi mona, uuna to ka ya mongulu yimwe yokonima u ka holame.”

²⁶Nena omukwaniilwa Ahab okwa lombwele limwe lyomomalenga ge a ti: “Kwata Mikaia, u mu fale kuAmmon, omupangeli gwoshilando, nokuJoas, omuna gwokombanda.

²⁷Ya lombwela, ye mu tule mondjedhililo yo ye mu pe oshikwiila nomeya ageke, sigo tandi galuka nda sindana.”

²⁸Mikaia okwi igidha a ti: “Ngele oto galuka wa sindana, nena Omuwa ina popitha ndje!” Oye nokwa gwedha ko a ti: “Shi pulakeneni, amuhe, shoka nda popi!”

²⁹Nena omukwaniilwa gwaIsrael Ahab nomukwaniilwa gwaJuda oya yi, ya ka homone oshilando Ramot shaGilead.

³⁰Ahab okwa ti kuJehosafat: “Ngele tatu yi molugodhi, otandi ki idhimbika, ihe ngoye zala oonguwo dhoye dhopaukwaniilwa.” Osho ngaaka omukwaniilwa gwaIsrael a yi molugodhi i idhimbika.

³¹Omukwaniilwa gwaSiria okwa li a lombwele oondjayi dhe dhomatembakwiita omilongo ndatu nayaali, yaa homone nando olye kakele komukwaniilwa gwaIsrael.

³²Sho ya mono Jehosafat, yo ayehe oya dhiladhila kutya oye omukwaniilwa gwaIsrael, noye mu galukile, ye mu ponokele. Ihe Jehosafat sho a kugu onkugo,

³³oya dhimbulula kutya nani haye omukwaniilwa gwaIsrael, noye mu etha.

³⁴Polumwe omukwiita Omusiria oku umbu omposi oshikuti sha yaha omukwaniilwa Ahab pokati kehuuyanza nongama ye. Ahab okwi igidha omuhingi gwetembakwiita lye a ti: “Nda yahwa, galula, tu ze mo molugodhi!”

³⁵Olugodhi sho lwa li lwa kwata miiti, omukwaniilwa Ahab okwa kala e egamena metemba lye lya taalela Aasiria. Ombinzi oya popoka ya zi moshaho e tayi ningi etente polupanda lwetemba, nokongulohi okwa si.

³⁶Etango sho tali ningine, onkundana ya taandele mAaisraeli tayi ti: “Shaa muntu na shune koshilongo shaandjawo nokoshilando shaandjawo!”

³⁷Osho ngaaka omukwaniilwa Ahab a si, nomudhimba gwe ogwa falwa kuSamaria e tagu fumvikwa.

³⁸Etembakwiita lye olya yogelwa pedhiya lyaSamaria, mpoka oombwa dha latha ombinzi ye, noohonda dhi iyogele po. Osha ningwa ngaashi Omuwa a tile.

³⁹Ashihe shilwe shoka omukwaniilwa Ahab a longele, ehokololo lyuuwa we wa tungilwa uulenga womayego goondjamba niilando mbyoka a tungu, oya nyolelwa membo lyondjokonona yaakwaniilwa yaIsrael.

⁴⁰Peso lye omwana Ahasia okwe mu landula muukwaniilwa.

⁴¹Momumvo omutine gwepangelo lyomukwaniilwa gwaIsrael Ahab, Jehosafat yaAsa okwa ningi omukwaniilwa gwaJuda.

⁴²Okwa li e na omimvo omilongo ndatu nantano, nokwa lele muJerusalem omimvo omilongo mbali nantano. Yina oAsuba yaShilhi.

⁴³Okwa ningi shoka shu uka momeho gOmuwa a fa he Asa, ngoka e mu tetekela. Ihe omahala giinonoma yuupagani kaga li ga yonagulwa po, naantu oya tsikile okusaagelela omayambo nokulungunitha omatsininondjambo nkoka.

⁴⁴Jehosafat okwa panga ombili nomukwaniilwa gwaIsrael.

⁴⁵Ashihe shilwe shoka Jehosafat a longo, iilonga ye yuupenda ayihe nomalugodhi ge, oga nyolelwa membo lyondjokonona yaakwaniilwa yaJuda.

⁴⁶Okwa dhimi po oshihupe shaamati mboka aaholume noohonda ndhoka dha li tadhi longele piiyambelo yuupagani, mboka ya hupile ko muuyuni wahe Asa.

⁴⁷Evi lyaEdom olya li lyaa na omukwaniilwa; olya li lya lelwa komukalelipo a tulwa po komukwaniilwa gwaJuda.

⁴⁸Omukwaniilwa Jehosafat okwa tungu oosikepa dhenenefuta, dhi ka tale oshingoli kuOfir, ihe odha yonukile muEziongeber noinadhi thayila we.

⁴⁹Nena omukwaniilwa gwaIsrael Ahasia okwa gandja aantu ye, ya thayile pamwe naantu yaJehosafat, ihe Jehosafat okwa tindi.

⁵⁰Jehosafat okwa si nokwa fumvikwa moombila dhaakwaniilwa moshilando shaDavid, nomwana Joram okwa ningi omukwaniilwa peha lye.

⁵¹Momumvo omutimulongo naheyali gwepangelo lyaJehosafat, omukwaniilwa gwaJuda, Ahasia yaAhab okwa ningi omukwaniilwa gwaIsrael e ta lele muSamaria omimvo mbali.

⁵²Okwa yono kOmuwa nokulandula ondjila ombwinayi yahe Ahab nayina Isebel noyomukwaniilwa Jeroboam, ngoka a yonitha Aaisraeli.

⁵³Okwa simaneke nokulongela Baal a fa he nokwa tukulutha ondjahi yOmuwa, Kalunga kaIsrael.