Read Oshindonga-Ombiimbeli Ondjapuki 1 AAKWANIILWA 4 Bible Online

1 AAKWANIILWA 4 - Oshindonga-Ombiimbeli Ondjapuki bible

1 AAKWANIILWA 4

¹Salomo okwa li omukwaniilwa gwaIsrael alihe,

²naambaka taa landula mpaka, oyo omalenga ge omanene: Omuyambi oAzaria yaSadok.

³Oohamushangampangu oyo Elihoref naAhija, aana yaShisha. Elenga lyiiniwe oJehosafat yaAhilud.

⁴Ondjayi yiita oBenaia yaJehoiada. Aayambi oSadok naAbiatar.

⁵Omukuluntu gwaaniikandjo oAzaria yaNatan. Omugandjindunge omwiinekelwa omuyambi Sabud yaNatan.

⁶Omukuluntu gwaamati yuuwa oAhishar. Elenga ekuluntu lyiilongo yethiminiko oAdoniram yaAbda.

⁷Salomo okwa langeke aalumentu omulongo nayaali aaniikandjo muIsrael. Oya li haa etele omukwaniilwa naantu ye iikulya taa kutha kiikandjo yawo, shaa ngoka ota sile omwedhi gumwe oshimpwiyu momumvo.

⁸Mpaka otapa landula omadhina gomalenga omulongo nagaali niikandjo mbyoka ya li taa tonatele. Omuna gwaHur: oshilongo shokoondundu dhaEfraim.

⁹Omuna gwaDeker: iilando Makaz, Shaalbim, Bet Shemesh, Elon naBetahanan.

¹⁰Omuna gwaHesed: Arubbot naSoko noshitopolwa ashihe shaHefer.

¹¹Omuna gwaAbinadab, ngoka a li a hokana omuna gwaSalomo Tafat: omukuma aguhe gwaDor.

¹²Baana yaAhilud: iilando Taanak, Megiddo nomukuma aguhe popepi naBetshan, popepi noshilando Saretan kuumbugantu woshilando Jesreel sigo oshilando Abel Mehola noshilando Jokmeam.

¹³Omuna gwaGeber: Oshilando Ramot muGilead nomikunda dholudhi lwaJair moluvalo lwaManasse muGilead nomukuma gwaArgob muBaasha, iilando iinene omilongo hamano yi na omadhingililokuma niipateko yoshikushu pomiyelo.

¹⁴Ahinadab yaIddo: oshikandjo shaMahanaim.

¹⁵Ahimaaz, ngoka a hokana Basemat yaSalomo: oshitopolwa shaNaftali.

¹⁶Baana yaHushai: omukuma gwaAser noshilando Bealot.

¹⁷Jehosafat yaParuak: oshitopolwa shaIssaskar.

¹⁸Shimei yaEla: oshitopolwa shaBenjamin.

¹⁹Geber yaUri: omukuma gwaGilead, ngoka gwa li tagu lelwa komukwaniilwa gwAayamori Sihon nomukwaniilwa gwaBaasha Og. Kakele nee kaambaka omulongo nayaali, okwa li ngoloneya gumwe mevi alihe.

²⁰Aajuda nAaisraeli oya li yaa shi kuyalulwa ya fa ehekevi lyomooha dhefuta; oya li e taa nu noya li ye li nawa.

²¹Oshilongo shaSalomo osha kwatelela mo iigwana ayihe okuza komulonga Eufrat, sigo okuFilistia nokoongamba dhaEgipiti. Oya gandja oompale kuye noya li aapangelwa ye okukalamwenyo kwe akuhe.

²²Iikulya maandjaSalomo mesiku kehe oya li oolata omayuvi gatano dhuusila womunziya, noolata omayuvi omulongo dhuusila womufululwa,

²³oompunya omulongo dho ondodhwa nodha tekulilwa miigunda, noonzi ethele, kakele koomenye, oombambi, uupundja noombaka.

²⁴Salomo okwa lele evi alihe lyokuuninginino womulonga Eufrat okuza kuTifsak puEufrat sigo okuGaza kuuninginino. Aakwaniilwa ayehe kuuninginino waEufrat oya li haa vulika kuye nokwa li e na ombili niilongo ayihe yopuushiinda.

²⁵Manga a li e na omwenyo, aantu ayehe muJuda nomuIsrael oya li kaaye na mbudhi yasha. Egumbo kehe olya li li na omiviinu nomikwiyu dhalyo.

²⁶Salomo okwa li e na uukambe wokuhila omatembakwiita ge omayuvi omilongo ne noonkawilwankambe omayuvi omulongo nagaali.

²⁷Aaniikandjo ye omulongo nayaali shaa ngoka momwedhi moka u uthilwa olufo okwe etele omukwaniilwa Salomo iipalutha te yi pumbwa ye mwene naayehe mboka haa li mombala; aluhe oye eta ayihe tayi pumbiwa.

²⁸Omunashikandjo kehe okwe eta wo oshitopolwa she shiishokelya nomwiidhi peha mpoka ya pumbiwa moluukambe wokuhila omatembakwiita nokoonani.

²⁹Kalunga okwa pe Salomo owino tau kumitha noondunge nomayele kaage shi kuyelekwa.

³⁰Salomo okwa li omunandunge e vule aanandunge ayehe yokUuzilo nomuEgipiti.

³¹Okwa li omunandungelela e vule aantu ayehe; omunandunge e vule Omuesrahi Etan naHeman, Kalkol naDarda, aana yaMahol. Esimano lye olya taandele niilongo ayihe yomuushiinda.

³²Okwa toto omayeletumbulo omayuvi gatatu nomaimbilo oga li ge vule eyuvi.

³³Okwa tanga omiti niimeno, omiti omisendeli dhokuLibanon sigo oshisopi shoka hashi mene komakuma. Okwa tanga wo iinamwenyo, oondhila, iihono noohi.

³⁴Aakwaniilwa yomuuyuni auhe oya kundana owino we e taa tumu aantu, ye ye ye mu pulakene.