Read Oshindonga-Ombiimbeli Ondjapuki 1 AAKWANIILWA 6 Bible Online

1 AAKWANIILWA 6 - Oshindonga-Ombiimbeli Ondjapuki bible

1 AAKWANIILWA 6

¹Omimvo omathele gane nomilongo hetatu sho dha piti po, Israel sho a tembuka muEgipiti, momumvo omutine gwelelo lyaSalomo, momwedhi omutiyali, omwedhi Ziv, Salomo okwa tameke okutunga otempeli.

²Meni oya li oometa 27 muule, oometa 9 momutamo noometa 13,5 muule wopombanda.

³Ondjugo yethikilo oya li oometa 4,5 momutaandelo noometa 9 momutamo yi thike petsalihangano.

⁴Omakuma gotempeli oga li ge na oombululu dhomakende dha ninga ooshona kondje dhi vule meni.

⁵Komakuma gopombanda koombinga adhihe mbali nokonima yotempeli okwa tungilwa etungo lyoponto moontala ndatu li na omala gomutumbo gwoometa 2,2.

⁶Ela kehe montala yotango olya li oometa 2,2 momutamo, montala yopokati oometa 2,7 nomontala ontintatu oometa 3,1. Ekuma lyotempeli montala kehe olya li li na epepe, opo oontala dhi kankame kekuma dhaa na omiti dha tungilwa mo.

⁷Omamanya ngoka ga tungithwa otempeli, oga hongelwa poshikuthilo shago; inaku uvika nando ekonkolo lyosilwa, ewi lyekuya nenge lyoshilongitho kehe shosheela, manga otempeli ya li tayi tungwa.

⁸Osheelo shokuya montala yopokati metungo lyoponto osha li kuumbugantu wotempeli; iikolo oya li tayi fala montala ontiyali nontintatu.

⁹Omukwaniilwa Salomo okwa mana okutunga otempeli. Okwa tula mo ontala ya tungwa nomiti niipilangi yomisedeli.

¹⁰Etungo lyoponto lyoontala ndatu olya li lya tungilwa komakuma gopombanda gotempeli lya kwatakanithwa nago nomiti dhomisedeli. Montala kehe omwa li omala goometa 2,2 momutumbo.

¹¹Omuwa okwa ti kuSalomo:

¹²“Ngele to vulika kiipango yandje ayihe nokomautho gandje, otandi ke ku ningila shoka ndu uvanekele ho David.

¹³Otandi ka kala mAaisraeli motempeli ndjika to tungu noitandi ke ya etha nando.”

¹⁴Osho ngaaka Salomo a hulitha okutunga otempeli.

¹⁵Meni lyomakuma omwa li mwa siikilwa niipilangi yomisedeli okuza kolupanda sigo oombuli, nolupanda olwa li lwa tungwa niipilangi yomikiperesi.

¹⁶Ela lyomeni, ndyoka hali ithanwa Ehala lyUuyapukielela, olya li lya tungilwa kosindo yotempeli. Olya li li na oometa 9 momutaandelo nolya li lya topolwa ko kiipilangi yomisedeli ya za kolupanda sigo omoombuli.

¹⁷Ela li li komeho gEhala lyUuyapukielela, olya li oometa 18 momutaandelo.

¹⁸Miipilangi yomisedeli omwa takelwa uulenga wuutanga wamuthithi noongala; meni amuhe omwa pangelwa niipilangi yomisedeli, opo omamanya ngoka ga tunga omakuma gaa monike.

¹⁹Mokati kotempeli omwa tungwa ela lyomeni, moka tamu kala oshikethahangano shOmuwa.

²⁰Ela ndika lyomeni olya li li na omutaandelo gwoometa 9, omutamo gwoometa 9 nomutumbo gwoometa 9, ayihe oya kolongwa noshingoli sho shene. Oshiyambelo osha siikilwa niipilangi yomisedeli.

²¹Meni lyotempeli omwa kolongwa noshingoli, omalyenge goshingoli oga shindjakanithwa posheelo shela lyomeni, ndyoka lya kolongithwa wo oshingoli.

²²Mokati kotempeli amuhe omwa kolongwa noshingoli nongaashi wo oshiyambelo shomEhala lyUuyapukielela.

²³Aakerubi yaali yuule woometa 4,4 ya hongwa moshiti shomuolivi, oya tulwa mEhala lyUuyapukielela.

²⁴Ayehe yaali oya li ya faathana muunene nomolupe. Shaa ngoka okwa li e na omawawa gaali, ewawa kehe oli thike puule woometa 2,2, opo oshinano okuza kondungu yewawa limwe sigo okondungu yekwawo oometa 4,4.

²⁷Oya tulwa kombinga nombinga mEhala lyUuyapukielela, omawawa ga yalalekwa taga hala okugumathana mokati kela ndyoka, manga omakwawo gu uka komakuma.

²⁸Aakerubi yaali oya kolongithwa oshingoli.

²⁹Omakuma agehe gela enene motempeli oga tulwa uulenga womafano gaakerubi, gomilunga nogoongala.

³⁰Olupanda olwa kolongwa wo noshingoli.

³¹Osheelo shomiyelo mbali dhomawawa dha pangelwa miipilangi yomiolivi, odha tulwa meha lyoposheelo lyokuya mEhala lyUuyapukielela; kombanda yomiyelo okwa tulwa etivu.

³²Omiyelo odha tulwa uulenga womafano gaakerubi, gomilunga nogoongala. Omiyelo, aakerubi nomilunga oya kolongithwa oshingoli.

³³Iikulo noshipamba shosheelo shokuya motempeli oya pangelwa miipilangi yomiolivi.

³⁴Okwa li omiyelo mbali dhokwiigonya dhiipilangi yomikiperesi

³⁵nodha tulwa uulenga womafano gaakerubi, gomilunga nogoongala dha kolongwa noshingoli.

³⁶Ehala lyomeni komeho gotempeli olya tungilwa edhingililokuma lya tentekwa iiyalo itatu yomamanya ga hongwa noshiyalo shimwe shomiti dhomisendeli dha hongwa.

³⁷Omukanka gwotempeli ogwa tamekwa momwedhi omutiyali, omwedhi Ziv, momumvo omutine gwepangelo lyaSalomo.

³⁸Momwedhi omutihetatu, omwedhi Bul, momumvo omutimulongo nagumwe gwepangelo lyaSalomo, otempeli oya li ya pwa thiluthilu, naanaa ngaashi ya fanekwa. Oya pula Salomo omimvo heyali oku yi tunga.