Read Oshindonga-Ombiimbeli Ondjapuki 1 ONDJALULO 13 Bible Online

1 ONDJALULO 13 - Oshindonga-Ombiimbeli Ondjapuki bible

1 ONDJALULO 13

¹Omukwaniilwa David okwa kundathana naawiliki ayehe, mboka yaalumentu eyuvi naamboka yaalumentu ethele.

²Nena okwa lombwele Aaisraeli ayehe e ta ti: “Ngele otamu shi pitika nongele olyo ehalo lyOmuwa, Kalunga ketu, natu tumeni kaanashilongo shetu ayehe nokaayambi nokAalevi komikunda dhawo, ya gongale pamwe natse.

³Nena otatu ka tala oshikethahangano, shoka sha li shaa niwe nasho muuyuni waSaul.”

⁴Aantu oya li ya hokwa omadhiladhilo ngoka noye ga zimine.

⁵David okwa gongele Aaisraeli ya zi oshilongo ashihe, okuza kongamba yaEgipiti muumbugantu sigo uupitilo waHamat muumbangalantu, opo ya kuthe oshikethahangano kuKiriat Jearim ye shi fale kuJerusalem.

⁶David okwa yi nAaisraeli koshilando Baala, kokutya Kiriat-Jearim, moshikandjo shaJuda, ya ka tale ko oshikethahangano shaKalunga shi na edhina lyOmuwa a kuutumba kombanda yaakerubi.

⁷Oya kutha oshikethahangano maandjaAbinadab e taye shi tula metemba epe. Ussa naAhio oya hingi etemba,

⁸manga David naantu ayehe taa tanta ya mana mo okusimaneka Kalunga. Oyi imbi yo taa hiki iihikomwa — uuharpa, oontunda, oosimbaale nomankuma.

⁹Sho ya thiki kolupale lwaKidon, oonani odha lyatakana, naUssa okwa ganeke oshikaha she, a shige oshikethahangano.

¹⁰Ohaluka Omuwa okwa geele Ussa e te mu dhipaga, molwashoka okwa gumu oshikethahangano. Okwa sile montaneho yOmuwa,

¹¹onkee eha ndyoka lya lukwa Perez Ussa sigo onena ndji. David okwa geye, oshoka Omuwa a geele Ussa mondjahi.

¹²Nena David okwa li a tila Kalunga e ta ti: “Otandi vulu ngiini okupitika, oshikethahangano shi ye kungame?”

¹³David ine shi fala we kuJerusalem, ihe okwe shi thigi paandjaObed Edom, omvalele yomoshilando Gat.

¹⁴Osha kalele nkoka oomwedhi ndatu, Omuwa nokwa yambeke egumbo lyaObed Edom naashihe e shi na.