Read Oshindonga-Ombiimbeli Ondjapuki 1 ONDJALULO 15 Bible Online

1 ONDJALULO 15 - Oshindonga-Ombiimbeli Ondjapuki bible

1 ONDJALULO 15

¹David okwi itungile egumbo lye mwene moshilando shaDavid. Okwa longekidhile wo oshikethahangano shaKalunga eha e te shi dhikile etsali.

²Nena okwa ti: “Aalevi ayeke ye na okuhumbata oshikethahangano, oshoka oyo ayeke ya hogololwa kOmuwa oku shi humbata noku mu longela sigo aluhe”.

³David okwa hiya Aaisraeli ayehe, ye ye kuJerusalem, opo ya ka fale oshikethahangano pehala mpoka e shi longekidhila.

⁴Okwi ithana oluvalo lwaAaron nAalevi.

⁵KAalevi yoludhi lwaKohat okwa zi Uriel, omukuluntu gwoludhi lwe lwaakwazimo 120;

⁶koludhi lwaMerari okwa zi Asaia, omukuluntu gwaalumentu 220;

⁷koludhi lwaGerson oJoel, omukuluntu gwaalumentu 130;

⁸koludhi lwaElisafan oShemaia, omukuluntu gwaalumentu 200;

⁹koludhi lwaHebron oEliel, omukuluntu gwaalumentu 80;

¹⁰nokoludhi lwaUssiel oAminadab, omukuluntu gwaalumentu 112.

¹¹David okwa hiya aayambi Sadok naAbiatar nAalevi yahamano: Uriel, Asaia, Joel, Shemaia, Eliel naAminadab.

¹²Okwa ti kAalevi: “One aawiliki yoludhi lwAalevi. Iyapuleni pamwe nAalevi aakweni, opo mu ete oshikethahangano shOmuwa, Kalunga kaIsrael, pehala ndyoka nde shi li longekidhila.

¹³Oshoka ne kamwa li ko tango, mu shi humbate, Omuwa, Kalunga ketu, okwe tu geele, oshoka inatu mu simaneka, ngaashi twa li tu na oku shi ninga.”

¹⁴Nena aayambi nAalevi oyi iyapula, opo ya ka lundulule ko oshikethahangano shOmuwa, Kalunga kaIsrael.

¹⁵Aalevi oye shi humbata komitenge komapepe gawo, ngaashi Omuwa a lombwelele Moses.

¹⁶David okwa lombwele aawiliki yAalevi, ya hogolole mokati kAalevi mboka taa imbi omahambelelondjimbo naamboka taa hiki uuharpa, iiketala noosimbaale.

¹⁷Momaludhi gaayimbi oya hogolola aalumentu mbaka ya hike oosimbaale dhiikushu: Heman yaJoel nomukwazimo lye Asaf yaBerekia naEtan lyaKushaia gwomoludhi lwaMerari. Aalevi mbaka oya hogololwa oku ya yakula taa hiki uuharpa womawi gopombanda: Sakaria, Jaasiel, Shemiramot, Jehiel, Unni, Eliab, Maaseia naBenaia. Mokuhika uuharpa womawi gopevi oya hogolola Aalevi mbaka: Mattitia, Elifelehu Mikneia, Azazia naalangeli yotempeli Obed Edom naJeiel.

²²Kenania sho a li onkulungu yokuhika, okwa hogololwa omukuluntu gwaahiki Aalevi.

²³Berekia naElkana pamwe naObed Edom naJehia oya hogololwa aalangeli yoshikethahangano. Aayambi Shebania, Josafat, Netanel, Amasai, Sakaria, Benaia naElieser oya hogololelwa okuhika omankuma komeho goshikethahangano.

²⁵Omukwaniilwa David, aakuluntu yaIsrael noondjayi dhiita oya yi kaandjaObed Edom, ya ka tale ko oshikethahangano, noya dhana oshituthi oshinene.

²⁶Oya yamba oongombe oontsezi heyali noonzi oontsezi heyali, opo ya kale yi itula kutya Kalunga a kwathe Aalevi mboka ya humbata oshikethahangano.

²⁷David okwa li a zala elwaakani lyoliina ombwanawa, nosho wo aahiki yuuhumba, omuwiliki gwawo Kenania nAalevi mboka ya humbata oshikethahangano. David okwa li a zala omapepenguwo.

²⁸Aaisraeli ayehe oya thindikile oshikethahangano kuJerusalem taa ligola, taa kugilile kenyanyu yo taa hiki omankuma, oohiya, iiyaha nuuharpa.

²⁹Oshikethahangano sho sha thiki moshilando, Mikal yaSaul okwa talele mekende e ta mono omukwaniilwa David ta tanta ye ta nuka kenyanyu, e te mu dhini.