Read Oshindonga-Ombiimbeli Ondjapuki 1 ONDJALULO 18 Bible Online

1 ONDJALULO 18 - Oshindonga-Ombiimbeli Ondjapuki bible

1 ONDJALULO 18

¹Konima yaambika omukwaniilwa David okwa matukile ishewe Aafilisti, okwe ya dhenge e ta hulitha po epangelo lyawo lyokulela oshilando Gat nomikunda dhe shi kunduka.

²Okwa dhenge wo Aamoabi, mboka ya ningi aapiya ye nohaye mu fendelele.

³Nena David okwa matukile Hadadeser, omukwaniilwa gwaZoba, ombinga yimwe yaSiria. Shika osha ningwa popepi noshikandjo shaHamat, oshoka Hadadeser okwa li mondjila ta ka koleka epangelo lye miitopolwa mbyoka mpoka omulonga Eufrat gwa tameka.

⁴David okwa kwata po eyuvi lyomomatembakwiita ge, aakawilinkambe omayuvi gaheyali, naakwiita yokolupadhi omayuvi omilongo mbali. Okwa hupitha ko uukambe wa gwana omatembakwiita ethele e ta lemaneke auhe ulwe.

⁵Aasiria yokuDamaskus sho ya tumu etangakwiita lyokukwatha omukwaniilwa Hadadeser, David okwe li ponokele e ta dhipaga aalumentu omayuvi omilongo mbali nagaali.

⁶Nena okwa yungu oontanda dhuukwiita koshilongo shawo, noya ningi aapiya ye haye mu fendelele oompale. Omuwa okwa ningi David omusindani kehe nkoka a yile ko.

⁷David okwa hakana ko iikandekitho yoshingoli ya li hayi humbatwa kaambala yaHadadeser e te yi fala kuJerusalem.

⁸Okwa yugu wo iikushu oyindji kuTibhat naKun, iilando hayi lelwa kuHadadeser. (Konima Salomo okwa longitha iikushu mbika, yi ninge ondama yoshikushu, oongundhi niilongitho yoshikushu yomotempeli.)

⁹Omukwaniilwa Toi gwokuHamat okwa kundana kutya David a dhenge etangakwiita alihe lyaHadadeser.

¹⁰Toi okwa tumu omwana Joram, a kunde omukwaniilwa David noku mu halela elago molwesindano lye, sho a sindi Hadadeser, oshoka Hadadeser okwa adhika a kondjitha Toi olule. Joram okwa faalele David omulongelo gwoshingoli, oshisiliveli noshikushu.

¹¹Omukwaniilwa David okwe yi yoololele elongelokalunga pamwe niisiliveli niingoli mbyoka a yugu kiigwana mbyoka a sindi: Edom, Moab, Ammon, Filistia naAmalek.

¹²Abisai, ngoka omuna gwanekulu Zeruia, okwa dhenge Aaedom mEkango lyomongwa e ta dhipaga po omayuvi omulongo nagahetatu yomuyo.

¹³Okwa yungu oontanda dhuukwiita muEdom alihe, naantu yaankoka oya ningi aapiya yomukwaniilwa David. Omuwa okwa sinditha David shaa nkoka a yile ko.

¹⁴David okwa lele Israel alihe nokwa kala a kotoka, aantu ye ya ningwe nawa noya kalwe nayo nuuyuuki.

¹⁵Joab, mumwayina gwaAbisai, okwa li ondjayi yaakwiita; Jehosafat yaAhilud okwa li amushangandjayi;

¹⁶Sadok yaAhitub naAhimelek yaAbiatar oya li aayambi; Seraia okwa li amushangampangu;

¹⁷Benaia yaJehoiada okwa li omukuluntu gwaalangeli yaDavid, naana yaDavid oya kala ye na eha lya simana meyakulo lye