Read Oshindonga-Ombiimbeli Ondjapuki 1 ONDJALULO 20 Bible Online

1 ONDJALULO 20 - Oshindonga-Ombiimbeli Ondjapuki bible

1 ONDJALULO 20

¹Oshitemamvula sha landula ko, pethimbomumvo aakwaniilwa haa hingi iita, Joab okwa pititha mo etangakwiita a matukile oshilongo shaAmmon, ihe omukwaniilwa David okwa thigala muJerusalem. Oya kondeke oshilando Rabba, ye shi matukile e taye shi hanagula po.

²Oshimenka shAayammoni, edhina lyasho Molek, osha li shi na oshishani shoshitalendi shimwe. Musho omwa li okawe kondilo. David okwe shi kutha po e te shi zala komutse gwe. Okwa yugulula omaliko ogendjigendji moshilando.

³Okwa kutha mo aantu yomoshilando e te ya tula miilonga yiisaaha, yoombike noyomakuya. Aantu ayehe yomomikunda dhilwe dhAayammoni okwe ya ningile sha faathana. Oye nokwa galukile naantu ye kuJerusalem.

⁴Konima yethimbo iita oya tukuka ishewe pokati kAafilisti nAaisraeli puGeser. Shika osha ningwa, sho Sibbekai gwomuHusha a dhipaga omulefule edhina lye Sippai, nAafilisti oya sindika.

⁵Opwa li ishewe olugodhi olukwawo nAafilisti, naElhanan lyaJair a dhipaga Lahmi, mumwayina gwaGoliat gwomuGat, ngoka a li e na egonga li na oshikwatelo shi thike pondisimbumu.

⁶Okwa li ishewe olugodhi olukwawo muGat, moka mwa li omulefule e na ominwe oohamano kiikaha nokoompadhi. Oye a li oluvalo lwaalefule yonale.

⁷Okwa sheke Aaisraeli, naJonatan, omuna gwamumwayina gwaDavid Shamma, okwe mu dhipaga.

⁸Mbaka yatatu ya dhipagwa kuDavid naantu ye, oya li oluvalo lwaalefule yokuGat.