Read Oshindonga-Ombiimbeli Ondjapuki 1 ONDJALULO 26 Bible Online

1 ONDJALULO 26 - Oshindonga-Ombiimbeli Ondjapuki bible

1 ONDJALULO 26

¹Mpaka ope na etopolo lyiilonga lyAalevi mboka ya langele otempeli. Moludhi lwaKora oMeshelemia yaKore gwomegumbo lyaAsaf.

²Okwa li e na oyanamati yaheyali. Pamapipi gawo oyo Sakaria, Jediael, Sebadia, Jatniel,

³Elam, Jehohanan naEliehoenai.

⁴Okwa li wo Obed Edom, ngoka Kalunga e mu yambeke e te mu pe aanona aamati yahetatu, ngaashi taa landula pamapipi gawo: Shemaia, Jehosabad, Joa, Sakar, Netanel,

⁵Ammiel, Issaskar naPeulletai.

⁶Osheeli shaObed Edom, Shemaia, osha li shi na oyanamati yahamano: Othni, Refael, Obed, Elsabad, Elihu naSemakia. Oya li aalumentu aanamadhina moludhi lwawo moluunongo wawo; aahugunini yaali oya li aanamaganolela.

⁸Egumbo lyaObed Edom olye eta po aalumentu ya pyokokela iilonga ye li omilongo hamano nayaali ayehe kumwe.

⁹Egumbo lyaMeshelemia olye eta po aalumentu ya pyokoka omulongo nayahetatu.

¹⁰Moludhi lwaMerari omwa li Hosa, ngoka a li e na oyanamati yane: Shimri (he okwe mu lenge omukuluntu, nando ka li sheeli),

¹¹Hilkia, Tebalia naSakaria. Megumbo lyaHosa omwa li aantu omulongo nayatatu mboka ya li aalangeli yotempeli.

¹²Aalangeli yotempeli oya li ya topolwa moongundu pamagumbo noya topolelwa iilonga motempeli ngaashi naanaa Aalevi ooyakwawo.

¹³Egumbo kehe, pwaa na yoololo, olyu umbilwa oshihogololitho, pu talike omweelo guni taa sile oshimpwiyu.

¹⁴Oshihogololitho shomweelo gwokuuzilo osha kwata Shelemia, nomwanamati Sakaria, omulumentu ngoka ha gandja aluhe omayele omawanawa, okwa kwatwa koshihogolitho shomweelo gwokuumbangalantu.

¹⁵Obed Edom okwa yoololelwa omweelo gwokuumbugantu, noyanamati oyu uthilwa okutonatela oompungulilo.

¹⁶Shuppim naHosa oyu uthilwa omweelo gwokuuninginino nomweelo gwaShelleket pepandaanda lya londa. Iilonga yomalangelo oya topolwa momalufo.

¹⁷Kuuzilo, aalangeli yahamano oya li miilonga esiku kehe, kuumbangalantu yane nokuumbugantu yane. Aalangeli yane oya kala poompungulilo esiku kehe, yaali pukehe yimwe.

¹⁸Popepi netsali kuuninginino opwa li aalangeli yane pondjila nayaali petsali lyo lyene.

¹⁹Ndhika odho oongundu dhaalangeli yomiyelo yomoludhi lwaKora noyomoludhi lwaMerari.

²⁰Aalevi yalwe ooyakwawo oya li metonatelo lyomaliko gotempeli noompungulilo dhomagano ga yapulilwa Kalunga.

²¹Ladan, gumwe gwomaana yaGerson, okwa li hekulu yoongundu dhomagumbo ogendji, mwa kwatelelwa oluvalo lwomwana Jehiel.

²²Aana yaLadan yaali yalwe, Setam naJoel, oya tonatele omaliko gomotempeli noompungulilo.

²³Iilonga oya topolelwa wo oluvalo lwaAmram, Izhar, Hebron naUssiel.

²⁴Shebuel gwoludhi lwaGersom yaMoses okwa li elenga ekuluntu lyokudhiginina omaliko gomotempeli.

²⁵Shuebuel okwa li e na ekwatathano naShelomit lya za muElieser, omumwayina gwaGersom. Elieser okwa vala Rehabia, ngoka a vala Jeshaja, he yaJoram, he yaSikri, he yaShelomit.

²⁶Shelomit naanegumbo lye oya li aatonateli yomagano agehe ga yoololelwa Kalunga komukwaniilwa David, kooyene yomikunda, kaawiliki yoongundu dhomaludhi nokoondjayi dhiita.

²⁷Oya kutha iihakanwa yimwe mbyoka ye yi yugu miita e taye yi yoololele okulongithwa motempeli.

²⁸Shelomit naanegumbo lye oya li metonatelo lyashaa shoka sha yapulilwa okulongithwa motempeli, mwa kwatelelwa omagano ge etelwe komuhunganeki Samuel, komukwaniilwa Saul, kuAbner yaNer nokuJoab, omuna gwanekulu Zeruia.

²⁹Mokati koluvalo lwaIzhar, Kenania noyanamati oya pewa eyakulo lyelelo: okudhiginina oondjalula nokutokola oontamanana dhAaisraeli.

³⁰Mokati koluvalo lwaHebron, Hashabia naanezimo lye 1 700, ayehe aalumentu ya dhenga mbanda, oya tulwa metonatelo lyiinima ayihe yomalongelokalunga noyelelo muIsrael kuuninginino womulonga Jordan.

³¹Jeria okwa li omuwiliki gwoluvalo lwaHebron. Momumvo omutimilongone David sho a li omukwaniilwa, oluvalo lwegumbo lyaHebron olwa konakonwa, naakwiita oofule yegumbo ndika oya monika ye li puJaser moshikandjo Gilead.

³²Omukwaniilwa David okwa hogolola mo aakuluntu yomagumbo 2 700 maanezimo lyaJeria e te ya langeke metonatelo lyiinima ayihe yelongelokalunga noyelelo muIsrael kuuzilo womulonga Jordan — iikandjo yaRuben, Gad naManasse kuuzilo.