Read Oshindonga-Ombiimbeli Ondjapuki ESRA 3 Bible Online

ESRA 3 - Oshindonga-Ombiimbeli Ondjapuki bible

ESRA 3

¹Momwedhi omutiheyali Aaisraeli ayehe oya li ya tula momikunda dhawo. Nena ayehe oya gongala muJerusalem.

²Josua yaJehosadak, aayambi ooyakwawo naSerubbabel yaShealtiel pamwe nezimo lye oya tungulula oshiyambelo shaKalunga kaIsrael, opo ya wape okulungunithila ko omafikilondjambo pamalombwelo ga nyolwa mompango yaMoses, omumati gwaKalunga.

³Nonando aapongekwa ya galuka, oya tila mboka ya li moshilongo, oya tungulula oshiyambelo mpoka sha li nale. Nena oya tameke okulungunithila ko omafikilondjambo ongula nongulohi kehe.

⁴Oya dhana Oshituthi shiihwa iitalala pamisindilo; esiku kehe oya yamba omafikilondjambo gu uthilwa esiku ndyoka;

⁵oya yamba wo omidhidhindjambo nomayambo gOshituthi shomwedhi omupe naangoka giituthi ayihe yilwe moka Omuwa ta simanekelwa, osho wo omayambo gomagano.

⁶Aantu nando oya li inaa tameka okutunga otempeli, oya tameke mesiku lyotango lyomwedhi omutiheyali okulungunithila Omuwa omafikilondjambo.

⁷Aantu oyu umbu ongalo yiimaliwa, opo ya fute aahongi yomamanya naanashihongelo. Oya gandja iikulya, iinuwa nomagadhi gooholivi kAatiro nAasidoni, opo ye ya etele omisendeli dhokuLibanon tadhi pitile kefuta kuJoppa. Ayihe mbika oya ningwa pazimino lyaKores, omupangeli gwaPersia.

⁸Momwedhi omutiyali gwomumvo omutiyali, sho ya galuka ye ya kehala lyotempeli muJerusalem, iilonga oya tameke. Serubbabel yaShealtiel, Josua yaJehosadak nooyakwawo, aayambi nAalevi, ayehe mboka ya zi muupika noye ya kuJerusalem, oyi itula miilonga. Aalevi ayehe yomimvo omilongo mbali nenge ye vule po oya tulwa metonatelo lyetungululo lyotempeli.

⁹Omulevi Jeshua, oyana naakwawo, naKadmiel noyana (oludhi lwaHodavia) oyi itula kumwe, ya tonatele etungululo lyotempeli. (Oya kwathwa kAalevi yoludhi lwaHenadad.)

¹⁰Aantu sho ya tameke okutula po omakankameno gotempeli, aayambi oya hiki omankuma ya zala oondjatha dhawo, nAalevi yoludhi lwaAsaf oya li ye na iikwelengi. Oya hambelele Omuwa pamalombwelo ye ga pelwe muuyuni womukwaniilwa David.

¹¹Oyi imbi taa hambelele Omuwa ye endulula taa ti: “Omuwa oye omwaanawa; esilohenda lye hali kala aluheluhe.” Aantu ayehe oyi igidha ya mana mo taa hambelele Omuwa molwaashoka omakankameno gotempeli ga tulwa po.

¹²Aayambi oyendji aakulupe, Aalevi naakuluntu yomaludhi mboka ya monene otempeli yotango, oya lili nokulililila, sho ya tala etulopo lyekankameno lyotempeli ndjika. Ihe yalwe mboka ya li ko, oya kaluluka kenyanyu.

¹³Kapwa li ngoka ta vulu okuyoolola ekaluluko lyenyanyu noondila, oshoka aantu oya kaluluka mokule noyu uvika kokulekule.