Read Oshindonga-Ombiimbeli Ondjapuki ESRA 4 Bible Online

ESRA 4 - Oshindonga-Ombiimbeli Ondjapuki bible

ESRA 4

¹Aatondi yAajuda nAabenjamin oyu uvu kutya aantu mboka ya galuka muupika, otaa tungulula otempeli yOmuwa, Kalunga kaIsrael.

²Oya yi kuSerubbabel naakuluntu yomaludhi e taa ti: “Tu pitikeni, tu tunge otempeli pamwe nane. Ndishi ohatu simaneke Kalunga gumwe, notwe mu yamba omayambo okuza komasiku ngoka, omupangeli gwaAssur Asarhaddon sho e tu tumine tu kale huka.”

³Serubbabel, Josua naakuluntu yomaludhi oya ti kuyo: “Itatu pumbwa ekwatho lyeni okutunga otempeli yOmuwa, Kalunga ketu. Otatu yi tungu tse yene, naanaa ngaashi omupangeli gwaPersia Kores e tu lombwele.”

⁴Nena aantu mboka ya adhika moshilongo, oya kambadhala okutyololokitha nokuhalutha Aajuda, opo yaa tunge we.

⁵Oya gandja oombumbo kaakwanepangelo yAapersia, opo ye ya kondjithe. Oye ya keelele ethimbo alihe lyelelo lyaKores sigo omelelo lyaDarius.

⁶Petameko lyepangelo lyaKserkses aatondi yaantu mboka ya li muJuda naJerusalem, oya nyola oontumwafo tadhi ya kondjitha.

⁷Muuyuni womupangeli Artakserkses gwaPersia Bishlam, Mitredat, Tabeel naahangani nayo oya nyolele omupangeli ontumwafo. Ontumwafo oya li ya nyolwa melaka lyOshiaramea nomoondanda dhasho.

⁸Omunashikandjo Rehum naAmushanga Shimshai oya nyolele Artakserkses ontumwafo tayi popi Jerusalem:

⁹“Rehum, omunashikandjo naShimshai, Amushanga naakwanepangelo ooyakwawo, aatokolihapu oontumwa, aatonateli nomalenga agehe, aantu ya za muErek, Babilon naSusa muElam,

¹⁰ayehe kumwe naantu mboka Asenappar omunene nomunankondo e ya tembudha maandjawo e te ya langeke moshilando Samaria nopalwe kuuninginino womulonga Eufrat.”

¹¹Ontumwafo otayi ti: “Komupangeli Artakserkses, otse aamati yoye kombinga ndjika yokuuninginino waEufrat.

¹²“Otwa hala oku ku tseyithila kutya Aajuda mboka ye ya huka ya zi miitopolwa yilwe yoshilongo shoye, oya tula muJerusalem notaa tungulula oshilando shoka shoshipwe noshondumbo. Oya tameke okutungulula omadhingililokuma notaye ke ga mana mbala.

¹³Nkeyama, oshilando shino ngele otashi tungululwa, nomadhingililokuma gasho taga opalekwa, aantu otaa ka tinda okufuta oompale, neliko lyoye otali fupipala.

¹⁴Ngashingeyi, oshoka tse oyopungoye, tatekulu, noinatu hala shika shi ningwe, otwa dhiladhila,

¹⁵u konakonithe embo lyondjokonona yoohokulu. Ngele to shi ningi, oto ka dhimbulula kutya oshilando shoka oshipwidhi okuza konale noshe etele aakwaniilwa naaleli yiikandjo uudhigu. Omolwashoka osha hanagulwa po.

¹⁶Tse ano otatu ku tseyithile kutya oshilando shika ngele tashi tungululwa nomadhingililokuma gasho taga kolekwa, nena ito ka vula we okupangela oshitopolwa shika shokuuninginino waEufrat.”

¹⁷Omupangeli okwa tumu eyamukulo tali ti: “KuRehum omunashikandjo nokuShimshai amushanga nokaakwanepangelo ooyakwawo ye li muSamaria nokuuninginino womulonga Eufrat, kundweni.

¹⁸“Ontumwafo ndjoka mwa tumu, oya leshwa kungame noya yela.

¹⁹Onda gandja elaka, ekonakono li ningwe, nosha monika mo kutya konalenale Jerusalem osha tukulila epangelo iipotha nosha li shu udha aatsindumbo naatsithi yomaminimini.

²⁰Aakwaniilwa aanankondo omo ya lele noya pangele oshitopolwa ashihe shokuuninginino waEufrat nokupula oompale nomaliko.

²¹Ano lombweleni aantu, ya mweneke etungululo lyoshilando, sigo tandi ka gandja elaka.

²²Shi ningeni mbala, opo pwaa kale oshiponga tashi etelwa aakwaniilwa.”

²³Ontumwafo yaArtakserkses sho ya leshelwa Rehum, Shimshai nooyakwawo, oya yi mbala kuJerusalem e taa indike Aajuda okutungulula oshilando.

²⁴Iilonga yotempeli oya kankekwa noya kala sigo omumvo omutiyali gwepangelo lyomupangeli gwaPersia, Darius.