Read Oshindonga-Ombiimbeli Ondjapuki ESRA 5 Bible Online

ESRA 5 - Oshindonga-Ombiimbeli Ondjapuki bible

ESRA 5

¹Pethimbo ndiyaka aahunganeki yaali, Haggai naSakaria yaIddo oya hunganeke medhina lyaKalunga kaIsrael ya lombwele Aajuda mboka ya kala muJuda naJerusalem.

²Serubbabel yaShealtiel naJosua yaJehosadak sho yu uvu elaka lyawo oya tameke okutunga otempeli muJerusalem, naahunganeki mboka yaali oye ya kwatha.

³Pethimbo ndyoka Tattenai, omunashikandjo shokuuninginino waEufrat, Shetar Bosenai naakwanepangelo ooyakwawo oye ya kuJerusalem e taa ti: “Olye e mu pe elaka, mu tunge otempeli nokutsakanitha omakuma?”

⁴Oya pula wo omadhina gaamboka ya kwatha okutunga otempeli.

⁵Ihe Kalunga okwa tonatele aawiliki yAajuda, naakwanepangelo Aapersia oya tokola okutegelela, sigo ya nyolele Darius noya mone eyamukulo lye.

⁶Ehokololo ndyoka ye li tumu komupangeli, olyo ndi:

⁷“Komupangeli Darius, lela nombili.

⁸“Nkeyama, ou na okutseya kutya tse otwa yi moshilongo shaJuda notwa mono otempeli yaKalunga omunene tayi tungululwa nomamanya omanene nomiti tadhi tulwa momakuma. Iilonga otayi ende po nawa nesiloshimpwiyu e tayi humu ko.

⁹“Otwa pula aawiliki yoshigwana, ye tu hokololele ngoka e ya pe uuthemba wokutungulula otempeli noku yi opaleka.

¹⁰Otwe ya pula wo omadhina gawo, opo tu vule oku ku yelithila nawa kutya aawiliki yiilonga mbika oolye.

¹¹“Oya yamukula ya ti: ‘Otse aapiya yaKalunga kegulu nevi, notatu tungulula otempeli ndjoka ya li ya tungwa nale ya pwa komukwaniilwa omunankondo gwaIsrael.

¹²Ihe molwaashoka ootatekulu ya geyitha Kalunga komegulu, okwe ya sinditha kuNebukadnezzar, omukwaniilwa Omukaldea gwaBabilon. Otempeli oya hanagulwa po naantu oya falwa muupika kuBabilon.

¹³Ndele momumvo gwotango gwepangelo lyaKores, omupangeli gwaBabilon, Kores okwa gandja elaka, otempeli yi tungululwe.

¹⁴Okwa gandja wo iiyuma yoshingoli noyoshisiliveli mbyoka Nebukadnezzar a li a kutha motempeli muJerusalem e te yi pungula motempeli yaBabilon. Kores okwa gandja iikwaniipangitho mbika komulumentu edhina lye Sheshbazzar e te mu langeke omunashikandjo muJuda.

¹⁵Omupangeli okwe mu lombwele, e yi shune kotempeli kuJerusalem, noku tungulule otempeli mpoka ya li nale.

¹⁶Sheshbazzar okwe ya e ta tula po omakankameno; okuza mpoka otaku tungwa ihe otempeli, ihe inayi pwa natango.’

¹⁷“Ngashingeyi, ngele tashi ku opalele, Nkeyama, konakonitha momambo gondjokonona yuuwa muBabilon, ngele oKores a gandja elaka, otempeli yi tungululwe muJerusalem, ngoye u tu tseyithile shoka wa hala moshinima shika.”