Read Oshindonga-Ombiimbeli Ondjapuki ESRA 6 Bible Online

ESRA 6 - Oshindonga-Ombiimbeli Ondjapuki bible

ESRA 6

¹Omupangeli Darius okwa gandja elaka, ku konakonwe momambo gondjokonona yuuwa ngoka ga pungulwa muBabilon.

²Moshilando Ekbatana, moshitopolwa Media, omwi itsuwa ondhinga yembo lya nyolwa ehokololo tali ti:

³“Momumvo gwotango gwepangelo lye omupangeli Kores okwa utha ngeyi: Otempeli yaKalunga muJerusalem nayi tungululwe, yi kale eha lyokuyambela omayambo. Otempeli nayi kale oometa omilongo mbali naheyali momutumbo noometa omilongo mbali naheyali momutamo.

⁴Omakuma naga tungwe ge na palufo oshiyalo shimwe shomiti kombanda yiiyalo itatu yomamanya. Omafutilo agehe naga ze moshiketha shuuwa.

⁵Iikwaniipangitho yoshingoli noyoshisiliveli mbyoka omukwaniilwa Nebukadnezzar e yi kutha motempeli yaJerusalem e te yi eta kuBabilon, oyi na okushunithwa kehala lyayo lyolela motempeli yaJerusalem.”

⁶Nena Darius okwa tumu eyamukulo tali ti: “KuTattenai, omunashikandjo shokuuninginino waEufrat, Shetar-Bosenai naakwanepangelo ooyakwawo yokuuninginino waEufrat. “Ikalekeni kokule notempeli

⁷ne inamu ipyakidhila noshinima shika. Etheni omunashikandjo gwaJuda naawiliki Aajuda ya tungulule otempeli yaKalunga pehala lyayo.

⁸Otandi mu lombwele, mu ya kwathe oku yi tunga. Omafutilo gawo naga ze miiketha yuuwa yomafendelo moshikandjo shokuuninginino waEufrat, opo iilonga yaa katekwe.

⁹Esiku nesiku, pwaa na ekwatakwato, omu na okupa aayambi muJerusalem shoka taye mu lombwele ye shi pumbwa: oontsezi oongundjuka, oonzi noonzigona dhokuyambwa omafikilondjambo gaKalunga komegulu, iilya, omongwa, omaviinu nenge omagadhi gooholivi.

¹⁰Shika nashi ningwe, opo ya yambe omayambo ngoka ge shi kutaambwa kuKalunga komegulu nokwiindilila eyambeko lye kungame naamwandjemati.

¹¹Otandi utha natango kutya ngele oku na ngoka itaa vulika kelaka ndika, maandjawo namu dhikulwe omuti omunene gu na ondungu, opo a tsilikwe kugwo olutu lwe lwa ululwa. Egumbo lye nali ningwe ondumba yiiyagaya.

¹²Kalunga ngoka a hogolola Jerusalem, shi ninge ehala moka ta simanekelwa, na ekelehi omukwaniilwa kehe nenge oshigwana kehe shoka tashi kondjitha oshipango shika notashi kambadhala okuhanagula po otempeli. Ongame Darius nda gandja elaka ndika. Oli na okugwanithwa lela.”

¹³Nena omunashikandjo Tattenai, Shetar Bosenai naakwanepangelo ooyakwawo oya ningi naanaa ngaashi omupangeli a ti.

¹⁴Aawiliki yAajuda oya humu nawa komeho netungo lyotempeli taa kumikwa kaahunganeki Haggai naSakaria. Oya hulitha otempeli, ngaashi ya lombwelwa kuKalunga kaIsrael nokuKores, Darius naArtakserkses, aapangeli yaPersia.

¹⁵Oya mana otempeli mesiku etitatu lyomwedhi Adar momumvo omutihamano gwepangelo lyomupangeli Darius.

¹⁶Nena Aaisraeli — aayambi, Aalevi nayalwe ayehe mboka ya zi muupika — oya yapula otempeli nenyanyu enene.

¹⁷Meyapulo oya yamba oontsezi ethele, oonzi omathele gaali noonzigona omathele gane, niikombo omulongo niiyali yomayonondjambo, shimwe okukehe ezimo lyaIsrael.

¹⁸Oya tula wo aayambi nAalevi melandulathano miilonga yomotempeli muJerusalem, opamalombwelo ge li membo lyaMoses.

¹⁹Oshigwana shoka sha zi muupika, osha dhana Opaasa mesiku etimulongo netine lyomwedhi gwotango gwomumvo gwa landula.

²⁰Aayambi ayehe nAalevi oya adhika yi iyapula noya li aayogoki pamisindililo. Aalevi oya dhipaga oonzigona dhOpaasa dhaantu ayehe mboka ya galuka, dhaayambi nodhawo yene.

²¹Odha liwa kAaisraeli ayehe mboka ya galuka muupika nokwaayehe mboka ya li ye etha uupagani waantu mboka ya li moshilongo noyi ile okusimaneka Omuwa, Kalunga kaIsrael.

²²Oya dhana Oshituthi shiikwiila yaa na efulika nenyanyu enene omasiku gaheyali. Oya li yu udha enyanyu molwaashoka Omuwa e ya silitha ohenda komupangeli gwaAssur, sho e ya kwatha miilonga yetungululo lyotempeli yaKalunga kaIsrael.