Read Oshindonga-Ombiimbeli Ondjapuki ESRA 7 Bible Online

ESRA 7 - Oshindonga-Ombiimbeli Ondjapuki bible

ESRA 7

¹Konima yomimvo odhindji, Artakserkses sho a li omupangeli gwaPersia, okwa li ku na omulumentu edhina lye Esra. Oohekulu oya za momuyambimukuluntu Aaron, ngaashi tashi landula mpaka: Esra olyaSeraia yaAzaria yaHilkia

²yaShallum yaSadok yaAhitub

³yaAmaria gaAzaria yaMeraiot

⁴gaSerahia yaUssi waBukki

⁵yaAbishua yaPinehas yaEleasar lyaAaron.

⁶Esra okwa li omunongompango a tseya ompango ndjoka Omuwa, Kalunga kaIsrael, a pe Moses. Omupangeli okwe mu pe ashihe a li a pula, oshoka okwa li e na eyambeko lyOmuwa, Kalunga ke. Momumvo omutiheyali gwepangelo lyaArtakserkses, Esra okwa zi muBabilonia u uka kuJerusalem e li nongundu yAaisraeli mu na aayambi, Aalevi, aayimbi motempeli, aalangeli yotempeli naayakuli yomotempeli.

⁸Oya thigi po Babilonia mesiku lyotango lyomwedhi gwotango, nokekwatho lyaKalunga oya thiki muJerusalem mesiku lyotango lyomwedhi omutitano.

¹⁰Esra okwa li i igandjela okwiilonga ompango yOmuwa, oku yi landula nokulonga Aaisraeli iipango nomautho gayo agehe.

¹¹Ndjika oyo ontumwafo Artakserkses e yi pe omuyambi nomunongompango Esra, ngoka a tseya iipango nomautho ngoka Omuwa e ga pe Israel. Ontumwafo otayi ti ngeyi:

¹²“Ya zi kuArtakserkses omupangeli, kuEsra omuyambi nomunongompango yaKalunga komegulu.

¹³“Ote utha moshilongo shandje ashihe kutya Aaisraeli ayehe, aayambi nAalevi mboka ya hala okuya nangoye kuJerusalem, naa pewe epitikilo.

¹⁴Ngame, pamwe naagandjindunge yandje yaheyali, otatu ku tumu, u konakone onkalo muJerusalem naJuda, opo u mone, nkene ompango yaKalunga koye, ndjoka ye ku inekelelwa, tayi gwanithwa.

¹⁵Faalela ko omayambo goshingoli noshisiliveli ngoka tse naagandjindunge yandje twa hala okupa Kalunga kaIsrael, ngoka otempeli ye yi li muJerusalem.

¹⁶Faalela ko wo oshisiliveli noshingoli ashihe shoka to shi gongele moshitopolwa Babilon nomayambo ngoka oshigwana shaIsrael naayambi yawo taye ga gandjele otempeli yaKalunga kawo muJerusalem.

¹⁷“Dhiginina nawa iimaliwa mbika, u lande oongombe, oonzi oondumentu noonzigona, iilya nomaviinu u yi yambele koshiyambelo shotempeli muJerusalem.

¹⁸Longitha oshihupe shoshisiliveli noshingoli kushoka ngoye nooyakweni tamu tala olyo ehalo lyaKalunga keni.

¹⁹Iikwaniipangitho ayihe mbyoka we yi pewa, u yi longithe melongelokalunga, yi tula motempeli muJerusalem.

²⁰Ashihe shilwe to shi pumbwa motempeli yaKalunga koye, oto shi pewa moshiketha shuuwa.

²¹“Otandi lombwele omalenga agehe gomaliko moshitopolwa shokuuninginino waEufrat, ya pe Esra, omuyambi nomunongompango mompango yaKalunga komegulu, ashihe shoka ta pula,

²²ihe inashi konda ookilograma 3400 dhoshisiliveli, ookilograma 10 000 dhiilya, oolita 2000 dhomaviinu, oolita 2000 dhomagadhi gooholivi nomongwa gwa gwana nawa.

²³Ashihe shoka tashi pumbiwa motempeli yaKalunga komegulu, nashi tsakanithwe naanaa, opo kaa geele ndje nenge mboka taa landula ndje mepangelo.

²⁴Tseyeni wo kutya omwi indikwa okupula aayambi, Aalevi, aaimbi, aalangeli, aayakuli nenge aaniilonga yalwe motempeli oompale.

²⁵“Ngoye Esra, longitha owino mboka Kalunga koye e wu ku pa, wu langeke aakwanepangelo naatokolihapu, ya lele aantu ayehe mboka ya tseya ompango yaKalunga koye moshitopolwa shokuuninginino waEufrat. Mboka inaaye yi tseya, yi ya longeni.

²⁶Ngele oku na ngoka itaa vulika kompango yaKalunga koye nenge kompango yoshilongo, oku na okugeelwa mbalambala: na dhipagwe nenge ta pongekwa nenge eliko lye tali kwatwa po nenge ta tulwa mondjedhililo.”

²⁷Esra okwa ti: “Omuwa, Kalunga kootatekulu, na hambelelelwe! Okwa tula ehalo momupangeli, opo a simaneke ngeyi otempeli yOmuwa muJerusalem.

²⁸Kesilohenda lyaKalunga onda mono ohokwe komupangeli, aagandjindunge ye nomalenga ge agehe omanankondo. Omuwa, Kalunga kandje, okwa pe ndje omukumo, nonda vulu okugongela aakuluntu oyendji yomaludhi gaIsrael, ya ye pamwe nangame.”