Read Oshindonga-Ombiimbeli Ondjapuki NEHEMIA 6 Bible Online

NEHEMIA 6 - Oshindonga-Ombiimbeli Ondjapuki bible

NEHEMIA 6

¹Sanballat, Tobia, Geshem naatondi yetu yalwe oyu uvu kutya twa hulitha etungo lyedhingililokuma lyo kali na we nando okambululu, nando otwa li inaatu tula mo manga omiyelo miikulo.

²Sanballat naGeshem oya tumine ndje elaka taa indile ndje, tu tsakanene nayo muKefirim molushandja lwaOno. Shika osha li omwigo ye gu lukilila ndje, gu yule ndje.

³Onda tumu kuyo elaka tali ti: “Ondi na iilonga ya simana, ite vulu okuza po. Itandi vulu okuzimbula iilonga, ndi ye kune.”

⁴Oya tumine ndje elaka olyo tuu ndyoka lune, nonde ya tumine aluhe eyamukulo lya faathana.

⁵Opo ihe Sanballat okwa tumu omupiya gwe gumwe kungame e na elaka etitano li li montumwafo yomontaneho.

⁶Otali ti: “Geshem okwa lombwele ndje kutya omufofotolo ogu li miigwana yopuushiinda kutya ne Aajuda omwa hala okutukula oshipotha. Omolwashoka tamu tungulula edhingililokuma. Okwa ti ishewe, oto dhiladhila u ininge omukwaniilwa

⁷nowa longekidha aahunganeki yamwe ya kugilile muJerusalem kutya ngoye omukwaniilwa gwaJuda. Iinima mbika otayi uvika komukwaniilwa, onkee nda dhiladhila, tse nangoye tu tsakanene, opo tu kundathane po nawa.”

⁸Onde mu tumine eyamukulo tali ti: “Wa fundju, shoka to popi kashi shi shoshili.”

⁹Oya kambadhala oku tu tilitha, ya kankameke iilonga. Onda galikana nda ti: “Ngashingeyi, Kalunga, nkondopaleka ndje.”

¹⁰Esiku limwe onda ka talela po Shemaia yaDelaja, omutekulu gwaMehetabel, ngoka a li itaa vulu okuza maandjawo. Okwa ti kungame: “Natu ye, tu ka holame mela enene lyotempeli, tse tu pate omiyelo, molwaashoka otaye ya, ye ku dhipage. Uusiku wontumba otaye ya, ye ku dhipage.”

¹¹Onda yamukula nda ti: “Ngame, hatse yokufadhuka po nokuholama. Oto dhiladhila, omuntu ngangame ndi hupithe omwenyo gwandje nokuholama motempeli? Itandi shi ningi.”

¹²Sho nda dhimbulula kutya Kalunga ina lombwela Shemaia, ndele oSanballat naTobia, mboka ye mu pe oombumbo, opo a londodhe ndje.

¹³Oye mu futu, opo ya haluthe ndje, ndi yone yo ya vule okunyateka edhina lyandje noya fupipike ndje.

¹⁴Onda galikana nda ti: “Kalunga, dhimbulukwa shoka Tobia naSanballat ya longo, ngoye u ya geele. Dhimbulukwa omuhunganeki omukulukadhi Noadia naahunganeki ooyakwawo ya kambadhala okutilitha ndje.”

¹⁵Sho pwa piti omasiku omilongo ntano nagaali, edhingililokuma alihe olya pu mesiku etimilongombali nagatano gomwedhi Elul.

¹⁶Aatondi yetu miigwana ye tu kunduka sho ye shi uvu, oya haluka, oshoka oya li yu uvite kutya oshilonga shika osha longwa kekwatho lyaKalunga ketu.

¹⁷Methimbo alihe aawiliki yaJuda oya li haa nyolelathana naTobia.

¹⁸Aantu oyendji muJuda oya li ya gama kuye molwahemweno Omujuda, edhina lye Shekania yaArah. Niishewe, omwanamati Jehohanan okwa li a hokana omuna gwaMeshullam yaBerekia.

¹⁹Oya hokololele ndje iilonga yaTobia iiwanawa noye mu hokololele ashihe shoka nda ti. Okwa li ha nyolele ndje oontumwafo ta tilitha ndje.