Read Oshindonga-Ombiimbeli Ondjapuki EKSODUS 1 Bible Online

EKSODUS 1 - Oshindonga-Ombiimbeli Ondjapuki bible

EKSODUS 1

¹Aana yaIsrael mboka ya yi kuEgipiti, kehe ngoka negumbo lye, oyo

²Reuben, Simeon, Levi, Juda,

³Issaskar, Sebulon, Benjamin,

⁴Dan, Naftali, Gad naAser.

⁵Omwaalu gwaantu ayehe mboka ya za muJakob, oya li omilongo heyali. Omwana Josef okwa kala nale muEgipiti.

⁶Josef okwa si, osho wo aamwayina ayehe nepipi ndiyaka alihe,

⁷ihe Aaisraeli oya li ye na aanona oyendji noyi indjipala noonkondo nokuudha evi.

⁸Nena omukwaniilwa ngoka inaa tseya Josef, okwa lala Egipiti.

⁹Okwa lombwele aantu a ti: “Aaisraeli mbaka oyendji noye na oonkondo ye tu vule.

¹⁰Natu ya ningile po ondunge, opo yaa indjipale we; otaa ningi ya game kaatondi yetu, uuna tatu matukilwa, yo ya fadhuke po ya ze mo moshilongo.”

¹¹Aayegipiti oye ya thiminike niilonga iidhigu tayi ehameke oomwenyo dhawo. Aaisraeli oya tungu iilando Pitom naRameses, yi ninge iipungulilolando yomukwaniilwa.

¹²Ihe mpoka pu thike Aaisraeli taa hepekwa, opo wo pu thike Aaisraeli taa indjipala noya taandele nevi alihe. Aayegipiti oya tila Aaisraeli

¹³e taye ya thiminike ye ya tsike iilonga iidhigu yuupika taye ya longitha nonyanya. Oye ya tungitha omatungo noye ya longitha omapya noinaye ya yaalela nando.

¹⁵Omukwaniilwa gwaEgipiti okwa lombwele aavalithi yAahebeli Shifra naPua a ti:

¹⁶“Ngele tamu valitha aakulukadhi Aahebeli, uumati u dhipagii po, ihe uukadhona u etheni u kale u na omwenyo.”

¹⁷Ihe aavalithi oya tila Kalunga noinaa vulika komukwaniilwa. Oye etha uumati inaaye u dhipaga po.

¹⁸Omukwaniilwa okwi ithana aavalithi e te ya pula ta ti: “Omolwashike mwa ningi ngeyi? Omolwashike mwe etha uumati u kale nomwenyo?”

¹⁹Aavalithi oya yamukula ya ti: “Aakulukadhi Aahebeli kaa fele aakulukadhi Aayegipiti. Ohaa vala nuupu, uuhanona wawo otau valwa, manga inaatu thika ko nokuli.”

²⁰Molwashoka aavalithi ya li ya tila Kalunga, Kalunga okwe ya yambeke e te ya pe oluvalo lwawo yene. Aaisraeli oya tsikile okwiindjipala nokunkondopala.

²²Omukwaniilwa okwa gandja oshipango kaantu ye ayehe tashi ti: “Uumati auhe mboka tau valwa kAahebeli, u kuthii po, mu u umbile momulonga Niili, ihe uukadhona u etheni u kale u na omwenyo.”