Read Oshindonga-Ombiimbeli Ondjapuki EKSODUS 10 Bible Online

EKSODUS 10 - Oshindonga-Ombiimbeli Ondjapuki bible

EKSODUS 10

¹Omuwa okwa lombwele Moses a ti: “Inda komukwaniilwa, oshoka onda kukutike omwenyo gwe noomwenyo dhomalenga ge, opo ndi tsakanithile iinyengandunge mbika mokati kawo,

²nopo u wape okuhokololela aamwoye naatekulu yoye, nkene nda goyapaleke Aayegipiti, sho nda tsakanitha iinyengandunge mbika. One amuhe otamu ka tseya kutya ongame Omuwa.”

³Moses naAaron oya yi komukwaniilwa e taa ti kuye: “Omuwa Kalunga kAahebeli ota ti: ‘Sigo uunake to tindi okuvulika kungame? Laleka aantu yandje ya ye, opo ya ka simaneke ndje.

⁴Ngele oto tindi natango, ongula otandi ka undulila oombahu moshilongo shoye.

⁵Otadhi ka kala odhindjidhindji tadhi siikile evi. Otadhi ka lya po ashihe shoka sha thigwa po koompawe, nomiti ndhoka dha hupu ko.

⁶Otadhi ka udha muuwa woye nomomagumbo gomalenga goye nogaantu yoye ayehe. Owindji wadho inau monika nokoohokulu, hela ya kalele kombanda yevi.’ ” Nena Moses okwa pilamene ko e ta shuna.

⁷Omalenga gomukwaniilwa oga ti kuye: “Sigo uunake omulumentu nguno te tu talitha omalwa? Laleka aalumentu Aaisraeli ya ye, opo ya ka simaneke Omuwa, Kalunga kawo. Ou wete ko tuu kutya Egipiti otali ka teka po?”

⁸Oyo noya galulile Moses naAaron komukwaniilwa, e ta ti kuyo: “Otamu vulu okuya, opo mu ka simaneke Omuwa, Kalunga keni. Oolye naanaa ya hala okuya?”

⁹Moses okwa yamukula a ti: “Atuhe otatu ka ya, aanona yetu naakulupe yetu. Otatu yi naana yetu aamati naakadhona, oonzi niikombo noongombe dhetu, oshoka otatu ka dhana oshituthi, tu simaneke Omuwa.”

¹⁰Omukwaniilwa okwa ti: “Otandi gana kOmuwa kutya itandi mu pitika nando, mu kuthe aakulukadhi yeni naanona! Osha yela kutya ne omu na iipotha.

¹¹Aawoo! Aalumentu oyo ayeke naa ye ndati, mu ka simaneke Omuwa, ngele osho mwa hala.” Oyo noya tidha po Moses naAaron pomukwaniilwa.

¹²Omuwa okwa lombwele Moses a ti: “Yeluthila okwooko kwoye kombanda yevi lyaEgipiti alihe, opo oombahu dhi ye. Otadhi ya e tadhi li po ashihe hashi koko, ashihe shoka sha hupu ko koompawe.”

¹³Moses okwa yelutha ondhimbo ye, Omuwa nokwa pendutha ombepo yokuuzilo tayi pepe noshilongo omutenya nuusiku auhe. Ongula sho kwa shi, oombahu odha holoka.

¹⁴Odhe ya miiluku nodha halakana noshilongo ashihe. Odha li iiluku iinenenene yoombahu inaayi monika nale, noinayi monika we.

¹⁵Odha siikile evi ndele tali ti tuu tye. Odha li po ashihe sha thigwa po koompawe, niiyimati yokomiti. MuEgipiti alihe inamu kala we efo li li komuti nenge oshimeno sha ziza.

¹⁶Opo mpoka omukwaniilwa okwi ithana Moses naAaron onkolonkolo e ta ti: “Onda yono kOmuwa, Kalunga keni, nokune.

¹⁷Dhiminii ndje po oondjo dhandje lumwe natango ne mu galikane Omuwa, Kalunga keni, a kuthe po egeelo ndika lyeso pungame.”

¹⁸Moses okwa zi pomukwaniilwa e ta galikana Omuwa.

¹⁹Omuwa okwa pepitha ombepo yokuuzilo ya piluka tayi zi kuuninginino, ndjoka ya yelutha po oombahu e tayi dhi undulile mEkololo lyaSues. MuEgipiti inamu kala we nando ombahu yimwe.

²⁰Omuwa okwa kukutike omwenyo gwomukwaniilwa noina laleka we Aaisraeli, ya ka ye.

²¹Omuwa okwa lombwele Moses a ti: “Yeluthila okwooko kwoye kegulu, nomilema omiluudhe thokothoko, ngomuntu oto hala u tye oto dhi kwata, otadhi siikile evi alihe lyaEgipiti.”

²²Moses okwa yeluthile okwooko kwe kegulu, nomuEgipiti omwa kala omilema thokothoko omasiku gatatu.

²³Aayegipiti inaa vula we okumonathana, nokape na we ngoka a zi maandjawo pethimbo mpoka. Mpoka pwa li Aaisraeli, opwa li uuyelele.

²⁴Omukwaniilwa okwi ithana Moses e ta ti: “Otamu vulu okuya, mu ka simaneke Omuwa; aakulukadhi yeni naanona yeni otamu yi nayo wo. Ihe oonzi niikombo noongombe dheni nadhi kale po.”

²⁵Moses okwa yamukula a ti: “Tu pa wo iimuna mbyoka yoontselelandjambo noyomafikilondjambo okuyambela Omuwa, Kalunga ketu.

²⁶Aawoo, otatu yi niimuna yetu; itatu thigi po nando oshimwe. Tse yene otatu hogolola iimuna mbyoka tatu ka yambela Omuwa, Kalunga ketu. Nokuli inatu tseya iimuna oyini tatu ka yambela Omuwa, sigo twa thiki ko.”

²⁷Omuwa okwa kukutike omwenyo gwomukwaniilwa, noine ya etha ya ye.

²⁸Okwa ti kuMoses: “Za po pungame! Inandi ku mona we! Esiku to shi ningi, oto si!”

²⁹Moses okwa yamukula a ti: “Owa popi dhu uka. Itandi ka mona we oshipala shoye.”