Read Oshindonga-Ombiimbeli Ondjapuki EKSODUS 13 Bible Online

EKSODUS 13 - Oshindonga-Ombiimbeli Ondjapuki bible

EKSODUS 13

¹Omuwa okwa lombwele Moses a ti:

²“Yapulilii ndje aatango ayehe aalumentu, oshoka omutango kehe Omuisraeli omulumentu nomutango kehe gwoshimuna ogwandje.”

³Moses okwa lombwele aantu a ti: “Dhimbulukweni esiku ndika, uuna ndoka mwa tembuka muEgipiti, moka mwa li aapika. Esiku olyo ndika Omuwa e mu tembudha mo koonkondo dhe oonene. Inamu lya iikwiila ya tulwa efulika.

⁴Otamu tembuka muEgipiti mesiku ndika momwedhi gwotango, omwedhi Abib.

⁵Omuwa okwa uvanekele oohokulu nokugana e mu pe evi lyAakaanana, Aaheti, Aayamori, Aahevi nAayebusi. Shampa e mu fala mevi ndyoka lya tondoka omahini nomagadhi goonyushi, omu na okudhana oshituthi momwedhi gwotango omumvo kehe.

⁶Omasiku gaheyali omu na okulya iikwiila inaayi tulwa efulika nomesiku etiheyali oku na oshituthi shokusimaneka Omuwa.

⁷Omasiku gaheyali inamu lya iikwiila yi na efulika; moshilongo shoye ashihe inamu kala nande efulika nenge ondombo ya lulikwa.

⁸Uuna oshituthi tashi tameke, fatululila omumwoye omumati kutya otandi ningi ngeyi, oshoka Omuwa okwe shi ningile ndje, sho nda tembuka muEgipiti.

⁹Oshinima shika nashi kale edhimbulukitho lya fa lya mangelwa koshikaha shoye nenge li li moshipala shoye; otashi ku dhimbulutha okutsikila okutotomona nokwiilonga ompango yOmuwa, oshoka Omuwa okwe ku tembudha muEgipiti koonkondo dhe oonene.

¹⁰Dhaneni oshituthi shika mesiku lyu uthwa omumvo kehe.”

¹¹“Omuwa ote ku fala mevi lyAakaanana, ndyoka e li ku uvanekele nokugana, nosho wo oohokulu. Shampa e li ku pe,

¹²ou na okuyambela Omuwa omumati kehe osheeli. Osheeli kehe shiimuna oshOmuwa,

¹³ihe oshi na okukulilwa, ngele osheeli shokasino, u yambe onzigona peha lyasho. Ngele ino hala okukulila okasino, teya othingo yako. Ou na okukulila osheeli shoye shomumati.

¹⁴Konakuyiwa omumwoye omumati nge te ku pula kutya shika otashi ti ngiini, mu yamukula u tye: ‘Omuwa okwe tu tembudha muupika muEgipiti koonkondo dhe oonene.

¹⁵Omukwaniilwa gwaEgipiti sho a li a kukutika omwenyo gwe nokwa tindi oku tu laleka tu tembuke, Omuwa okwa dhipaga aatango ayehe aalumentu muEgipiti noyiimuna wo. Omolwashoka tatu yambele Omuwa omutango kehe gwoshimuna oshilumentu, ihe aana yetu aamati ohatu ya kulile.

¹⁶Shika nashi kale edhimbulukitho lya fa lya mangelwa koshikaha shoye nenge li li moshipala shoye; otashi ku dhimbulutha kutya Omuwa okwe tu tembudha muEgipiti koonkondo dhe oonene.’ ”

¹⁷Omukwaniilwa gwaEgipiti sho a laleke aantu ya ye, Kalunga ine ya fala mondjila yu uka komunkulo gwaFilistia, nando oyo ya li ondjila ya tetula. Kalunga okwa ti: “Inandi hala aantu ya lundulule omadhiladhilo gawo e taa shuna kuEgipiti, shampa ya dhimbulula nani kutya otaa ka kondja.”

¹⁸Ndele okwe ya fala nondjila ya dhingoloka mombuga yu uka kEkololo lyaSues. Aaisraeli oya li ya homata, sho ya tembuka.

¹⁹Moses okwa kutha iipongo yaJosef, ngaashi Josef a uvanekitha Aaisraeli nokugana ye shi ninge. Josef okwa tile: “Kalunga nge te mu mangulula, omu na okufaalela iipongo yandje mu ze nayo mpaka.”

²⁰Aaisraeli oya zi muSukkot e taa ka yunga oontanda puEtam kooha dhombuga.

²¹Omutenya Omuwa okwe ya tetekelele moshikogo shomuzile e ya ulukile ondjila, nuusiku okwe ya tetekelele moshikogo shomulilo e ya minikile, opo ya vule okweenda uusiku nomutenya.

²²Oshikogo shomunzile osha li aluhe komeho gaantu omutenya aguhe, nuusiku oshikogo shomulilo.